Meeqqat sunik pisariaqartitaqartut

KIKKULLUUNNIIT meerartaartut silarsuarmi nuannaarnarnerpaamik misigisaqartarput kimilluunniit paasivinneqarsinnaanngitsumik. Angut arnarlu timimik ilaannik tunniussaqarput, inerneralu tassa inuk uummassusilik, inuk nutaaq. Paasinarpoq inuppassuit ernineq tupinnartuliaanerartarmassuk.

Ataataasumut anaanaasumullu suliassarujussuaq nutaaq aallartippoq. Erninerup kingorna meeqqap timikkut pisariaqartitai erniinnaartumik isumagisariaqarpaat. Meerarli allanik pisariaqartitsiartuaassaaq. Eqqarsartaatsimigut, misigissutsimigut, ileqqussatigut anersaakkullu ineriartussaguni ikiorneqarnissani pisariaqartippaa.

Angajoqqaat asanninnerat ernerata paniataluunniit perorluarnissaanut pingaaruteqarnerpaavoq. Pingaaruteqarpoq meeqqamik asallugu oqarfigikulasarnissaa, aammali iliuutsimikkut tamanna ersersittariaqarpaat. Meeqqat angajoqqaatik maligassaalluartutut pisariaqartippaat. Najoqqutassianik, ileqqussanik, malissinnaasaminnik pisariaqartitsipput. Tamannalu mikinerminniilli pisariaqartippaat. Siunnersorneqarnerat kingusippallaarpat tamanna kingunerlungaarsinnaavoq, ajoraluartumillu taamaattoqartarneranik assersuutissarpassuaqarpoq.

Siunnersuut pitsaanerpaaq pissarsiarineqarsinnaasoq Biibiliminngaanneersuuvoq. Biibilip ilinniartitsinermut tunngavissatut atornera immikkorluinnaq ittumik iluaqutissartaqarpoq. Taanna tunngavissatut atoraanni meeqqat paasisarpaat paasisatik inuinnaat isumassarsiarinngikkaat, Pinngortitsisuminngaaneersuusulli, Ataataminnit qilammiusumit. Tamanna asseqanngilluinnartumik sunniuteqassaaq.

Biibilimi angajoqqaat kajumissaarneqarput suut eqqortuunersut pillugit najoqqutassiat meeqqaminnut puiuikkiutiteqqullugit. Meeqqat peroriartortillugit angajoqqaat pingaaruteqarnerpaanik oqaluuserinninnissartik sapernartissinnaasarpaat. Neriuutigaarput atuagaq manna, Ajoqersuisorsuaq ilinniarfigiuk, tamatuma sapernannginnerulernissaanut iluaqutaassasoq. Ilissi angajoqqaajususi qitornasilu anersaakkut ittunik atuaqatigiissutissaqalissutigaarsi. Aammattaarli; meeqqat ilissilu taakkuninnga atuffassisusi oqaloqatigiissuteqalernissarsi siunertaralugu allanneqarsimavoq.

Maluginiaruk atuakkami matumani meeqqat oqaaseqarnissamut periarfissinneqarmata. Allaaserisap oqaasertaani apeqquterpassuaqarpoq. Apeqqutip kingorna kittoraateqaraangat (—) atuffassisoq unitsiarnissaminut meeqqallu akinissaanut periarfissaqalersarpoq. Meeqqat peqataanissartik nuannarisarpaat. Peqataanngikkunik soqutiginnikkunnaapallassapput.

Sulili pingaaruteqarnerusoq tassaavoq apeqqutit meeqqavit qanoq eqqarsarnerannik paasinnissinnaassutigilissagakkit. Imaassinnaavoq meeqqat eqqorpianngitsumik akisut. Apeqqutit kinguninnguatigut allaaserisap oqaasertaa eqqortumik eqqarsartaaseqarnermik ineriartortitsinissamut iluaqutigissavaat.

Atuakkap immikkut ilisarnaataa alla tassaavoq 230-t sinnerlugit assiliartaqarnera. Assiliartaliunneqarsimasut amerlanersaat apeqqutitaqarput meeqqat takusatik tusakkatillu malillugit akinissaannut periarfissiisunik. Assiliartat meeqqat peqatigalugit misissoqqissaarsigit. Tamanna ilinniartitsinerup ilagaa pingaaruteqartoq, aamma tamanna kapitalimi meeqqanut ilinniutigineqartuni pingaaruteqartunut erseqqissaataassaaq.

Meeqqat namminneq atuarsinnaalerpata atuagaq taakkununnga nammineq atuaqqusinnaavat nipituumillu atuffateqqullutit. Namminneq atuakkamik taassuminnga atuakulanerujartortillugit tassani siunnersuutaalluartut isumamikkut uummatimikkullu puiuikkiunnerujartuinnassavaat. Siullerpaamilli atuagaq atuaqatigiissutigisariaqarparsi, akuttunngitsumillu taamaaliortarlusi. Tamanna meeqqatillu asaqatigiinnissinnut ataqqeqatigiinnissinnullu nakussatsissutaassaaq.

Ullumikkut ukiualuit matuma siornatigut takorloorsinnaanngisatsinnik ileqqorlunnerit, anersaalerinerit, allarpassuillu aserorsaataasut pillugit meeqqat tusagaqartarput. Tamakkununnga sernissorneqarnissartik pisariaqartippaat. Atuagaq manna tamakkununnga illersuutissat ilagaat, peqqusiileqinartut naleqquttumik isertuanngitsumilli sammineqarmata. Pingaarnerpaamik meeqqat ilisimassutsip Puilaffianut, Ataatatsinnut qilammiusumut, Jehovamut Guutimut, attaveqalernissaminnut ikiorneqarnissartik pisariaqartippaat. Jiisusimmi, Ajoqersuisorsuup, inuit Guutimut attaveqalernissaannut ikiortuaannarpai. Ilumoorluta neriuutigaarput atuagaq manna iluaqutigalugu illit ilaquttavillu inuunersi ilusilersussagissi naassaanngitsumik ilissinnut pilluaqqussutaalersillugu Jehovamullu nuannaarutaalersillugu.