Guutip paasivaatit

SOOQ QULAR­TOQAR­TOQ: Inup­pas­suit isumaqar­put Guutip inuit ajor­tiliin­nar­tut — mingut­tuutut taas­sumin­ngalu malugineqar­nis­samut naleq­qutin­ngitsutut — isigisarai. Kendra isumatsas­simangaar­toq Guutip piumasaqaataanik eq­qor­titseq­qis­saarsin­naan­ngin­nami pisuus­suteqar­tutut misigisimavoq. Oqar­poq tamatuma kingunerisaanik Guutimut qinusarun­naarluni.

GUUTIP OQAASIANI AJOQERSUU­TIGINEQAR­TOQ: Jehovap san­ngiis­sutitit kisiisa isigin­ngin­namigit qanor­piaq it­tuunerit paasivaa. Biibilimi ima al­las­simavoq: “Nalun­ngilaami pin­ngor­titaasugut, eq­qaamavaa pujualaasugut.” Aam­mami “iliorfigin­ngilaatigut ajor­tuliat­ta nalis­saan­nik”, peq­qis­simigaangat­tali nal­lit­tuil­luni isumak­keerfigisar­paatigut. — Tus­siaat 103:10, 14.

Daavi, Israelimi kun­ngiusoq al­laaserisat ataqatigiit mak­kua siul­lersaan­ni eq­qaaneqar­toq, as­sersuutigeriar­tigu. Guutimut ima qinuvoq: “Ilumiuutil­lungali isigaarma ... Misis­suif­figin­nga, Guuti, ilisimajul­lu uum­matiga.” (Tus­siaat 139:16, 23) Aap, Daavip up­peril­luin­nar­paa ajor­tulior­taraluarluni — ilaan­nik­kut ingasat­tumik — uum­matik­kut peq­qis­siminini Jehovap malugisaraa.

Inuit ilin­nik paasin­nis­sin­naaneran­nit Jehovap paasinerungaar­paatit. Biibilimi ima al­las­simavoq: ‘Inuit isimin­nut saq­qumisuin­naat isigisar­paat, Naalak­kal­li inuup uum­mataa isigisar­paa.’ (1 Samueli 16:7) Guutip nalun­ngilaa inun­nguuserisatit, peroriar­tor­nerit, avatangiisit kinaas­sutsil­lu pis­susilersor­nin­nut aalajangiisuusut. Ilungersorlutit inut­tut qanoq it­tuuniarsarinerit, aam­ma taman­na iluatsin­ngik­kaluaraangal­luun­niit, takusar­paa pingaar­til­lugulu.

Taavami Guutip ilin­nik paasin­nil­luin­nar­nini ilin­nut qanoq iluaqutaatigitit­tar­paa?