Maanna piffissanngorpoq
1 Apustilip Paulusip Korinthimiunut allakkami aappaanni eqqaasippai uppeqatiminnut Jerusalemimiittunut ajornartoortunut ikiuiniarnermik nersornartumik aallarniisimanerannik. Ukiorli ataaseq ingerlareersimavoq, aallarnersimasartillu suli naammassisimanngilaat. Taamaattumik ima kajumissaarpai: „Inerniarsiuk; pilersaarutersi aallarnernialerassiuk kajumissutsissitut kajumitsigalusi naammassiniarsiuk.“ — 2 Korintumiut 8:11, The New English Bible.
2 Qularnanngitsumik tamatta anguniagaqarneq misilereersimavarput. Immaqa aalajangersimavugut oqaluussinerulerniarluta, apriilimi oktoberimilu ikiorti-pioneeriuniarluta, qatanngutivut ilisarisimanerulerniarlugit, Biibili ullut tamaasa atuarniarlugu, kiffartuussinermut immikkut pisinnaatitaaffiusumut piukkunnarsarniarluta sanngiissutittaluunniit arlaat ajugaaffiginiarlugu. Naak immaqa aallartilluaraluarluta sukataarunnaariartuaarsimavugut anguniagarpullu angunngitsoorsimallugu. Ullullu sukkaqimmata kiisa sapaatit-akunneri, qaammatit immaqalu allaat ukiut qaangiussupallattarput imatorsuaq siuariaateqarsimanata. Aallarnikkatsinnik naammassinninnissamik kajumissaarut maleruartuugutsigu iluaqutigisimassanngikkaluarnerparput?
3 Anguniakkavut qanoq ililluta angusinnaagivut: Aalajangerneq allaavoq, aalajangernerullu piviusunngortinnissaa aamma allarluinnaavoq. Nangaanerup siumukarnissaagaluit tamaasa akornusersimaartarpai. Qanoq iliornissarput aalajangiuttariaqarparput aalajangersimallutalu piviusunngortinniartariaqarlugu. Pilersaarusiorluarneq pingaaruteqarpoq. Aamma piffissamik pisariaqartumik immikkoortitsinissaq pisariaqarpoq, taavalu piffissap tamatuma siunertarisatsinnut atornissaa isumagisariaqarpoq. Aamma piffissarititaliisariaqarpugut, tamatumalu eqqortinnissaanut imminut naalakkersinnaanermik ersersitsisariaqarluta.
4 Tatineqartutut misigiallakkaangatta oqapallattarpugut: ’Kingorna naammassiumaarpara.’ Aqaguli qanoq pisoqarnissaa naluarput. Ussatit 27:1-imi ima allassimavoq: „Usorsitsaarniaqinak aqagussaq eqqarsaatigalugu, naluammi ulloq taanna sumik nassataqarumaarnersoq.“ Siunissaq eqqarsaatigalugu imminut qulanngippallaarnissaq ajoqersukkap Jakobip mianersoqqussutigisimavaa: ’Ilissi aqagussamik siuneqanngilasi; ajunngitsuliorneq nalunagu ajunngitsuliunngitsup ajortulissutigaa.’ — Jâko 4:13-17.
5 Ulluinnarni akornutissarpassuit allallu uagutsinnik piumaffiginninneri anguniakkatsinnik puiuisitseqqajaasinnaapput. Anguniakkat eqqarsaatigiuassagaanni eqqumalluni iliuuseqartuarnissaq pisariaqarpoq. Anguniakkatta qinnutitsinni eqqaasarnissaat iluaqutigissavarput. Aamma iluaqutaassaaq ikinngutivut qaninnerusut qinnuigissallugit anguniakkatsinnik eqqaasittaqqulluta kajumissaartaqqullutalu. Qaammatisiutinni allattarsinnaavutit imminut eqqaasillutit siuariaateqarsimanerlutit. Tamatta immikkut ’uummatitta pilersaarutigisaannik’ iliortariaqarpugut. — 2 Kor. 9:7.
6 Anguniakkatta eqqumaffiginissaannut oktobarimi periarfissaqarluarpugut. Napasuliaq Alapernaarsuiffik aamma Iteritsi! neqeroorutigisassavavut soqutiginnittullu uterfigeqqittarlugit. Piviusorsiortunik anguniagalersinnaavugut? Immaqa Immaqa atuagassiat siaruartertakkavut amerlisissinnaavavut. Amerlanersatta anguniagarisinnaavaat amerlanerusunik pulaaqqiisarnissaq Biibilimillu atuaqqissaaqateqalernissaq.
7 Pingaartunik kinguartiterinissaq silatusaarnerunngilaq, ’silarsuaq nungujartormat’. (1 Juá. 2:17) Piffissami matumanerpiaq Jehovamut kiffartornermi immikkut pisinnaatitaaffinnik pilluaqqussutinillu angusaqarsinnaavugut. Nammineerlutali anguniartariaqarpavut. (kmD 94/10 Nu er det tid)