Ullut utoqqarnut ajornakusoortut
MAMA ONIYAN 68-inik ukioqarpoq Afrikallu kitaani illoqarfissuarmi najugaqarluni. Inuusuttuugallarami takorloortarsimagaluarpaa utoqqaliguni meeqqani ernuttanilu ilagalugit eqqissilluni inuussalluni. Maannali kiattup seqernata ataani piffissaq imermik nillarissumik tuniniaanermut atortarpaa. Aningaasarsiamininngui naammaqqalaaginnartarput. Erneri marluk nunami ungasissumi najugaqarput. Qangarsuanngorporli aningaasanik nassimmassuk.
Qangaanerusoq Afrikami utoqqaat assut ataqqineqartarsimapput. Misilittagaat ilisimasaallu kiisalu ilisimassusiat siuneqassusiallu tamatuma nassatarigajugaa pillugit ataqqineqartarsimapput. Ernuttaminnik perorsaanermut ikiuuttarsimapput. Inersimasut inuusunnerusut utoqqarnik siunersiuisarsimapput taakkunanngalu iluarisaanissartik ujartortarsimallugu. Inuit Biibilimi unnersuussut manna malillugu inuusimapput: „Qeersuut nikuiffigissavasi utoqqaallu ataqqillugit.“ — 3 Moses 19:32.
Pissutsilli allanngorsimapput. Piitsuussuseq, aningaasat naleerukkiartornerat, suliffissaaleqineq inuppassuillu illoqarfinnut nutsertuarnerat pissutaalluni utoqqaat ilarpassui imminnut napatinniartariaqalersimapput. Kenyami utoqqarnik ikiuiniaqatigiiffiup naalagaaffimmut atanngitsup HelpAge Kenyap siulittaasua Camillus Were ima oqarpoq: „Utoqqarnik tapersersuillunilu isumassuisarneq ileqqorineqarunnaalerpoq.“
Soorunami ilaqutariittut ataqatigiinneq Afrikaannaanngitsumi sanngiilliartorpoq. Japanimi pissutsit pillugit aviisimi Guardian Weekly-mi ima allassimasoqarpoq: „Ujarak Japanimiut ileqqussatigut najoqqutassaasa Konfutzesiornermik tunngaveqartut teqeqqorisaat tassaasimagaluarpoq angajoqqaanik ataqqinninneq, illoqarfimmiorpalussaanermulli ilaqutariittullu nimit qasukkarnerannut artorsarsimavoq — Japanimilu utoqqaat 85 procentii napparsimmavinni utoqqaalluunniit illuini toqusarput.“
Pissutsit qanorluunniit ikkaluarpata Guutip iluarisaanik iliorusuttut angajoqqaatik ataqqiniartarpaat. Biibilimi unnersuussut manna malippaat: ’Ataatat anaanallu ataqqikkit, . . . nunami pilluaqqullutit inuummersoqqullutillu.’ (Evfisumiut 6:2, 3) Angajoqqaanik utoqqalisunik ataqqinninniarneq isumassuiniarnerlu oqitsuinnaasanngikkaluartoq misigisaasinnaavoq pisuunngornartoq. (wE 1/9 97)