Pulaaqqiiguit qanoq oqassavit?
1 Oqaluussinerput kinguneqarluarsinnaaqqullugu piareersartariaqarpugut, soqutiginnippasittut pulaaqqikkaangatsigik soqutiginninnerulersisinnaaqqullugit oqaloqatigiinnerlu nangissinnaaqqullugu. Qanoq ililluta taamaaliorsinnaavugut?
2 Kristumiut ilumoortut inunnut allanut soqutiginnittuummata, immaqa illit pulaarfigisap kingullermik oqaaserisimasaasa ilaat innersuussutigeqqaarsinnaavat.
Pinerluttuliornernik isumakuluuteqartoq ima oqarfigisinnaavat:
◼ „Kingullermik oqaloqatigiikkatta eqqartorpat inatsisaatsuliornerit amerliartuinnarnera isumakuluutigalugu. Isumaqarpit ajornartorsiut tamanna aaqqinneqarsinnaassasoq politiit amerlineruppata?“
Silarsuarmi pissutsit ungasinngitsukkut ineriartorsimanerat pillugit annilaangasoq ima oqarfigisinnaavat:
◼ „Kingullermik oqaloqatigiikkatta eqqartorpat silarsuarmi eqqissinermik amigaateqarnera ernumassutigalugu. Isumaqarpit silarsuarmi pisortaasut silarsuarmik aqqissuussaq nutaaq eqqartugaaqisoq pilersissinnaassagaat?“
Allat namminissarsiornerat pissutigalugu isumakuluttoq ima oqarfigisinnaavat:
◼ Kingullermik oqaloqatigiikkatta uparuarpat inuit amerlanertigut piumatuusut. Qanoq isumaqarpit Guutip inuit piumatuut isumaqarfigigai? [Pulaarfigisaq oqaaseqartiguk.] Evfisumiunut agdlagkat 5:5-imi Bibelip tamatumunnga akissutaa atuarsinnaavarput.“
3 Aallarniutit allat pulaaqqiinermi sunniuteqarluartartut:
◼ „Kingullermik oqaloqatigiinnerput nuannaareqaara, taamaattumillu misissorsimavara qanoq ililluni Jehovap aaqqinniassagaa . . . [Ajornartorsiut oqaloqatigiissutigisimasarsi eqqartoruk]. Malugeriaruk uani qanoq allassimasoqartoq: [Allassimaffimmik takutiguk].“
◼ „Malugaara oqaravit inuiaat naalagaaffik pitsaanerusoq pisariaqartikkaat.“
◼ „Kingullermik aperivutit Guutip upperisarsiornerit tamaasa akuerinerai. Apeqqut tamanna soqutiginartorujussuuvoq, allassimaffiillu eqqarsaatissarsinartut nanisimasakka ilinnut takutikkumallugit.“
◼ „Eqqarsaatigisimaqaara ersinngitsup piumasaa pillugu oqaatigisat.“
◼ „Kingullermik oqaloqatigiissutigisimasarput eqqarsaatigisimavara, atuakkamilu matumani, Inuk inuit inuusimasut pingaarnerpaartaat-mi, qularnanngitsumik soqutiginartitannik takutikkumavakkit. [Pulaarfigisaq atuakkami qinikkanik takutiguk.]“
Aallarniutit tamakkua takutippaat oqaloqatigiissimanerput nuannaarutigigipput pulaarfigisarlu oqaloqatigeeqqikkusullutigu.
4 Pulaaqqiineq sioqqullugu oqaasissatit eqqarsaatigisakkit. Saqqummiusseriaatsit pulaarfigisannut tamanut immikkut naleqquttunngorsartakkit.
5 Naak pulaarfigisaq ulapikkaluartoq, sunniuteqarluartumik pulaalaarsinnaavarput, ima oqarfigalugu:
◼ „Nalunngilara piffissaqarpianngitsutit, unali eqqarsaatigisinnaavat naammassisariaqakkatit suliaritillugit. [Matîuse 5:3 atuariaruk.]“
Imalunniiit ima oqarsinnaavutit:
◼ „Allassimaffiit pingasut allattorsimavakka ilinnik oqaloqatigiissutigerusutakka. Pisinnaavatit, taavalu pulaaqqikkuma immaqa sivikitsumik oqaloqatigiissutigisinnaassavavut.“
6 Pinngitsoortariaqakkat: Apeqqutit naaggaarneqarsinnaasut imaluunniit pulaarfigisamik peqqusiileqisitsisinnaasut amerlanertigut kinguneqarluartanngillat. Assersuutigalugu, ima aperinerit: „Kingullermik uannit pisatit atuarpigit?“ „Apeqqutissaqarpit?“ „Eqqaamasinnaavinga?“ aamma: „Pulaarpakkit aperiniarlutit suli Guutip nunarsuarmik siunertaa oqaloqatigiissutigerusunnerit.“
7 Siusinaarluta piareersartarutta soqutiginnippasittut pulaaqqinnissaannut ikiornissaannullu piumassuseqarluartassaagut. (km 92/1 Hvad vil du sige . . .?)