Kalaallit nunaanni Jehovap Nalunaajaasuinut tamanut
Asasavut qatanngutivut!
Nuannaarutigaarput aammattaaq decemberimi ilungersorlusi sulisimanissinnik nalunaarutisi nassiussinnaagatsigik. Inernerit ima isikkoqarput:
Oqal. Atuakk. Broch. Nal.ak. Pisart. Atuag. Pulaaqq. Atuaqq.
Dec. 126 224 141 3419 38 3969 1358 107
Agg. 10,8 13,0 4,5 0,5
Babylon Angisuup upperisarsioqatigiippassuisa nalliuttorsuatik Guutimut ataqqinaataajaasut nalliuttorsiutigalugit decemberimi ulappussimaqaat; taamaakkaluartorli naak tamanna Bibelip Naalagaaffik pillugu tusarliussaanik qiimmannartumik oqaluussinermut akornutaasimagaluartoq oqaluussisartut amerlanerpaaffiat qaangeqqissimavarsi, ukiumi oqaluussiffiusumi matumani aappassaarlusi. Nalunaarusiaq manna siorna decemberimi nalunaarusiamut naleqqiukkaanni sutigut tamatigut siuariartoqarsimavoq. 1988-imi decemberimut naleqqiullugu nalunaaquttap-akunneri amerlanerusut atorsimavasi, amerlanerusunik pulaaqqiisimallusi kiisalu Bibelimik atuaqqissaaqatiginninnerit amerlanerullutik. Nalunaaquttap-akunnerisa ilagiinni oqaluussisartut oqaluussinermut atorsimasaasa agguaqatigiissinnerat suli annertujuarsinnarpoq, tassa nalunaaquttap-akunneri 10,8-t, siorna decemberimit 13 procentimik annertunerullutik. Erseqqissaatissaalluartoq nuanneqisoq tassaavoq Bibelimik atuaqqissaaqatiginninnerit amerlassusiat suli annertusiartuinnarmat. Bibelimik atuaqqissaaqatiginninnerit 107-it nalunaarutigineqarsimapput, siornamut naleqqiullugit 16 procentimik amerlisimallutik novemberillu qaammataanut naleqqiullugit 11 procentimik amerlanerullutik. Ajoqersuganngortitsiniarnermut atatillugu pioneritut kiffartornerup pingaaruteqassusia erserpoq pionerit 31-t decemberimi 57-inik Bibelimik atuaqqissaaqatiginnissimammata, imaluunniit Bibelimik atuaqqissaaqatiginninnerit tamarmik 53 procentiinik.
Soorlu Naalagaaffimmik Kiffartuuteqarneq-mi februarimoortumi matuma muminganiittumi oqaatigineqartoq, qanoq ililluni annertunerusumik suliniuteqarsinnaanerup eqqarsaatiginissaanut aammalu atuagassianik upernaakkut siaruarterinissarsuarmut atatillugu anguniagaqarnissap aalajangiunnissaanut maannangaaq piffissanngoreerpoq. Piffissami pissanganartorujussuarmi inuuvugut. Ullut tamangajaasa silarsuarmi annertuunik allanngorneqartarpoq. Bibelimi siulittuutit eqquunnissaannik soorunami kristumiutut ilimasuppugut. Siulittuut, erinigeqisatsinnik eqquunnissaqartoq qaammatinilu kingullerni pisunut tulluuttumik oqaasertaqartoq, tassaavoq siulittuut Tásalûníkamiunut agdlagkat sujugdlît 5:3-mi siulittuutigineqartoq manna: ’Oqarpata: „Eqqissinarpoq, siooranartoqanngilaq!“ taava perlussap tassanngaannaq tikikkumaarpai.’ Uagut taarsuarmi inuunngilagut, silarsuarmili pisunik eqqumaffiginnilluta, aprilillu qaammataani Vagttårnet-imi Vågn op!-imilu „Eqqissineq“ sammineqassaaq. (1 Tás. 5:4) Atuagassiat taakku maannakkut pissusiusunik samminnittuupput, sapinngisamillu amerlasuut siaruarternissaat uagut suliassaraarput. Kissaatigisarpulli tassaaginnanngilaq atuagassianik siaruarterinissaq, aap, oqaluussinitta siunertaa tassaavoq sallusuissut pillugu inuit eqqorluartumik ilisimassuteqalersinnissaat, taamaattumillu atuagassianik siaruarterinerup siunertarisariaqarpaattaaq amerlanerusunik atuaqqissaaqateqalernissaq. Atuagassiat inniminnertakkassi aalajangersimasut saniatigut atuagassianik amerlanerusunik upernaakkut pisarneq akimorlugu oqaluussiniarfissami atugassassinnik inniminneereersimanngikkussi maanna taamaaliortariaqarpusi.
Ilissinnik suleqatiginninnerput nuannaarutigeqaarput, kristumiutullu asannittumik inuulluaqqungaarlusi.
Qatanngutisi
Vagttårnets Bibel- og Traktatselskab
Oqaluussinermut tunngasumik ataatsimiinnermi tulliuttumi saqqummiunneqassaaq
PS. Ilagiit nalunaarutaannik telefaxikkut nassiussinissarsi kissaatigigussiuk normorput aajuna: 9 59 44 34 50. Telefaxikkut nassiukkussigik allakkerisarfikkut nassiunnissaat pisariaqassanngilaq.