Oqaluttualiaannaanatik pisimasuiit
‘Tamaasa aallaqqaataanniilli sukumiisumik misissorpakka.’ — LUKASI 1:3.
BIIBILI QANOQ ALLAANERUA? Oqaluttualiani pisimasut tupinnarluinnartut oqaluttuarineqartarput, taakkuali qanga sumilu pisimanerat eqqaaneqarneq ajorput inuillu ilumut inuusimasut eqqartorneqarneq ajorlutik. Biibilimili allaatigineqarput oqaluttuarisaanermi pisimasorpassuit, atuartullu taakku pissutigalugit qularutigiunnaartarpaa taakkua ‘isumaviat tassaasoq sallusuissut’. — Tussiaat 119:160.
ASSERSUUT: Biibilimi allaatigineqarpoq ‘Babylonip kunngiata Nebukadnesarip Jojakini [Judæami kunngiusoq] Babylonimut aallarukkaa’. Kingusinnerusukkut “Evil-Merodakip Babylonip kunngiata ukioq tamanna kunnginngortup Jojakini Judap kunngia saammaappaa parnaarussivimmillu anisillugu”. Allaat Jojakini Babylonip kunngianit “inuussutissinneqartarpoq inuutilluni ullut tamaasa pisariaqakkaminik”. — 2 Kunngit 24:11, 15; 25:27-30.
ITSARNISARSIUUT PAASISAAT: Itsarnisarsiuut illukuni itsaq Babyloniusimasumiittuni nassaarisimavaat allakkat naalakkersuinermut tunngassutillit Nebukadnesari II-p naalakkersuinerata nalaaneersut. Taakkunani tigusat aallarussallu taamanikkut Babylonimi najugallit agguagarsiassaat allattorneqarsimapput. Atit eqqaaneqartut ilagaat “Jaukin [Jojakini]”, “nunami Jahudimi [Judami] kunngiusoq”, taassumalu inoqutai. Nebukadnesarilli kingoraartaa Evil-Merodaki ilumut inuusimava? Qummuattaasaq illoqarfiup Susap eqqaani nassaarineqarsimasoq kigartorlugu ima allaffigineqarsimavoq: “Amil-Mardukip [Evil-Merodakip] illussaarsua, Babylonimi kunngi, Babylonimi kunngip Nebukadnesarip ernera.”
ILLIT QANOQ ISUMAQARPIT? Atuakkanik illernartunik allanik oqaluttuarisaanermut tunngasutigut taama eqqoqqissaartigisoqarpa? Imaluunniit Biibili immikkorluinnaq ittuua?
[Qupp. 5-mi Issuagaq]
“Pisimasut qanga sumilu pisimanerannik paasissutissat allagatoqqani allani allassimasuninngarnit eqqorluarnerullutillu tutsuiginarnerupput.”—A SCIENTIFIC INVESTIGATION OF THE OLD TESTAMENT, ROBERT D. WILSON
[Qupp. 5-mi assiliartaq]
Allagatoqqani ukunani Judami kunngi Jojakini eqqaaneqarpoq
[Suminngaanneernera]
© bpk, Berlin/Vorderasiatisches Museum, SMB/Olaf M. Tessmer/Art Resource, NY