Jehovap ‘ullut tamaasa kissumiartarpaanga’
Peqqissusera allanngorartuaraluartoq artornarpallaarpasittaraluartorlu Ataatatta qilammiusup asasatta inuunera tamaat tapersersorsimavaanga. Ukiullu 20-t sinnerlugit pioneritut Jehovamut kiffartornera nuannaarutigingaarpara.
Qimerlunni qiteqqama sianiuteqarfia iluamik matusinnaannginnera pissutigalugu qiteqqakkut nakkartitsinermik nappaateqarlunga 1956-imi inunngorpunga, qiteqqamalu sianiuteqarfiatigut ajoquteqalernera pissutigalugu pitsorlulerlungalu peqqiilliungaalerpunga.
Inunngunngikkallarama angajoqqaakka aappariinnit ajoqersuiartortitaasunit, Jehovap Nalunaajaasuinut ilaasunit, Biibilimik atuaqqissaaqatigineqartalerput. Meeraaninni illoqarfitsinni Usakosimi Namibiamiittumi oqaluussisartut ikittunnguupput. Taamaattumik ataatsimiinnerni sammineqartussat ilaqutariittut eqqartortarpavut. Arfineq-marlunnik ukioqarlunga quussara timinnit anillatsissinnaaniassagakku naakkut quisarfilerneqarpunga. 14-inik ukioqarlunga noqartalerpunga. Ilinniarnertuunngorniarfiup ungasippallaarnera angajoqqaannillu immikkut paaqqutarineqarnissannik pisariaqartitsinera pissutigalugit atuarnera naammassisinnaanngilara.
Taamaakkaluartorli Jehovamut attaveqarnera nakussatsinniarlugu aalajangerpunga. Kristumiutut saqqummersittakkavut amerlanersaat oqaatsini ilitsoqqussanni, afrikaansimiusut, suli saqqummersinneqartalersimanngillat. Taamaattumik atuagaativut atuaqqissaarsinnaajumallugit tuluttut ilinnialerpunga. Oqaluussisartunngorpunga 19-inillu ukioqarlunga kuisillunga. Ukiut sisamat tulliuttut ingerlaneranni peqqiilliuuterpassuaqarlungalu nikallungarujussuartalerpunga. Tamatuma saniatigut illoqarfitsinni kikkut tamarmik imminnut ilisarisimammata inunnut qunusarama aallussilluarlunga oqaluusseqataanissannut tunuarsimaartarpunga.
20-t sinnerlugit ukioqarlunga Namibiamiit Sydafrikamut nuukkatta aatsaavissuaq ilagiinniittunik peqateqarsinnaanngorpunga. Nuanneqatissaqanngilaq! Maannali naakkut anarfilerneqartussanngorlunga pilatseqqittariaqarpunga.
Kingusinnerusukkut ilagiinnik nakkutilliisup pionerisut kiffartorneq pillugu oqalugiarneranut tusarnaarpunga. Oqaasii killinneqaatigingaarpakka. Peqqiilliortorujussuunera nalunngilluinnarpara, Jehovalli artornartorsiorninni tamani kissumiartareersimavaanga. Taamaattumik pionerinngorumallunga qinnuteqaateqarpunga. Peqqiilliornerali pissutigalugu utoqqaanertat qinnuteqaatinnik akuersinissaminnut nangaapput.
Taamaakkaluartorli oqaluussinermi sapinngisannik iliuuseqarniarlunga aalajangerpunga. Anaanannit allanillu ikiorneqarnikkut qaammatini arfinilinni pionerip nalunaaquttap-akunneri angumerisassai angumeraakka. Taama iliornikkut pionerinngorusunninnik aalajangiusimanninnera peqqiilliorneralu akornutigerusunnagu ersersippara. Qinnuteqaqqikkama akuerineqarpunga. 1988-imi septembarip aallaqqaataani pioneritut aallartippunga.
Pioneriuninni Jehovamit tapersersorneqartutut misigiuaannarpunga. Atukkakka isiginiarnagit soqutiginnilerlaanik sallusuissut pillugu ilinniartitsisarnera illersuutigalugulu nukittussutigalugulu anersaakkut ineriartussutigaara. Inuit arlallit tunniulluinnarniarneranni kuisinniarnerannilu ikiuisimanera nuannaarutigingaarpara.
Peqqissusera suli allanngorartuarpoq. Jehovalli ‘ullut tamaasa kissumiartarpaanga’. (Tuss 68:20) Inuunera atussaanerulersiinnarnagu nuannersisippaa!