Atit qanoq tusaamaneqalerpa?
QULARNANNGITSUMIK ilaannikkooriarlutit toqusimasoq pillugu aviisikkut eqqaaniaalluni allaaserisamik atuartarputit imaluunniit toqoqqammersoq pillugu TV-kkut eqqaaniaanermik takusaqartarlutit. Illit qanoq eqqaaniassagaluaraatsit eqqarsaatigisimaviuk? Qassimmita qanoq eqqaamaneqassanerlutik eqqarsaatigisarpaat? Aap, ullumi eqqaaniarneqassagaluaruit qanormita oqaasertaqassagaluarpa? Qanormita ilinnut tusaamaneqartilerpit? Ilisarisimasannit minnerunngitsumillu Guutimit qanoq eqqaamaneqarusuppit?
Allaaserinnittartoq silatooq Oqaluussisartup oqaasiini ima oqarpoq: „Ajunngitsumik tusaamaneqarneq pitsaaneruvoq tarnummit uuliamit akisuumit; ulloq toquffik pitsaaneruvoq ullormit inunngorfimmit.“ (Oqaluussisartup oqaasii 7:1) Sooq ulloq toquffik ullormit inunngorfimmit pitsaanerua? Tassa inunngornermi tusaamaneqarneq suli aallartissimasanngimmat. Quppernertut imaqanngitsutut ippugut. Inuunerup ingerlanerani ajunngitsumik ajortumilluunniit uatsinnut tusaamaneqariartuaartittarpugut. Inunnut ukiut ingerlanerini ajunngitsumik tusaamaneqalersimasunut ulloq toquffik inunngorfimmiit pitsaaneruvoq.
Tassa qinigassaqarpugut. Aap, ullormi toquffissatsinni tusaamaneqaatissatsinnut pingaarutilinnik ullut tamaasa aalajangigassarpassuaqarpugut, ingammik Guutimut pingaarutilinnik. Taamaattumik allaaserinnittartoq silatooq taanna allappoq: „Pilluaqqusaanerni iluartup aqqa taaneqartarpoq, iluanngitsulli aqqa asiusarpoq.“ (Ussatit 10:7) Guutimit eqqaamaneqarnissamit annerusumik ataqqinaateqartoqarsinnaanerpa, pilluaqqusaanermik kingunilimmik?
Silatusaarniarutta Guutip najoqqutassiaanik malinninnitsigut iluarisaanik inuunissaq anguniagarisariaqarparput. Tassa imaappoq najoqqutassat tunngaviusut Kristusip pingaartillugit ersersitai malittariaqarpavut: „’[Jehova] Guutit asassavat uummatikkut iluunngarlutit tarnikkullu iluunngarlutit isumakkullu iluunngarlutit.’ Tassa inassutit annersaat siullersaallu, aappaatali taamaaqatigaa: ’Tullit ilittut asassavat.’ Inatsisit tamarmik pruffiitillu allagaasa inassutit taakkua marluk tunngavigaat.“ — Matthæusi 22:37-40.
Inuit ilaat inoqatiminnut ajunngitsuliornertik ikiuiniarnertillu pillugu imaluunniit ikinnerussuteqartut pisinnaatitaaffiinik sorsuutiginninnertik pillugu eqqaamaneqartarput. Ilaat ilisimatuussutsip, niuernerup, nakorsaasiornerup allalluunniit tungaasigut eqqaaneqartarput. Illit suna eqqaamaneqaatigerusuppiuk?
Taalliortoq Skotlandimiu Robert Burns (1759-96) taalliamini kissaateqarpoq ’arlaata inuit allat uatsinnik isiginnittaasiat isiginnittaaseralugu immitsinnut ullut ilaanni takunnissinnaalersissagaatigut’. Illua’tungaannarsiornak imminut qimerlooruit Guutimit inunnillu allanit tusaamaneqarluarlutit oqarsinnaavit? Inunnut allanut ajunngitsumik attaveqarneq timersornermi imaluunniit niuernermi sivikitsumik tusaamaneqalernermit ungasinnerusoq eqqarsaatigalugu pingaarneruvoq. Taamaattumik manna apeqqutaalerpoq: Oqaatsivut iliuutsivullu pissusilersornivulluunniit allanut qanoq sunniuteqartarpat? Ilassiortutut qanilliuminaatsutulluunniit isigineqarpugut? Inussiarnersutut sukannersutulluunniit? Piuminartutut piuminaatsutulluunniit? Kissalaartutut inuppalaartutullu imaluunniit nillertutut mersernartutullu? Sukannersumik isornartorsiuiuartutut imaluunniit ingerlaqqissutaasinnaasumik siunersuuteqartartutut? Itsaq ullumikkullu maligassiuisimasut ilaat qimerluulaariartigit, takoriartigulu qanoq ilinniarfigisinnaallugit?
[Qupp. 3-mi assiliartaq]
Robert Burns kissaateqaraluarpoq ’arlaata inuit allat uatsinnik isiginnittaasiat isiginnittaaseralugu immitsinnut ullut ilaanni takunnissinnaalersissagaatigut’.
[Suminngaanneernera]
Atuakkamit A History of England