Apeqquteqarfik

◼ Angajoqqaat kristumiuusut meeraat suli oqaluussisartunngorsimanngikkunik kuisimanngitsut qanoq annertutigisumik oqaluussinermut peqataasinnaappat?

Angajoqqaat kristumiuusut meeqqamik inersimalluarlutik ilungersorlutillu Jehovamut kiffartunngornissaat kissaatigaat. (1 Sam. 2:18, 26; Lúk. 2:40) Meeqqat kristumiut ilaqutariinniittut suli inuusuttuaraatillutik Biibili tunngavigalugu upperisartik ersarissumik illersorsinnaasariaqarpaat. Meeqqat mikisuunerminnit angajoqqaatik ilagalugit oqaluussinermut peqataasarunik anersaakkut ineriartorluassapput. Kisianni meeqqat kiffartuussineq nuannaarutigissagunikku, oqaluussisunngornissaq kissaatigissagunikku aamma Naalagaaffimmik oqaluussineq peqataaffigiuassagunikku, ilaasarnertik uummatikkut kissaatigisariaqarpaat. Tamanna anguniarlugu angajoqqaat ajoqersuilluartariaqarput. (1 Tim. 4:6; 2 Tim. 2:15) Angajoqqaat kissaatigippassuk oqaluussisartut allat ilaannikkut ikiuisinnaapput. — Takuuk om, qup. 96, 97.

Meeqqat perorsagaalluartut illumiit illumut oqaluussinermi angajoqqaatik ilagigaangamikkik, qanoq iliornissartik ilinniartarpaat. Aatsaalli oqaluussisartunngussapput kuisimanngitsut oqaluussinermi piginnaassuseqalerunik. Angajoqqaat kristumiuusut namminneq aalajangissavaat angalaaqatigiinnermi meeqqatik qanoq annertutigisumik oqaluusseqataassanersut. Meeqqalli kuisissimanatik oqaluussisartunngorsimanngitsut namminneq pulaarfigisaqartassanngillat meeqqallu allat oqaluusseqatigisassanagit. Angajoqqaat meeqqatik oqaluussinermut piareersaartissinnaavaat assigiinngitsutigullu peqataatissinnaallugit, soorlu allassimaffimmik atuartillugit, naqitigaaqqamik atuagassiamilluunniit neqeroortillugit imaluunniit naqitikkani assiliartamik takutitsitillugit. Meeraq alliartortilluni immaqa oqaloqatigiinnerni peqataanerulersinnaavoq.

Meeqqat pitsaasumik ilinniartinneqarunik oqaluussinerup pingaaruteqarnera paasissavaat, angajoqqaamik unnersuussutaat maleruarlugit pissuserissaartarlutillu. Katersuunerni angajoqqaat meeqqatik kuisissimanatik oqaluussisartunngorsimanngitsut imminiiginnassanngilaat ilimagalugu allat isumagissagaat. Angajoqqaat isumassuilluartut nalunngilaat meeqqamik nakkutiginissaat namminneq akisussaaffigalugu. Soorunalimi ilagiinni oqaluussisartut allat akisussaaffimmik tigumminnissinnaasut meeqqat ilinniartitaanerannik peqataasinnaapput, meeqqat oqaluussinikkut Jehovamik kiffartuussineq ilumoortumik soqutigippassuk. (km 92/10 Spørgsmålskassen)