Kalaallit nunaanni Jehovap Nalunaajaasuinut tamanut
Asasavut qatanngutivut!
Matumuuna januarimi kiffartornissinnut nalunaarusiaq nassiupparput. Inernerit ima isikkoqarput:
Oqal. Atuakk. Broch. Nal.ak. Pisart. Atuag. Pulaaqq. Atuaqq.
Jan. 121 257 165 3426 27 3566 1574 114
Agg. 12,4 14,5 5,8 0,6
Nuannaarutissarpassuaqarpoq. Amerlasuut oqaluussinermut peqataasimapput, naammassisimasasilu nersualaagassaapput. Naak silarluttaraluartoq nalunaaquttap-akunneri ilagiinni oqaluussisartut atorsimasaat 12,4-pput siorna januarimi 11,0-simallutik. Aammattaaq Bibelimik atuaqqissaaqatiginnittarnermi siuariarsimanersi qiimmaallannarpoq. Tusagassamik nuannersumik Guutip naalagaaffianut tunngasumik oqaluussissutiginninnerup siunertaanik eqqaamanninnissatsinnik Peqatigiiffiup qaammatini kingulliunerusuni kajumissaartarsimavaatigut: AJOQERSUGANNGORTITSINIARNEQ. Taamaattumik ilungersornersi inerititaqarmat qiimmaallannaqaaq. Bibelimik atuaqqissaaqatiginninnerit 114-it januarimi nalunaarutigineqarsimapput, tassa siorna januarimi nalunaarutigineqartunit procentinik 25-nik amerlanerullutik. Tamanna angusimasap annerpaaffigisaanik qaangeeqqinneruvoq aammalu qaammatip siuliani angusimasamit annerungaatsiarluni, tassa taamani Bibelimik atuaqqissaaqatiginninnerit 107-it nalunaarutigisimagassigik.
Piffissalli annertunerusup ingerlanerani nalunaarutigisarsimasasi qimerlooraanni takuneqarsinnaavoq Bibelimik atuaqqissaaqatiginninnerit amerlassusaat nikerartorujussuusoq. 59-it 114-illu akornanni nikerarput. Soorunami nalunngilarput pissutsit immikkut ittut oqaluussinissinni atortakkasi pulaaqqiinermik Bibelimillu atuaqqissaaqatiginninnermik sulinissinnut akornusersuutaasarsinnaanerat, taamaakkaluartorli kajumissaarumavatsigit Bibelimik atuaqqissaaqatiginnittarnissi akuttoqatigiinnerusumik pisarnissaat sapinngisassinnik suliniutigeqqullugu. Matîuse 4:4-mi Jesusip oqaasii malugikkit: ’Timiusaannaq inuup inuussutiginngilaa, oqaaserli sunaluunniit Guutip qarnanit anisoq inuussutigisaraa.’ Soorlu akuttoqatigiissumik nerisarnerput timikkut peqqissuunissatsinnut pingaaruteqartorujussuusoq taamattaaq anersaakkut nerisarfeqarluarnissarput anersaakkut peqqissuunissatsinnut pingaaruteqartorujussuuvoq. Taamaattumik soqutiginnittut sapinngisassinnik ikiorniarsigik akuttoqatigiissumik ’oqaatsinik sunilluunniit Guutip qarnanit anisunik’ nerisarsinnaaqqullugit. Qanoq ilillusi? Bibelimik atuaqqissaaqatigiittarnissi sapaatit-akuneri tamaasa pisarnissaata isumagineratigut. Atuaqqissaaqatiginiakkat pisinnaanngikkaangat sapaatip-akunnerata ingerlanerani piffissamik allamik isumaqatigiissuteqarfiginasuarnissaa pitsaassaaq. Aammattaaq atuaqqissaaqatigisartakkap oqaluussisartunik allanik piaartumik ilisarisimannilernissaa iluaqutaassaaq, taamaalilluni akornuserneqariataarnermi oqaluussisartumit allamit atuaqqissaaqatigineqartarsinnaaqqullugu. Siunnersuutit taama ittut eqqumaffigigutsigik soqutiginnittup akuttoqatigiissumik atuaqqissaaqatigineqartalerneranik kinguneqaannassanngilaq, aammattaarli Guutip oqaasiata atuaqqissaartarnissaata pingaaruteqassusianik ersarissumik erseqqissaanerussaaq. Aammattaaq atuaqqissaartarfeqarluarnerup, kristumiunut pisariaqaqisup, ineriartortinnissaanut iluaqutaassaaq.
Qatanngut Joan Lauritsenip siusippallaamik toquneranik nalunaarut aliatsaatigeqaarput. Kalaallit Nunaanni Naalagaaffiup sulineranik siuarsaaniarlutik uinilu ukiorpassuarni annertuumik naleqangaartumillu kiffartuuteqarsimapput. Qatanngut Kristen Lauritsen pissutsini atugaani misiginneqatigaarput, Jehovalu, Guuti tamanik tuppallersaasoq, qinnuigalugu tapersersoqqullugu ikioqqullugulu. — 2 Kor. 1:3.
Nalunaarutigisinnaavarput nutserinermik sulinermik siulersuisussatut qatanngut Bo Christiansen toqqarneqarsimammat.
Jehova qinnuigaarput kiffartornersi ingerlajuartoq taassuminngalu unnersiutiginninneq annertusisinniarlugu qaammatini aggersuni suliniutiginiagarpassuasi pilluaqqoqqullugit. Asannittumik inuulluaritsi.
Qatanngutisi
Vagttårnets Bibel- og Traktatselskab
Oqaluussinermut tunngasumik ataatsimiinnermi tulliuttumi saqqummiunneqassaaq.