Atuagaq ’Ilisarsineq’ — sakkussaq naleqanngitsoq
1 Atuagaq ’Ilisarsineq’ 1995-imi ataatsimeersuarnermi „Unnersiutiginnittut nuannaartut“-mi saqqummersinneqarpoq, inuillu peqqusersuitsut tuusintilippassuit inuunermut naassaanngitsumut siulersoreersimavai. (Juá. 17:3) Danmarkimi soqutiginnittut nutaat pilertortumik siumukariarsimasut pillugit misilittakkat arlallit tusartarpavut. Angut inuusuttoq atuagassianik perusulluni naalagaaffilersaartarfimmut sianersimavoq, erniinnarlu atuaqqissaaqatigineqarnissaanik neqeroorfigineqarpoq. Naak sulisitsisuni sulisarnermini piffissat allanngortinnissaannik qinnuigisariaqarsimagaluarlugu, ataatsimiinnerit ingerlaannaq najuuffigisalerpai. Sapaatip-akunneri tamaasa atuakkami ’Ilisarsineq’-mit kapitali ataaseq atuartarpaa, atuagarlu affaa sinnerlugu atuareerpaa. Ersarissumik takutippaa Jehovamut nalunaajaasunngorusulluni.
2 Inuit peqqusersuitsut atuakkamit ’Ilisarsineq’-mit sukkasuumik siuariarnissaannik ikiorneqarnerannik assersuummik allamik taasaqariarta. Marsip aallartissimalernerani angut qatanngummut arnamut ilisarisimasaminut saaffiginnissimavoq. Aperisimavaa suli Jehovamut nalunaajaasuunersoq, taassumallu angersimavaa. Jehovap nalunaajaasui pillugit paasisaqarusuppoq qatanngutillu arnap unnuk taanna ilagiit atuakkamik atuaqqissaaqatigiinnerat najuuffigeqqullugu qaaqqusimavaa. Ataatsimiinnermi siullermi atuagaq ’Ilisarsineq’ atorlugu Biibilimik atuaqqissaaqatigineqarnissani isumaqatigiissutigaa, sapaatip-akunneralu taanna siulleq marloriarlugu atuaqqissaaqatigineqarpoq. Aallaqqaammulli ataatsimiinnerit tamaasa najuuffigisarpai maajimilu oqaluussisartutut kuisimanngitsutut nalunaarutigineqarpoq.
3 Maannakkut pilersaarutigineqarpoq qaammatini tulliuttuni atuagaq ’Ilisarsineq’ atussagipput nutaanillu atuaqqissaaqateqalerniassasugut. Aggustimi, septembarimi novembarimilu periarfissani suniluunniit neqeroorutigisassavarput. Oktobarimi atuagassiat immikkut saqqummersussat ingerlatissavavut, kisianni pulaaqqiisarnerni atuagaq ’Ilisarsineq’ neqeroorutigisassavarput.
4 Anguniagarput tassa periarfissat tamaasa atorlugit sapinngisamik amerlasuut atuakkamik tamatuminnga naleqanngitsumik atuarnissaat, inunnullu peqqusersuitsunut attaveqarluarniarnissaq. Ilaannikkut ingerlaannaq atuaqqissaaqateqarsinnaavugut, ilaatigullu pulaaqqiisarnikkut soqutiginninneq ineriartortikkiartuaaqqaartariaqarparput. Tamatuma ilagaa atuagassianik pajuttagaqalernissaq. Soqutiginnittut isumaqatigiissuteqarfigineqarsinnaapput atuagassiat nutaat takkuttut aalajangersimasumik pajugutigisarnissaannik. Ilaannikkut atuagaq ’Ilisarsineq’ pulaaqqiinernut siuariartortunut tunngavittut atorneqarsinnaavoq pulaagaq sallusuissummik annertunerujartortumik paasisaqaleriartortillugu. Qularnanngilaq ukiap ingerlanerani ilagiit amerlasuut angalaartarfitik tamakkerlugit angalaarfigissagaat, kisianni atuakkanik amerlasuunik agguaassinissarput angalaartarfiillu amerlasuut angunissaat anguniaannanngilarput. Inunnilli soqutiginnittuuvugut.
5 Naalagaaffimmik Kiffartuussineq-mi 1996-imi marsimoortumi aamma juunimoortumi atuagaq qanoq neqeroorutigineqarsinnaanersoq arlalinnik pitsaasunik siunnersuuteqarpoq. Saqqummiussisarnerit ilisimallualeriikkavut atorsinnaavavut, qaammatinilu tulliuttuni Naalagaaffimmik Kiffartuussineq-mi aamma atorsinnaasatsinnik siunnersuuteqartassaaq.
6 Amerlanersavut atuaqqissaaqateqalerusupput nalunnginnatsigu inuup inuuneranut Jehovap Jesusillu ilisarilernissaat pingaaruteqartorujussuusoq, aammalu nalunnginnatsigu allanik ajoqersuigaangatta nammineq anersaakkut nukittorsaatigisarlutigu. (1 Tim. 2:3, 4; ap. sul. 20:35) Taamaattumik aamma pissutissaqarluarpugut akuttunngitsumik nammineq ataatsimoorlutalu qinunikkut, Jehova qinnuigisassallutigu annerusumik kiffartuussinermik nuannaarnermik pilersitsisartumik peqataanissatsinnik. — 2 Tás. 3:1.
7 Qularnanngitsumik amerlasuut ukiaru qaammammi ataatsimi arlalinniluunniit ikiorti-pioneeri-usinnaapput. Ilagiinni amerlanerusut ataatsikkut taamaaliorsinnaappata qularnanngitsumik oqaluusseqatigiittarnissaat oqinnerulersitsissaaq. Allat aperikkit pisinnaanersut periarfissaqarnersullu ilagalutit ikiorti-pioneerioqatiginissannik taamaalillusi ’tipaatsoqatiigeeqqullusi’. — Juá. 4:34-36.
8 Oktobarip tallimaani ullup immikkut kiffartuussiffiusussap saniatigut siunnersuutigineqarsinnaavoq ilagiit atuakkamik atuaqqissaaqatigiinneranni ataasiakkaani imaluunniit qaammatini immikkut suliniarfiusuni tamani ilagiinni isumaqatigiissutigineqarsinnaavoq ulloq kiffartuussiffissaq. — Tuss. 145:2.
9 Ilagiit atuakkamik atuaqqissaarneranni aqutsisup ataatsimooqatigiinniittut inuttut ataasiakkaat soqutigissavai. (Naleqqiuguk Jesaja 40:11.) Ilaat angalaaqateqarnissaminnik atuakkamillu ’Ilisarsineq’-mik sunniuteqarluartumik nalunaajaanissamut ajoqersorneqarnissaminnik atorfissaqartitsipput. Siuliani eqqartorneqareersutut Naalagaaffimmik Kiffartuussineq-meersut paasissutissiilluartumik katersuutsitsinissanut tunngaviusinnaapput, tassanilu saqqummiussinerit ataaseq marlulluunniit sammineqarsinnaapput aammalu nalunaajaanermi misigisanik oqaluttuartoqarsinnaalluni.
10 Pioneerit suliaat pingaartinneqarput. Pioneerit kiffartuussinermi nersornartumik suliaqarput ilagiinnut tamanut sunniuteqarluartumik. Kajumissaataasaqaat takugaangatsigik atuagaq ’Ilisarsineq’ neqeroorutigalugu suliniarneri, atuaqqissaaqateqartalerneri atuagassianillu pajuttagaqartalerneri. Qiimmassaataasaqaallu allat ataatsimiinnerni katersuunnernilu misilittakkaminnik avitseqatigigaangamikkik, allallu angalaaqatissaminnik atorfissaqartitsigaangata suleqatiginninnissaminnut piareersimasaraangata.
11 Taamatuttaaq utoqqaanertat ilagiinnilu kiffartortut nukittorsaataasumik tapersersuillutik immikkut suliaqaraangata oqaatsikkut suliakkullu iluaqutaasarput. (Kul. 4:11) Oqaluussisartut maligassiuisutut isigisarpaat, qiimmassarneqartarlutillu katersuunnerni angalaartarfinnilu takugaangamikkik, aammalu kiffartuussinermit misilittakkanik oqaluttuaraangata. — 1 Tim. 4:12-16.
12 Iluaqutaassaqaaq atuaqqissaaqatiginissaannik neqeroorfigiumasatta allattornissaat. (Uss. 21:5a) Allattorneqarsinnaasut ilaat eqqaariartigik: Pulaaqqittakkavut; aalajangersimasumik atuagassianik pisartut attaveqarfigilluareersimasavut; ilaquttat (ilaat ungasissumi najugaqarpata allaffigineqarsinnaapput imaluunniit tikeraarneqarsinnaallutik); suleqatit imaluunniit atuaqatit sanilillu. Amerlanertigut oqaluussisartuusimasut unittoorsimasut atuaqqissaaqatiginianngilavut. Kajumissaarneqassapput ilagiinnut ilaasalernissaannut tassanngaanniillu ajoqersorneqarneq iluaqutiginiaqqullugu.
13 Ulluni makkunani ’inussiap aalajaallunilu silatuup’ sukkulluunniit oqaluussisarnissaq, aqqusinermi angalaarneq, niuerniartarfinni angalaartarneq telefonikkullu oqaluussisarneq immikkut pingaartinneruai. Aammattaaq atuagaq ’Ilisarsineq’ sulianut tamakkununnga ilaatitsigu. Marsip qaammataani qatanngutip arnap, oqaluussisartoq alla utaqqitillugu arnaq saneqquteriarmat atuagassianik neqeroorfigaa. Arnaq soqutiginninnermik ersersitsivoq, atuagaq ’Ilisarsineq’ tiguaa, Biibilimillu atuaqqissaaqatiginissaa isumaqatigiissutigineqarpoq. (Tamanna minuttit arfineq-marluk ingerlanerinnaani pivoq.) Ullut marluk qaangiummata atuaqqissaaqatigineqaqqaarpoq, sapaatip-akunnialunnguilu qaangiummata arnaq eqqaaniaanermut peqataavoq. Sukkulluunniit periarfissat atorluarniartarutsigik, Jehova inngilillu suleqatigissavavut. — sar. 14:6.
14 Guutimut suleqataasutut qaammatit tulliuttut ornigassavut pissanganartuupput. Immitsinnut ikioqatigiitta qaammatit tamaasa sallusuissummik inerittussalersueqataasinnaaqqulluta. Tatiginnilluarluta upperluarlutalu naammangaartunik inerittulersuigutta peqqissaarlutalu imerterigutta, takusinnaajumaarparput Jehovap inuit peqqusersuitsut uummatai ammarai inerikkiartortillugillu. — ap. sul. 16:14; 1 Kor. 3:6. (kmD 8/96 ’Kundskabsbogen’ — et enestående redskab)