’Misigaakka inussiarnisaarneq, asanninneq isumaginninnerlu’
„ASAQATIGIIKKUSSI tamatumuuna tamarmik paasissavaat ajoqersugarigissi.“ (Johannesi 13:35) Jiisusip oqaasii naapertorluinnarlugit kristumiut siulliit asanninneq ilisarnaatigaat. Jiisusip toquneranit ukiut hundredet sinnerlugit qaangiuttut Tertullianip Kristusip ajoqersugai pillugit oqaaserineqarsimasut issuarpai: ’Takuuk asaqatigiissusii, imminnullu pilliutigeriaannaassusii.’
Asanninneq taamaattoq suli silarsuarmi nassaassaava? Aap. Soorlu Brasiliami Jehovap Nalunaajaasuisa immikkoortortaqarfiannut arnap Maríliamik atillip allagaanit ersersinneqartoq. Taanna allappoq:
„Anaanaga Jehovap Nalunaajaasuisa ilagaat. Argentinami Villa Mercedesimi najugaqartilluni naggussamigut gigteqalerpoq, tamannalu pissutigalugu qiterminit ammut nukillaariartorluni. Qaammatini napparsimaffiini siullerni arfineq pingasuni Villa Mercedesimi Jehovap Nalunaajaasuinit asannittumik isumagineqarluni paarineqarpoq. Tamaasa isumagaat, asaasarlutik nerisassiuuttarlugulu. Allaat anaanaga napparsimmavimmut unimmat ullukkut unnuakkullu najorneqartarpoq.
Kingorna anaanagalu Brasiliamut uterpugut nuulluta, nakussatsikkiartuaarporlu. Najukkatsinni Jehovap Nalunaajaasui anaanaga ajunnginnerulernissaanut ikiorniarlugu tamanik iliuuseqarput.“
Maríliap allakkani ima naggaserpai: „Uanga nammineq Jehovap Nalunaajaasuisa ilaginngilaannga, misigaarali imminnut inussiarnisaarfigeqatigiinnerat, asaqatigiinnerat isumassoqatigiinnerallu.“
Aap, suli inoqarpoq kristumiutut asanninnermik ilumoortumik ersersitsisunik taamaalillutillu Jiisusip ilinniartitsissutaata uagutsinnut sunniuteqarluarsinnaaneranik nalunaajaataasunik. (wE 11/1 03)