Kalaallit nunaanni Jehovap Nalunaajaasuinut tamanut
Asasavut qatanngutivut!
Aprilimi suliniarnissarsuaq maanna ingerlalluarpoq, aap, allakkat uku tigugussigik qaangiutereersimassaaq. Ulapikkaanni piffissaq ingerlapallattarpoq. Martsimi nalunaarusiarsi maanna suliarisimavarput angusimasassinnillu nalunaarfigisinnaagassi nuannaarutigalugu. Nalunaarusiarsi imaappoq:
Oqal. Atuakk. Broch. Nal.ak. Pisart. Atuag. Pulaaqq. Atuaqq.
Marts 119 127 46 3668 35 2379 1565 134
Agg. 13,7 8,4 6,2 0,8
Nalunaarusiaq tamannattaaq kajumissinarpoq nuanneqalunilu. Oqaluussisartut tamarmik 29 procentii piffissaq annertooq atorlugu oqaluussisarnermi arlaatigut peqataasimapput, nersornartumillu kiffartuussineq naammassineqarsimavoq. Bibelimik ilinniaqqissaartitat amerliartuinnarput, Bibelimillu ilinniaqqissaartitasi 134-t tassaapput 20 procentimik siuariarneq siorna martsip qaammataanut naleqqiullugit. Martsip 31-anni eqqaaniaanermi 253-t najuussimammata aamma qiimmaallannarpoq, angusimasallu annerpaaffiat qaangerpaat.
Maani Danmarkimi sapaatit-akunnerini kingullerni naasorissaasut narsaatini sulillutik ulapeqisut takusimavavut. Ullaaralaannguamiit unnussuarmut, aamma arfininngornikkut sapaatikkullu, sulisarsimapput. Taarsinerani allaat narsaatini maskiinaasa qullii takuneqarsinnaasarput. Nalimmatserineqarsimavoq, siaruarterineqarluni manissaaneqarlunilu, aasaru katersuinissamut tunngavissaqarlualerluni. Naalli naasorissaasup siaruarterinini naammassisimagaluaraa, ima paasisariaqanngilaq qasuersersinnaalersoq katersuiffissaq utaqqiinnarlugu. Aap, narsaatini nakkutigalugillu paariuartariaqarpai. Katersugassat isumannaarneqarnissaat iserterivimmullu eqqunneqarnissaat tikivillugu ulapiffiussaaq.
Kristumiutut kiffartuussinerput aamma taamaappoq. Uaguttaaq „narsaateqarpugut“ siaruarteriffigisassatsinnik, paarisassatsinnik, isumagisassatsinnik kiisalu katersuiffissatsinnik. Nalunaarusianit manna tikillugu tigusimasatsinnit paasineqarsinnaavoq aprilimi „narsaammi“ annertuumik sulisimasusi. Paasivarput ullormi kiffartuussivimmi immikkut ittumi aprilip 6-ani amerlasuut peqataasimasut sivisuumillu ingerlaannarsimallutik. Ilungersuussineq taama ittoq tusarlugu nuanneqaaq, tamatumami takutimmagu upernaaq manna „narsaat“ ilumut „assallatserineqarsimasoq“, „nalimmatserineqarluni“ „siaruarteriffigineqarsimallunilu“. Soorunami naajartortitsisoq tassaavoq Jehova, uagulli imerterineq, aamma „timmissat“ sulerululluta siaruarsimasatsinnik piiaannginnissaat akisussaafigaavut. Tamakku Jehovamik pallorfiginnittut nutaat katersorneqarnissaannut pisariaqarput. — 1 Kor. 3:6, 7; Mat. 13:3, 4, 18, 19.
Taamaattumik sapinngisassinnik inuit soqutiginninnerat ilungersorlusi kiffartornissinni naammattoorsimasarsi ineriartortissiuk. Atuakkanik, atuagassianik, atuagassiaaqqanik naqitigaaqqanillu tunineqarsimasut tamaasa pulaaqqinniarsigik. Atuakkanik atuagassianilluunniit perusunngikkaluarlugit soqutiginnipaluttunik peqarpa? Pulaaqqinniarsigik! Aqqusinermi oqaluussinermik siuaallatsinnermut tunngasumik oqaloqateqarluarsimanerpisi? Pulaarniarsigik! Nammineq taakkua soqutiginninnerata ineriartortinnissaanut periarfissaqanngikkussi ilagiinni allat, assersuutigalugu pionerit imaluunniit majimi ikiorti-pionerinngortussat taakkua najugaannik paasitinniarsigik. Naasorissaasutut katersugassaqarluarumalluni qasusuilluni tamaviaartartutut iliuuseqarniaritsi.
Jehovap maannakkut katersuinissamik suliarititaani anersaakkut ittumi ilissinnik suleqatiginninnerput nuannaarutigalugu, asannittumik inuulluaqquatsigit. — Mat. 9:37, 38.
Qatanngutisi
Vagttårnets Bibel- og Traktatselskab
Oqaluussinermut tunngasumik ataatsimiinnermi tulliuttumi saqqummiunneqassaaq.