Guutip naalagaaffianik oqaluussissutiginninnermit nutaarsiassat

„Siornagut taamatut ittumik tusanngisaannarpunga!“

DOROTAP, Jehovap Nalunaajaasuisa ilaata, Polenimi piffissaq tamaat oqaluussisartup, ernini 14-inik ukiulik atuarfiup nakorsaanut ilagivaa. Nakorsap misissuitilluni Dorota aperivaa ernera angerlarsimaffimminni ikiuuttarnersoq.

„Aap, pisinnaanngikkaangama ilaqutariinni arfiniliusugut tamatta nerisassiuuttarpaatigut,“ Dorota akivoq. „Aamma asaasarpoq illumilu iluarsagassanut ikiuuttarluni. Aammattaaq atuarneq nuannaraa atuarfimmilu eqiasuitsuulluni.“

„Ila-tupinnaq,“ nakorsaq oqarpoq. „Maani ukiuni 12-ini sulisimavunga, taamatullu ittumik tusanngisaannarlunga!“

Dorotap malugaa upperisani pillugu oqaluttuarnissamut periarfissaasoq taamaattumillu oqarluni: „Ullumikkut angajoqqaarpassuit meeqqatik iluamik ilinniartinngitsoortarpaat. Taamaattumik meeqqat imminnut tatigerpianngitsut takussaagajupput.“

„Suminngaanniit tamakku tamaasa nalunngiligit?“ nakorsaq aperivoq. „Angajoqqaat amerlanersaat taamaattunik ilisimasaqanngilluinnarput.“

„Biibili aqqutigalugu ilikkarsimavakka. Taamaattunut paasissutissanik pingaartunik ulikkaarpoq,“ Dorota akivoq. „Assersuutigalugu Mosesimik allakkat tallimaat 6:6-imit 9-mut allassimavoq meeqqavut ilinniartissagutsigit imminut ilinniarteqqaartariaqartugut. Meeqqavut ileqqussatigut najoqqutassanik pitsaasunik puiuikkiussitinniarutsigit najoqqutassat pitsaasut uagut nammineerluta isumatsinni uummatitsinnilu pigiliuttariaqannginnerpagut?“

„Ila tupinnassusia!“ nakorsaq oqarpoq. „Tupinnaq!“ oqaq- qippoq. Taava Dorota aperaa meeqqani perorsaraangamigit ilinniartikkaangamigillu Biibili qanoq atortarneraa.

„Sapaatip-akunneri tamaasa Biibili ilaqutariittut atuaqqissaartarparput,“ Dorota oqaluttuarpoq. „Atuagaq Unge spørger — Svar der duer-imik taaguutilik atortarparput.“a Taava atuagaq sammineqartullu ilaat pillugit oqaluttuuppaa.

„Siornagut taamatut ittumik tusanngisaannarpunga!” nakorsaq oqamivoq. „Atuagaq taanna takusinnaavara?“

Nalunaaquttap akunnera ataaseq qaangiummat Dorota uterpoq atuagaq nassarlugu.

„Upperisarsiortunut sorlernut ilaavit?“ atuagaq misissuutigalugu nakorsaq aperivoq.

„Jehovap Nalunaajaasuinut ilaavunga.“

„Jehovap Nalunaajaasuisa allamik upperisallit qanoq isigivaat?“

„Ataqqivavut — soorlu uanga illit ataqqigikkit,“ Dorota akivoq nangillunilu: „Soorunami sallusuissut Biibilimeersoq inunnut ilikkartikkusupparput.“

„Tusarlugu eqqissiallaqaanga,“ nakorsaq oqarpoq.

Dorota anilerami nakorsaq Biibilimik atuaqqullugu kajumissaarpaa. „Inuunerit siunertaqalissaaq sulininnilu iluaqutigissavat.“

„Kajumilersingaarparma,“ nakorsaq nassuerpoq.

Nakimaalluni pissuserissaarlunili Dorotap atuarfimmi nakorsamiinnini upperisani pillugu oqaluttuarnissaminut periarfissaq atorpaa. — 1 Petrusi 3:15.  (wE 10/1 03)

[Quppernerup ataani ilanngussaq]