Guutip Naalagaaffianik Oqaluussissutiginninnermit Nutaarsiassat

TV-mi aallakaatitap Guutimik unnersiutiginnilersippaa

APUSTILI Paulusi allappoq: „Ilaat Kristusimik oqaluussisaraluarput sinngatunermik saqitsaassiumatunermillu pissuteqarlutik, allalli ajunngitsumik piumassuseqarlutik taamaaliorput.“ (Filippimiut 1:15) Ilaannikkut inuit ilaat Jehovap innuttaannik ajortumik isiginnilersitsiniaasut piaarinaatsoornikkut eqqortuliorusuttut sallusuissutsimik ilassinnilersittarpaat.

1998-imi novembarimi Jehovap Nalunaajaasuisa immikkoortortaqarfiat, Betelimik taaneqartartoq, Frankrigimi Louviersimiittoq pillugu nuna tamakkerlugu takutinneqartumik TV-kkut aallakaatitsisoqarpoq. Naak aallakaatitami Jehovap Nalunaajaasui ajortumik eqqartorneqaraluartut ilimagineqanngilluinnartumik ajunngitsumik kinguneqarpoq.

Aallakaatitamik isiginnaartut ilagaat Anna-Paula, anaanaq avinneq, marlunnik meeralik Betelimiillu 60 kilometeriinnarnik ungasitsigisumi najugaqartoq. Anna-Paula suliffissarsiortuugami aqaguani ullaakkut immikkoortortaqarfimmut sianerpoq suliffissaqassanersoq paasiniarlugu. Taanna oqaluttuarpoq: „Suliffigalugu nuannerunartissimavara suliarineqartullu iluaqutaassangatillugit.“ Tupigutsapporlu paasitinneqarami Betelimiittut tamarmik akeqanngitsumik nammineq kajumissutsiminnillu sulisut! Sivikitsumik Jehovap Nalunaajaasuisa suliaat oqaloqatigiissutigereerlugit oqaluussisartumit pulaarneqarnissaminut akuersivoq.

Léna, najukkamini ilagiinni piffissaq tamaat oqaluussisartoq, pulaarmat sivisuumik oqaloqatigiipput, Anna-Paulallu atuagaq Ilisarsineq inuunermut naassaanngitsumut sammisoq tiguaa.a Tulliani Léna pulaarmat Anna-Paulap atuagaq naallugu atuareersimavaa apeqqutissarpassuaqarlunilu. Nuannaarluni Biibilimik atuaqqissaaqatigineqarnissamik neqeroorut akueraa. Anna-Paula oqarpoq: „Guutip oqaasiata ilinniarnissaanut periarfissaqalerpunga. Siornagut Biibilimik tigumiaqanngisaannarsimavunga.“

Januaarimi Anna-Paulap immikkoortortaqarfik pulaarpaa, sapaatip-akunneratalu tulliani siullermeerluni Jehovap Nalunaajaasuisa ataatsimiinnerannut najuulluni. Kinguninngua meeqqani Biibilimik atuaqatigisalerpai ikinngutinilu oqaluussiffigissalerlugit. „Ilikkagarpassuakka nammineq pigiinnarsinnaanngilakka,“ oqarpoq. „Biibilimi tusarliunneqartut pillugit allanik avitseqateqarnissara tuppallersaanissaralu kissaatigaara.“ Anna-Paulap nammineerluni inuttut ajornartorsiutini arlallit anigoreerlugit ataatsimiinnerit tamakkiallugit takkuttalerpoq. Siumukarasuarpoq maajillu 5-ini 2002-mi kuisilluni.

Tassungali killeqanngilaq. Anna-Paulap maligassiuilluarnera oqaluussiuarneralu pissutaallutik arnaa Biibilimik atuaqqissaaqatigineqartalerpoq, sivitsunngitsorlu kuisilluni. Anna-Paula oqarpoq: „Nuannaarneq misigisara oqaatsitigut saqqummiunneqarsinnaanngivippoq. Ullut tamaasa Jehova qutsavigisarpara ilikkarsimagakku immikkut pisinnaatitaaffik pilluaqqusaanerpassuillu uannut tunniussimasai pillugit.“ (wE 12/1 03)

[Quppernerup ataani ilanngussaq]

[Qupp. 9-mi assiliartaq]

Qulleq: Anna-Paula

Alleq: Frankrigimi, Louviersimi immikkoortortaqarfik