Qanoq ililluni Biibilimik atuaqqissaartitsisariaqartoq
1 Qanoq ililluni kinguneqarluartumik Biibilimik atuaqqissaartitsisoqarsinnaava? Najoqqutassiat tunngaviunerusut suut maleruarneqartariaqarpat? Atuaqqissaakkami allassimaffiit qanoq oqaloqatigiissutigineqarsinnaappat? Kia immikkoortut atuffassissutigissavai? Ilinniartup sallusuissut pigiliutissappagu atuaqqissaarnerup saniatigut suna pisariaqarpa? Nakkarfissiallu suut pinngitsoortinneqartariaqarpat?
2 Qanoq ililluni atuaqqissaartitsisariaqartoq: Amerlanertigut atuaqqissaaqatigiinneq ilagiit Napasuliaq Alapernaarsuiffimmik atuakkamillu atuaqqissaaqatigiinnerattut ingerlatinneqartarpoq. Siullermik immikkoortoq atuffassissutigineqassaaq. Taava aqutsisup tamatumunnga apeqqut atuassavaa ilinniartumullu akitillugu. Ilinniartoq nalornippat aqutsisup apeqqutissat allat atorlugit ilinniartoq eqqortumik isummernissaanut ikiortariaqarpaa.
3 Allassimaffiit qanoq immikkoortup imarisaanut naleqqulluartuunersut oqaloqatigiissutigiuk. Ilinniartoq takutinniaruk qanoq ililluni paasisinnaagaa allassimaffiit suut issuarneqarsimanersut eqqarsalersinniarlugulu paaseqqullugu qanoq immikkoortumi eqqarsaat tassuuna tapersersorneqartoq. Allassimaffiit issuagaanngitsut innersuussutigineqarpata Biibilimi quppernissaat pitsaassaaq, takivallaanngippata. Ilinniartoq tamakkuninnga atuartiguk oqaaseqarfigeqqullugulu qanoq immikkoortumi eqqartorneqartoq tassani nassuiarneqartoq.
4 Ilinniartoq ikioruk sallusuissut pigiliuteqqullugu: Ilinniartoq atuaqqissaaqatigiinnissamut piareersarluaqqujuk. Paasitinniaruk ilinniarniaraanni atuartariaqartoq. Amerlanerusut atuartarunigit eqqarsaatigisarlugillu pitsaanerussaaq. Atuaqqissaartitsisut ilaasa ilinniartoq immikkoortunik tamanik atuartittarpaat. Allat paarlakaajaallutik atuartarput. Nalilisinnaassuseqartariaqarputit ilinniartullu anersaakkut siumukarnissaa eqqarsaatigisarlugu.
5 Ilinniartoq eqqarsaatikkuinnaq ilisimasaqartikkukku paasissutissalli atorluarsinnaassusiat takutinnagu, ilinniartoq immaqa ilisimasaqalissagaluarpoq, ilinniarsimasanili upperissanerpai? Sallusuissut pigiliutissaguniuk paasisariaqarpaa nammineq qanoq ililluni ilinniarsimasani atorsinnaallugit. Ilinniarsimasani qanoq isumaqarfigai? Atorsinnnaavai? Apeqqutit tamakku ikiortigalugit ilinniartup uummataa killissinnaavat.
6 Nakkarfissiat pinngitsoortikkit: Atuaqqissaartitsigaanni nakkarfissiaqartarpoq pinngitsoortinneqartariaqartunik. Atuaqqissaaqatigiissutigineqartut saniatigut allat eqqartorneqalerpata tamakkua atuaqqissaarnerup kingorna kingusinnerusukkulluunniit samminissaat pitsaanerusarpoq. Aamma ilinniartoq nammineq oqaatsini atorlugit akisariaqarpoq atuakkamit akissutaa atuaannarnagu. Aqutsisup taava malugisinnaavaa ilinniartup ilinniarsimasani paasisimanerai.
7 Minnerpaamik ataatsimik atuaqqissaaqateqarnissaq anguniagarisinnaavarput. Tamanna artornassanngilaq Jehova tatigigutsigu ilagiillu Napasuliaq Alapernaarsuiffimmik atuakkamillu atuaqqissaaqatigiinnermi periaasiat malikkutsigu. Allat sallusuissummik ilinniartissagaanni ajoqersuganngortissagaannilu Biibilimik atuaqqissaaqatigiinneq tassaassaaq periaaseq sunniuteqarluarnerpaaq. Taamaaliorluta Jesusip Matîuse 28:19, 20-mi peqqussutaa maleruaratsigu nuannaarneq misigissavarput. (km 93/10 Hvordan man leder bibelstudier)