Kristumiuujumalluni ataasiullunilu pingasuussusermik upperinnittariaqarpa?

Atuakkami ilinniummi Danske Verdensreligioner — Kristendom-imi, 2007-imi saqqummersinneqartumi ilinniarnertuunngorniarfinni atugassami, Jehovap Nalunaajaasui kristumiutut ikinnerussuteqartutut Biibilimik maleruaaqqissaartutut allaatigineqarput. Qallunaat Nunaannili Jehovap Nalunaajaasui uppeqatigiit kristumiut annerpaap tulliata tulliupput.

Kisianni ilagiit danskit naalagaaffiannit tapersersorneqartut biskoppiisa ilaata atuakkiortoq sakkortuumik isornartorsiorpaa ilinniummi Jehovap Nalunaajaasui ilanngummagit. Sooq? Biskoppi ima oqarpoq: “Teologimik [Jehovap Nalunaajaasuinik] kristumiuuneraasumik naapitaqanngisaannarpunga. Ataasiullunilu pingasuussuseq, qularnanngitsumik kristumiut upperisaannut tunngaviusoq, upperinngilaat.”

Atuakkamik allattup, upperisarsiornermut sociologip Annika Hvithamarip, nassuiarpaa inuit aperineqaraangamik sooq kristumiuunersut qaqutigorujussuaq ataasiullunilu pingasuussusermik upperisaqarnertik pissutaanerartaraat. Aammattaaq atuakkap kapitaliisa ilaanni “Er du kristen?”-imik ( “Kristumiuuit?”-mik) qulequtalimmi ima allassimavoq: “Guutimik ataasiullunilu pingasuusumik ajoqersuut kristumiut ajoqersuutaannut paasiuminaannerpaanut ilaavoq.” Ima nangippoq: “Nassuiaruminaattuaannarsimavoq kristumiunut ilinniartinneqanngitsunut sooq kristumiut Guutiat guutiusoq ataaseq tassaananilu guutit pingasut.”

Guuti Jiisusilu pillugit Biibilimi ajoqersuutigineqartut paasiuminarlutillu erseqqipput. Paasiuminaatsuunngillat. Oqariartaaseq ‘ataasiullunilu pingasuusoq’ Guutip oqaasiani atorneqanngilaq, aammami ataasiullunilu pingasuusoq pillugu isuma eqqaaneqanngilaq. Biibilimi paasinarluartumik allassimavoq Jiisusi Kristusi Guutip angajulliliarigaa. (Kolossemiut 1:15) Aamma Jiisusi ‘Guutimut inunnullu akunnermiliuttutut’ eqqaaneqarpoq. (1 Timotheusi 2:5) Ataataq pillugu Biibilimi ima allassimavoq: ‘Illit kisivit — aqqit tassaavoq Jahve — Qutsinnerussaartuusutit nunarsuarmi tamarmi.’ — Tussiaat 83:19.

Jehovap Nalunaajaasui isumaqarput Jiisusimik upperinninneq pingaaruteqarluinnartoq. (Johannesi 3:16) Taamaattumik Jiisusip oqaasii uku pimooruppaat: “[Jehova] Guutit pallorfigissavat taannalu kisiat kiffartuullugu.” (Matthæusi 4:10) Erseqqippoq Jiisusip inassutaanik ilungersorluni maleruaaniaraanni kristumiumik taaneqartoqarsinnaasoq. (wp10 02/01-E)