Tamakkiisumik uummateqarlutit oqaluussisarit
Imm. 3: Allat siumukarnissaannik ikiukkit
1 Paulusip Timoteusillu akornanni attaveqatigiinneq qanoq ililluni allat oqaluussinissamut ilinniartinnissaannut maligassaalluartutut eqqartorneqarajuttarpoq. (1 Kor. 4:17) Paulusip Timoteus peqqusimavaa imminut ilinniartitsissutigineqarsimasut inunnut allanut ingerlateqqeqqullugit. (2 Tim. 2:1, 2) Periaaserlu tamanna ullumikkut ilagiinni malikkutsigu pitsaasumik kinguneqassaaq.
2 Allat ilinniartikkit: Ilagiinni tamani nutaaqarlunilu misilittagakitsoqarlunilu sanngiitsunik oqaluussisartoqarnera eqqarsaatigigutsigu ilinniartitsinissamik pisariaqartitsineq ersarippoq. Taakkua amerlanersaasa oqaluussisartunit misilittagaqarluartunit ilinniartinneqarnissartik qularnanngivissumik iluaqutigissavaat. Qatanngutip arnap qaammammut taamaallaat nalunaaquttap akunneri ataaseq marlulluunniit oqaluussisarsimagaluartup oqaluussisartumit misilittagaqarluartumit ikiorneqarami sunniisinnaassuseqartumik oqaluussinissani ilikkarsimavaa. Oqaluussinermut peqataanissaminut kajumissuseqarpiannginnini katappaa, maannalu pioneriuvoq pikkorissoq. Kingumut qiviaraangami oqartarpoq: „Pisariaqartitaviga tassaasimavoq qanoq oqaasissama ilikkarnissaat, tamatumalu kingorna oqaluussineq nuannarilerpara.“
3 Illit oqaluussisartuuguit misilittagaqarluartoq, taava qanoq ilillutit allat siumukarnissaannik ikiorsinnaavigit? Siullermik atuakkamik atuaqqissaaqatigiinnermi aqutsisorsi aperisinnaavat kia suleqatiginissaa siunnersuutigisinnaaneraa. Aappassaanik siunnersuutit ataani taaneqartut malinnissaat eqqumaffigilluinnartariaqarpat.
4 Piareersarluartarit: Aalajangersimasumik oqaluussiartoqatigisartagaqarneq, sapinngisamik sapaatip akunneranut ataasiarluni, iluaqutaasarpoq. Ikiorniakkat immaqa aallaqqaammut annilaangassaaq imminullu tatigivallaarnani, qularutigissanngilalli aalajangersimasumik oqaluussiartoqateqartarnini pisariaqaraangallu annertoqquserneqartarnini qujamasuutigissagai. (Nal. oq. 4:9) Atuagassianik siaruarterinissaanik ilinniartinnissaannaa naammagissanngilat, aammali ikioruk oqaluussinermini Bibelimik atuisinnaalernissaanik, oqaluussiartorfissinnilu ajornanngippat isumannaatsuullunilu, kisimi oqaluussiartortalernissaa anguniagariuk.
5 Siumukariartortumik ilinniartitsinivit nangissutigisaatut qanoq ilillusi soqutiginninnermik ersersitsisut pulaaqqittarnissaat oqaloqatigiissutigisassagussiuk iluaqutaassaaq. Oqaluussisartup misilittagakinnerusup piareersarnissaanik ikiornissaa isumagiuk, pulaaqqiissagaangallu ilagisaruk. Aammattaaq illit pulaaqqiininni ilagisaruk qanorlu aallarteriarnissamik ilitsersuuguk. Bibelimik atuaqqissaaqatitaarussi atuaqqissaaqatigiinnermillu siulersuinissani merseripajaarpagu merseriunnaarnissaata tungaanut atuaqqissaaqatigiinneq arlaqanngitsoriarlutit siulersorsinnaavat.
6 Piffissaq inuuffigisarput ilungersornartoq eqqarsaatigalugu pisariaqarpoq tamatta oqaluussisartutut pikkorinnerulernissatta ilungersuutigalugu anguniarnissaa. Oqaluussinermut sungiussilluarsimasut ikiuinissaat pisariaqartinneqarpoq. Ikiortariaqartoq ikiorsinnaagukku piffissap ingerlanerani taannattaaq ’inunnut ajoqersuilluarsinnaalissaaq’. — 2 Tim. 2:2. (km 9/91 Vær helhjertet . . . 3)