Kalaallit nunaanni Jehovap Nalunaajaasuinut tamanut
Asasavut qatanngutivut!
Aprilimi suliniarnissarsuaq maanna qanilleqaaq, pissangaqalutalu suliniarnersuaq immikkut ittussaq utaqqivarput. Qularnanngitsumik annertuumik nalunaajaaneqarumaarpoq, Kalaallit-Nunaanni Danmarkimiluinnaanngitsoq, nunarsuarmili tamarmi. Februari pillugu nalunaarusiat maanna katiterlugit kisippavut, imalu isikkoqarput:
Oqal. Atuakk. Broch. Nal.ak. Pisart. Atuag. Pulaaqq. Atuaqq.
Feb. 114 137 60 3324 7 2293 1410 131
Agg. 13,9 11,5 6,5 0,8
Nalunaarusiaq tamanna qiimmaallannarpoq tusagassaq nuannersoq oqaluussissutiginiarlugu ilungersortumik suliniarnissinnik takutitsisoq. Ingammik Bibelimik ilinniaqqissaartitsinerit taama amerlatigimmata nalunaaquttap-akunnerisalu ilagiinni oqaluussisartut angusimasaasa agguaqatigiinnerat qutsittuaannarmat, tassa nalunaaquttap-akunneri 13,9, nuanneqaaq. Suliniarnissarsuaq neriunarluarpoq.
Qaammammi tamatumani ilanngutassiaq „Atorfissaqartitaq neqeroorutigiuk“ nutsertissimavarput, tassanilu pulaarfigisap atorfissaqartitaanik eqqumaffiginninnissap atuakkallu atuagassialluunniit soqutiginninneranik siuarsaasinnaasup atornissaata pingaaruteqassusiat ingammik erseqqissarneqarpoq. Sulili ataaseq sianigilluartariaqarparsi: Kalaallit-Nunaanni atorfissaqartitaq neqeroorutigissagaanni aammattaaq atuakkat atuagaaqqallu naleqqulluartut kalaallisuut neqeroorutigisariaqarput.
Naalagaaffimmik Kiffartuuteqarneq-mi qaammatit tamaasa neqeroorutigisassaq aalajangersimasuusaraluarpoq, qularnanngivissumilli oqaluussiffinni atuagassat assigiinngitsut neqeroorutigineqarnissaat pingaartorujussuuvoq. Aalisartoq eqqarsaatigeriaruk. Tamatigut neqitaq imaluunniit sakkoq ataasiinnaq atorneq ajorpaa, assigiinngitsulli misiliisarpoq pisaqarserluni. Uagut inunnik aalisartuuvugut taamaattumillu assigiinngitsunik periaaseqarluta sulisariaqarpugut. (Mat. 4:19) Siullerpaamilli eqqarsaatigisariaqarparsi atuagaq atuagassiaararluunniit kalaallisooq aalajangersimasoq pulaakkamut naleqqulluartuunersoq.
Tamatta nalunngilarput inuup nammineq oqaatsini atorlugit atuagassaqarnissaq ilinniaqqissaarnissarlu qanoq pingaaruteqartigisoq. Assersuutigalugu, tuluttut pikkorissorsuunngikkaluarluni New World Translation qinerlerfissialik imaluunniit Insight on the Scriptures pissarsiffigineqarsinnaagaluartut, taamaattoq nammineq oqaatsini atorlugit atuarneq pissarsiffiunerpaasarpoq annikitsualuillu tamaasa ilanngullugit paasinarnerusarluni. Taamaattumik Peqatigiiffik ilungersorluni atuakkat, atuagassiat atuagassiaaqqallu sapinngisamik oqaatsinut amerlasuunut nutsertinniartarpai.
Allakkatsigut matumuuna kajumissaarniarpassi ’atorfissaqartitaq neqeroorutigeqqullugu’ atuakkat atuagassiaaqqallu kalaallisuut sapinngisassinnik atornissaannik, oqaluussiffigisat atuagassat assigiinngitsut atorlugit peqqissaartumik oqaluussiffigineqarnissaat isumagiitigalugu. Taamaalillusi ’inunnik aalisartuusinnaavusi’ angusaqarluartut inunnut ’savatut paarsisoqanngitsutut paarinerlugaallutik isumakkiigaasunut’ asannittut. — Mat. 9:36.
Kalaallit-Nunaanni eqqaaniaalluni nalliuttorsiornissamut najuuttussat qassiussanersut qilanaararlugu, asannittumik inuulluaqquatsigit.
Qatanngutisi
Vagttårnets Bibel- og Traktatselskab
Oqaluussinermut tunngasumik ataatsimiinnermi tulliuttumi saqqummiunneqassaaq.