Anersaaq suna ersersittarpiuk?
1 Filippimiunut allakkat ima naggaserneqarsimapput: ’Naalakkap Jesus Kristusip saammaannerata anersaarsi najorliuk.’ (Fil. 4:23) Nutaarsiassamik nuannersumik oqaluussissutiginninnermut soqutiginninnerat aammalu asaqatigiillutillu isumassoqatigiinnerat pillugit Paulusip nersualaarpai. — Fil. 1:3-5; 4:15, 16.
2 Anersaamik taama ittumik ilagiinni ersersitsisarnissarput kissaatigisariaqarparput. Tamarmik suliniarluartuugaangata, inussiarnisaarlutik inoroorsaarlutillu nalunarneq ajorpoq anersaamik ajunngitsumik pigisaqartut. Anersaaq isumalluartoq asannittorlu ataasiussuseqalersitsisarpoq siumukartitsisarlunilu. (1 Kor. 1:10) Anersaaq isumalluanngitsoq sapiissuseerutitsillunilu ’affaannarmik uummateqartitsisarpoq’. — sar. 3:15, 16.
3 Utoqqaanertat maligassiuilluartuussapput: Utoqqaanertat akunnerminni ilagiinnilu ajunngitsumik isumalluartumillu anersaaqarnissap isumaginissaa akisussaaffigaat. Sooq? Isummatik ileqqutillu ilagiinnittunut allanut tuniluussinnaammata. Nuannaarutigisarpavut utoqqaanertat oqaluussinermi suliniarluartut, asannippaluttumik qungujullutik ilassisartut aammalu inuttut imaluunniit oqaluttarfimmiit unnersuussigaangamik isumalluartumik ineriartornartumillu pissuseqartut. — Epr. 13:7.
4 Soorunami tamatta ilagiinni inussiarnersuunissaq, inoroorsaartuunissaq, suliniarluartuunissaq anersaakkullu pingaartitsisuunissaq suleqataaffigisariaqarparput. Ataatsimooraangatta inuttut ataasiakkaatut kissalaarnermik asanninnermillu ersersitsisarsinnaavugut. (1 Kor. 16:14) Utoqqaassuseq, nagguik, ilinniagaqarsimaneq aningaasatigullu inissisimaneq apeqqutaasariaqanngillat. (Naleqqiuguk Efesumiunut agdlagkat 2:21.) Neriuuterput pissutigalugu nuannaarpalussinnaavugut, inoroorsaarnermik ersersitsilluta oqaluussinermilu suliniarluartuulluta. — Rûm. 12:13; Kul. 3:22, 23.
5 Ataatsimooqatigisartakkavut tamarmik, aamma nutaat, tikilluaqqusaasutut misiginiassammata qatanngutigiittullu asaqatigiinneqarlunilu tunniusimaqatigiittoqarniassammat iliuuseqartariaqarpugut. Kiffartornitsigut kristumiutullu pitsaasumik pissuseqarnitsigut ersersissavarput ilagiit ’ilumoornerup sukaralugillu tunngavigigai’. (1 Tim. 3:15) Aamma ’eqqissineq Guutip pia’ uummammik isumamillu sernissuisoq pissutigalugu anersaakkut toqqissisimaneq misigissavarput. (Fil. 4:6, 7) Anersaap, Jehovap Naalagaq Jesus Kristus aqqutigalugu ajunngissusianik pisassarinngisaraluatsinnik nassataqartup, ersersinnissaa qanortoq tamatta ilungersuutigiuartigu. — 2 Tim. 4:22. (kmD 94/11 Hvilken ånd lægger du for dagen?)