„Nukappiaraq qulingiluanik ukiulik itigartissinnaannginnakku“
WIESŁAWAP, Polenimi kujasinnerusumi najugaqartup, Jehovap Nalunaajaasuinit pulaarneqaraangami pissuserilluni itigartittarpai. Ullulli ilaanni Samuel qulingiluanik ukiulik arnilu matuanut kasuttorput. Tamatumuuna tusarliussaannut Wiesława tusarnaarpoq atuagassiarlu nunami paratiisimut tunngasoq tigullugu.
Kristusip toquneranik eqqaaniaalluni nalliuttorsiornissaq qanillimmat Samuelip Wiesława nalliussinissamut tamatumunnga immikkut ittumut qaaqqorusuppaa. Nukappiaqqap arni ilagalugu Wiesława pulaaqqippaa tamatumuuna qaaqqusissut nassarlugu. Wiesławap nukappiaraq qanoq atisarissaartigisoq takugamiuk utaqqilaaqqoriarlugit atisani taarseriartorpai. Anillaqqikkami Samuel tusarnaarpaa, qaaqqusissullu tigoriarlugu ima aperaaq: „Kisima aggissaanga, uigaluunniit ilagisinnaavara?“ Imali nangippoq: „Uiga piumanngippat kisima aggissaanga. Samuel, illit pillutit taamaaliussaanga.“ Samuelip nuannaarutigisaanik oqaatsini eqqortippai.
Eqqaaniaanermi Samuelip Wiesława sanileraa allassimaffiillu oqalugiaammi sammineqartut takutittarlugit. Wiesławap ajasoorutigaa. Eqqaaniaanermut najuunnini nuannaarutigaa eqqarsaatillu itisuut paasiuminartumik nassuiarneqarneri qujamasuutigalugu. Aamma tikilluaqqusaalluarnini ilagiinniittullu inussiarnisaarnerat killitsissutigai. Taamanimiilli Wiesławap anersaamut tunngasut soqutiginerujartuinnarpai Jehovap Nalunaajaasuisalu ataatsimiinnerinut aalajangersimasumik najuuttalerluni. Qanittukkut ima oqarpoq: „Matunnut kasuttoraangassi siusinnerusukkut tusarnaartarsimannginnera peqqusiileqqissutigaara. Nassuerutigisariaqarparalu Samuel piinnarlugu tusarliussassinnut tusarnaarnera. Nukappiaraq qulingiluanik ukiulik itigartissinnaannginnakku.“
Polenimi Samuelitut Jehovap Nalunaajaasui allat inuusuttorpassuit oqaatsimikkut pissuserissaarnermikkullu Guuti unnersiutigaat. Inuusuttuuguit immaqa aamma illit inuit sallusuissummik ujarlersut anersaakkut nalilinnik pingaartitsilernissaannut ikiorsinnaavatit. (wE 9/1 06)