Sumiluunniit nutaarsiassaq nuannersoq oqaluussissutigiuk
1 Kristumiut siulliit nutaarsiassaq nuannersoq sumiluunniit oqaluussissutigisarpaat. Aallussilluarsimammata Jesus Kristusip makititaareerneranit ukiut 30-t qaangiutiinnartut Naalagaaffimmik tusarliussaq ’pinngortitani tamani qilaap ataaniittuni’ oqaluussissutigineqareersimavoq. — Kul. 1:23.
2 Ullumikkut Jehovap kiffai aallussilluartut aamma taama anguniagaqartarput — Naalagaaffimmik nutaarsiassamik nuannersumik sapinngisaminnik amerlasuut angorusuppaat. Anguniagaq tamanna angujumallugu suup ikiorsinnaavaatigut? Amerlanerit ulloq naallugu suliffeqarput angerlarsimaffiannullu kasuttoraangatta angerlarsimaneq ajungajallutik. Sulinngikkunik aallaqqasarput pisiniarfileralutilluunniit imaluunniit arlaannik aliikkusersorlutik. Naalagaaffimmik tusarliussaq taakkua ilaannut qinngaqqunnanngitsunut qanoq anngunneqarsinnaava? — Mat. 10:11.
3 Ilaat suliffimminni naapinneqartarput. Allaat illoqarfinni minnerusuni amerlasuut niuerniartarfiit eqqaanni ullup ilarujussua uninngasarput. Illoqarfinni annerusuni suliffeqarfinni allaffinnilu oqaluussisoqartarpoq, taakkunanngalu amerlasuut Naalagaaffimmik tusarliussaq siornagut tusarsimanngisaannarpaat. Ilaat qasuersertillutik illoqannginnersamiittut, aasarsiortarfimmiittut, pinnguartarfinni tammaarfinniittulluunniit naapinneqartarput, imaluunniit biilit unittarfianni pisiniarfinniluunniit utaqqerujoortillutik; amerlasuullu nutaarsiassamut nuannersumut ajunngitsumik qisuariartarput.
4 Maanna oqaluussisartut amerliartuinnartut inuit angallaffigisaanni sukkulluunniit nalunaajaanissaminnut immikkut suliniuteqartuartarsimapput. Aallaqqaammut nangaalaartarsimapput ittoorlutillu illumiit illumut oqaluussisarneq sungiusimanerugamikku. Maanna oqaluussisartut taakku qanoq misigippat?
5 „Kiffartorninnut inuummarissaataaqaaq!“ qatanngut angut misilittagaqartoq oqaluttuarpoq. Alla ima ilanngussivoq: „Oqaluussinermut aallussisuunissannut iluaqutigisarpara.“ Pioneeri utoqqalisoq oqaluttuarpoq: „Inuummarissaataavoq anersaakkut timikkullu, . . . sulilu siumukariartorpunga.“ Oqaluussisartup allap maluginiarsimavaa Jehovap nalunaajaasuinik oqaloqateqarsimanngitsut aatsaat taama amerlatigisut oqaloqatigisimallugit. Taamatuttaarlu inuusuttut qiimasuutigisarpaat taamatut angalaartarnertik. Ilaat oqarpoq: „Nuanneqaaq taamaalillutami inuppassuit oqaloqatigisinnaasaratsigik.“ Alla oqarpoq: „Atuagassianik aatsaat taama amerlatigisunik agguaassivunga.“ Tamakku tamarmik angalaartarfimmi angalaarfigineqartuartartumi pisimapput.
6 Nakkutilliisut angalasartut maligassiuipput: ’Silap matuma pissusia allanngorarnera’ miserratiginagu, qanittukkut Peqatigiiffiup siunnersuutigaa nakkutilliisut angalasartut kiffartuussinerminni pilersaarutimik allanngortinnissaannik nutaarsiassamik nuannersumik sapinngisamik amerlasuut anguneqarnissaat siunertaralugu. (1 Kor. 7:31, NV) Ukiorpassuarni nakkutilliisut angalasartut sapaatip-akunneri tamaasa ullaap tungaa illumiit illumut angalaarnermut atortarsimavaat, ualerlu pulaaqqiinermut atuaqqissaaqateqarnermullu atortarsimallugu. Ilaanni tamanna suli atorneqarluarsinnaavoq. Allani ullaap tungaa illumiit illumut angalaarnermi immaqa annikitsuinnarmik kinguneqartarpoq. Taama pisoqartillugu nakkutilliisup angalasartup aalajangersinnaavaa ullaap tungaa niuerniartarfinni aqqusinermiluunniit angalaarnissamut atorsinnaallugu. Imaluunniit oqaluussisartunik amerlavallaanngitsunik allaffeqarfinni, niuerniartarfiit eqqaanni, biilit unittarfiini imaluunniit arlaanni inoqarfiusuni oqaluussiartornissanik aaqqissuisoqarsinnaavoq. Oqaluussisartut piffissaminnik oqaluussinermut atorluaagunik amerlanerusut angusinnaavaat.
7 Nalunaarusiat takutippaat nakkutilliisut angalasartut oqaluussisartullu allannguutit tamakku pitsaanerutikkaat. Utoqqaanertaqatigiit ilaasa nakkutilliisut angalasartut qinnuigisimavaat oqaluussisartut ilaat ajoqersoqqullugit oqaluusseriaatsimik sumiiffigisami atorfissaqartunik. Annertuumik iluaqutaasimavoq oqaluussisartunut taakkununnga ilagiinnut nakkutilliisut angasartut ilagalugit oqaluusseriaatsinik taama ittunik atuinissaminnut. Kingorna aamma allanik ajoqersuisinnaanngorput. (1 Tim. 2:2) Tamatumalu kinguneraa nutaarsiassaq nuannersoq suli amerlanerusunut anngunneranik.
8 Soorunami oqaluusseriaatsip tamatuma misilinnissaanut nakkutilliisup angalasartup tikinnissaa utaqqeqqaartariaqanngilaq. Aajuku siunnersuutit ilaat immaqa atorsinnaasatit:
9 Aqqusinermi angalaarneq: ’Inuit sumiippat?’ Immaqa taama eqqarsartarpugut inissiat ilaanni ulluinnarni ullaap tungaani angalaaraangatta. Ilaat immaqa arlaannik sulissussipput imaluunniit niuerniariarlutik. Aqqusinermi angalaarneq misilissimaviuk? Oqaluusseriaaseq tamanna eqqortumik suliaralugu kinguneqarluarsinnaavoq. Aalajangersimasumi uninngalluni atuagassianik saqqummersitsiinnarani inunnut torrutiinnarlugu inussiarnersumik saaffiginnilluni oqaloqatigiinnermik aallarniisoqarsinnaavoq. Pisariaqanngilaq saneqquttut tamaasa oqaluunnissaat. Inuit ulapputeqarpasinngitsut oqaloqatigikkit, igalaani isiginnaarujoortut, biilit unittarfiini issiasut imaluunniit angallavissanik utaqqerpasittut. Siullermik inussiarnersumik ilassisinnaavutit qisuariarnissaalu utaqqillugu. Oqalukkusuttoqarpat arlaat eqqartugassaq aalajangersimasoq qanoq isumaqarfigineraa aperineqarsinnaavoq.
10 Nakkutilliisut angalasartut ilaat oqaluussisartut arfinillit qaaqquai, nammineq nulianilu ilanngullutik, aqqusinermi angalaaqataaqqullugit. Qanoq kinguneqarpa? „Ullaap tungaa ajunngivissumik ingerlasimavoq,“ taama oqaluttuarpoq. „Angerlarsimanngitsunik pulaagassaqanngilaq. Atuagassiat 80-t agguaanneqarsimapput naqitaararpassuillu. Arlalinnik ajunngitsumik oqaloqateqarpugut. Oqaluussisartut ilaat aqqusinermi siullerpaamik angalaaqataasimasoq oqarpoq: ’Ukiorpassuit sallusuissummiissimavunga, paasisimanngilara suna pinngitsoortissimallugu.’ Sapaatip-akunnerata naanerani ilagiit atuakkanik toqqorsivianni atuagassiat sinneruttut appariarsimapput.“
11 Nakkutilliisup angalasartup taassuma ilagiit tulliat tikikkamigit, paasivaa oqaluussisartut ilaat ullaaralaaq aqqusinermi angalaarsimagaluartut, annikitsuinnarmilli angusaqarsimallutik. Qatanngutip arnap ullaaq taanna inuit marluinnaat oqaloqatigisimavai, aqqusinermi inuit tamarmik naapitaat suliartorlutik ulapimmata. Nakkutilliisup angalasartup siunnersuutigaa ullaap tungaani kingusinnerusukkut aqqusinernut taakkununnga uteqqeqqullugit. Ullaallu tungaa ullup-qeqqariartorneranut tassaniissimapput. Qatanngut arnaq ullaaralaakkut inunnik marluinnarnik naapitsisimasoq ajunnginnerujussuarmik kingunilimmik angusaqarpoq. Atuagassiat 31-t agguaassimavai atuagassiaaqqallu 15-t, inuillu arfineq-marluk atii adressiilu pisimallugit marlunnillu Biibilimik atuaqqissaaqateqartalerluni. oqaluussisartut allat aamma assingusumik qiimmassaataasumik angusaqarput.
12 Soqutiginninnermik ersersitsisoqarpat pitsaassaaq atianik sumilu najugaqarneranik telefoniatalu normuanik paasitinneqarutta. Toqqaannartumik aperinissaat pinngitsoortinniarlugu ima oqarsinnaavugut: „Oqaloqatigiinnerput nuanneqaaq. Arlaatigut nangeqqissinnaassavarput?“ Imaluunniit: „Najukkannut aggersinnaavunga?“ Amerlasuut taamatut neqeroorfigineqarnertik akuerisarpaat. Ataatsimiittarnitsinnut tunngasumik allagartaarannguanik nassataqartarit ataatsimiittarnitsinnut peqataarusussinnaasut tunisinnaaqqullugit.
13 Ilagiit allat angalaartarfianni najugaqartumik soqutiginnittumik naapitaqarutta paasissutissat ingerlateqqittariaqarpavut, taamaalilluni qatanngutinut tassaniittunut soqutiginninneq malittarisinnaaqqullugu. Angalaartarfissinni aqqusinermi angalaartarneq iliuuseqarfigineqarnerusinnaava? Taamaassappat pitsaassaaq ilanngutassiaq „Aqqusinermi nalunaajaalluarnikkut soqutiginnittunik ujaasisa“ sammissallugu, Naalagaaffimmik Kiffartuuteqarneq-mi 1994-mi juulimoortumi saqqummersinneqarsimasoq. Aqqusinermilu angalaarnissaq aaqqissoruk piffissami ullormi inunnik amerlanerusunik naapitsiviulluarsinnaasumi.
14 Angallaviusuni oqaluussineq: Pioneerit ilaat aalajangersimapput ullaap tungaani bussit unittarfiata eqqaani kollegiap eqqaaniittumi oqaluussiniarlutik. Ajunngitsumik oqaloqateqarluarsimapput, ajornartorsiuteqarporli. Oqaloqatiginnillutik aallartillualeruttortut bussi takkuppoq, oqaloqatigiinnerlu maangaannaq naasariaqarluni. Pioneerit ajornartorsiut aaqqippaat namminneq aamma bussimut ikillutik illoqarfikkoornerminnilu oqaloqatigiinneq nangillugu. Soqutiginnittut niuffissaminnut niugaangata namminneq piffimminnut uteqqittarput, allanut oqaluussiutigalutik. Arlaleriarlutik taamatut ingerlaartareerlutik kinguneri naatsorsorpaat: Atuagassiat 200-t sinnerlugit tunniussimavaat arfinilinnillu Biibilimik atuaqqissaaqateqartalersimallutik. Ilaasut ilaasa adressitik telefonimillu normuat tunniuttarsimavaat, najukkaminnut pulaarneqarsinnaaqqullutik. Sapaatip-akunnera tullia oqaluussisartut bussit unittarfiata eqqaanukaqqipput taamatullu ilioqqillutik. Atuagassiat 164-t agguaassimavaat ataatsimillu Biibilimik atuaqqissaaqateqartalerlutik. Unittarfiit ilaanni angut bussimut ikivoq issiavimmullu inoqanngitsutuamut — pioneerip eqqaanut — ingippoq. Qatanngut angut isigilerpaa qungujullunilu oqarluni: „Eqqoriarlara. Napasuliaq Alapernaarsuiffik-mik pissaqartipparma.“
15 Oqaluussisartut amerlasuut bussinut ilaagaangamik imaluunniit sinersortaatini timmisartorlutilluunniit angalanerminni ajunngitsumik nalunaajaasarsimapput. Angalaqatinut qanoq oqaloqatigiinnermik aallarniisoqarsinnaava? Oqaluussisartoq 12-nik ukiulik Iteritsi! atuarlugu aallartissimavoq, bussimi niviarsiaqqap eqqamini issiasup soqutiginnilernissaanik neriulluni. Tamanna sunniuteqarpoq. Niviarsiaqqap aperaa suna atuarneraa, akivaalu inuusuttut ajornartorsiutigisartagaasa iluarsiissutigisinnaasaat atuarnerarlugu. Nangillunilu oqarpoq nammineq ilanngutassiaq assut iluaqutigisimallugu qularinagulu taassuma aamma iluaqutigissagaa. Atuagassiat nuannaarutigeqalugit tigusimavai. Inuusuttut marluk oqaloqatigiinneq tusaavaat atuagassianillu aamma perusullutik. Tamatuma kingunerisaanik bussimik aquttoq aqqusernup sinaanut unippoq aperalunilu atuagassiani suna taama soqutiginartiginersoq. Paasigamiuk nammineq aamma atuagassianik perusulerpoq. Soorunami oqaluussisartoq arlalinnik atuagassianik agguaassassaminik nassarsimanngikkaluarpat tamanna pisinnaasimassanngikkaluarpoq.
16 Illoqannginnersani biilillu unittarfiini oqaluussineq: Illoqannginnersani biilillu unittarfiini inuit angunissaat pitsaaqaaq. Pisiniarfissuit eqqaanni biilit unittarfianni oqaluussillutit misilissimaviuk? Siullermik misissueqqaarnissaq pitsaassaaq. Inuit ulapputeqarpasinngitsut imaluunniit utaqqillutik biilini uninngasut misissukkit. Inussiarnersumik oqaloqatigiinneq aallarneruk, Naalagaaffiullu tusarliussaanut sangujartorteruusaarlugu. Kisivit angalaarit, qanittumi allamik oqaluussisartumik ilaqarlutit. Taskimik angisuumik nassataqaqinak, sapinngisamillu maluginiarnarpallaarnak. Mianersortuugit. Immaqa pitsaanerussaaq sivikitsuinnarmik biilit unittarfianni angalaarnissaq taava allamut ingerlaqqittarlutit. Inuit oqaloqateqarnissaminnik kissaateqanngikkaangata inussiarnersumik qimassinnaavatit allanillu oqaloqatissarsiorlutit. Periaaseq tamanna atorlugu qatanngut angut qaammatip ataatsip ingerlanerani atuagassianik 90-inik agguaassisimavoq.
17 Inuit ilaat illoqannginnersamukartarput qasuersaarniarlutik; allallu taamaaliortarput arlaannik sammisaqarniarlutik meeqqatilluunniit pinnguaqatiginiarlugit. Suliaannut akulerutinngikkaluarluta oqaluussiffigisinnaasatsinnik periarfissarsiorsinnaavugut. Qatanngutip angutip illoqannginnersami nakkutilliisumut oqaloqatigiinneq aallarnersimavaa, paasinarsivorlu angut taanna ernumassuteqartoq ikiaroornartunik atornerluineq pillugu, namminerlu meeqqami siunissami atugassaat assut eqqarsaatigisarsimallugit. Atuaqqissaaqatigiinneq aallartinneqarpoq tamannalu illoqannginnersami akuttunngitsumik pisarsimalluni.
18 Niuertarfinni sukkulluunniit oqaluussineq: Immaqa niuertarfinni toqqaannartumik oqaluussisoqarsinnaanngilaq. Taamaattumik oqaluussisartut ilaasa sukkulluunniit oqaluussisarneq atorluarniartarpaat. Immaqa issiaartarfimmut ingittarput inussiarnersumillu issiasunut oqaloqatigiinnermik aallarniillutik. Soqutiginnittoqaraangat mianersorlutik naqitaaqqamik atuagassiamilluunniit neqeroorfigisarpaat pulaaqqinnissaannillu isumaqatiginiartarlugit. Minuttit arlaqanngitsut niuerniartarfinni oqaluussillutik immikkoortortaqarfinnut allanut ingerlaqqittarput. Soorunami taamatut sukkulluunniit oqaluussigaanni maluginiartippallaannginnissaq eqqumaffigisariaqarpoq.
19 Oqaloqatigiinneq inussiarnersumik aallarneruk. Oqaluutaq qisuariaruni apeqquteqarfigineqarsinnaavoq. Akissutaanut soqutiginnillutit tusarnaarit. Ilumoorlutit oqaasiinut soqutiginnigit. Ajornanngippat isumaqatigiuk, ersersigullu isumaa akueralugu.
20 Qatanngutip arnap ullumikkut inuuniarnerup akisunerujussua eqqartormagu arnaq utoqqaq oqaloqatigilluarsimavaa. Arnaq ernerluni isumaqataavoq, uummaarissumillu oqaloqatigiinneq aallartippoq. Qatanngutip arnap taassuma atia najugaqarfialu pivai, sapaatillu akunnera taanna pulaaqqiilluni.
21 Niuerniartarfimmiit niuerniartarfimmut oqaluussineq: Illoqarfiit ilaanni niuerniartarfiit angalaartarfigineqarput. Qatanngut angalaartarfissanik nakkutilliisoq niuerniartarfinnik angalaartarfissanik allagartanik allassinnaavoq. Ilaanni pisiniarfiit immikkut angalaarfigineqarsinnaapput, imaluunniit illut naliginnaat ilanngullugit angalaarfigineqarsinnaallutik. Ilagiinni utoqqaanertat oqaluussisartut piukkunnartut kajumissaarsinnaavaat akuttunngitsumik niuerniartarfinni angalaarfissat angalaarfigeqqullugit sumiginnarneqaqqunagit.
22 Oqaluusseriaatsimut tamatumunnga peqataallutit qaaqquneqaruit, siornagullu misilissimanngikkukku ’ersisuittariaqarputit’. Siullermik niuerniartarfiit minnerit pulaarsinnaavatit, taava sapiillineruleruit niuerniartarfiit annerusut tigusinnaavatit. (1 Tás. 2:2) Niuerniartarfinni oqaluussigaangatta naalagaaffilersaartarfimmi ataatsimiittarnitsitut atisaqartariaqarpugut. Ajornanngippat allanik pisiniartoqartinnagu oqaluussisinnaavutit. Pisortaq akisussaasorluunniit apeqqutigiuk. Inussiarnersumik pigit tamatigullu sivikitsuutinniaruk. Utoqqatsisutut pissuseqarnissaq pisariaqanngilaq. Niuerniartarfiutilippassuit pisisartut soqutigisarpaat akornuserneqartarnitillu sungiussimallugit.
23 Naatsunnguamik ilassinnereeruit ima oqarsinnaavutit: „Niuertut tamatigut ulapputeqartuartuummata angerlarsimatillugit naapikkuminaatsittaratsigik maanga pulaarpakkit ilanngutassiat eqqarsaatissarsinartut atuarsinnaasatit tunniukkiartorlugit.“ Ilanngutassiat naatsumik oqaaseqarfigikkit.
24 Imaluunniit ima oqarsinnaavutit: „Malugisimavara niuertut paasisaqarluartinneqarnissartik soqutigigaat. Napasuliaq Alapernaarsuiffik (imaluunniit Iteritsi!) nutaaq tamatsinnut pingaaruteqartunik imaqarpoq.“ Ilanngutassiami suna pineqarnersoq nassuiaruk ima oqarlutit: „Qularinngilara atuassallugu nuannarissagit.“
25 Sulisoqarpat ajorinngippagulu ima nangissinnaavutit: „Ajussanngila taamatut naatsunnguamik sulisunut atuagassianik saqqummiussiguma?“ Tamatuminnga akuerineqaruit, neriorsuutit eqqortillugu naatsunnguamik iliortariaqarputit, pisortaasup ilinnit naatsorsuutiginninneratut. Sulisut ilaat pineqartumik arlaannik paasisaqarnerorusuppata ajunnginnerussaaq angerlarsimaffiannut pulaassallugit.
26 Qanittukkut oqaluussisartut ilaat nakkutilliisoq angalasartoq ilagalugu niuerniartarfinni angalaaqatigiipput. Oqaluussisartut ilaat tunuarsimaakannerlutik aallartissimapput, siornagut misilissimannginnamikku; sivitsunngitsorli eqqissinerulerput nuannarilerlugulu. Nalunaaquttap akunnerata ataatsip ingerlanerani inuit 37-t oqaloqatigisimavaat atuagassiallu 24-t atuagassiaaqqallu sisamat agguaassimallugit. Qatanngutip angutip malugisimavaa qaammammut illumiit illumut naapittakkaminnit amerlanerusut oqaloqatigisimallugit.
27 Oqaluussinissamut periarfissarsiorit: Jesus piffissaasutiguinnaq oqaluussisarsimanngilaq. Periarfissanili takkuttuni tamani nutaarsiassaq nuannersoq oqaluussissutigisarpaa. (Mat. 9:9; Lúk. 19:1-10; Juá. 4:6-15) Maluginiakkit oqaluussisartut ilaat qanoq oqaluussinissaminnut periarfissarsiortartut.
28 Ilaasa angajoqqaat meeqqaminnik atuarfiup isaariaata eqqaani utaqqinerminni oqaluussisarneq ileqquliussimavaat. Angajoqqaat ilaat minuttit 20-t meeqqamik suli soraannginneranni utaqqisarput, taamaattumik naammattumik periarfissaqarpoq allanik Biibilimik tunngasumik ajunngitsumik oqaloqatiginninnissamut.
29 Pioneerit amerlasuut eqqumaffigisarpaat inuit atuagassiaatitsinni sammineqartunut aalajangersimasunut soqutigisallit anguniarlugit. Assersuutigalugu arnaq pioneeri ajunngilluinnartumik kingunilimmik ilagiit angalaartarfigisaanni atuarfiit arfinillit pulaarsimavai ilanngutassianik „Skoler i krise“-nik, Vågn op!-mi 22. decembarimoortumi 1995-imi. Aammattaaq inunnik isumaginninnermik allaffeqarfiit pulaarsimavai atuagassianik ilaqutariit inuunerat meeqqanillu atornerluisarneq pillugu, kingornalu atuagassiat tamakkununnga assingusut aggiunnissaat isumaqatigiissutigalugu. Suliffissarsiuussisarfimmut Iteritsi! 1996-imi apriili-juuni-moortumi suliffissaaleqineq pillugu tunniussimmat ilassilluarneqarsimavoq.
30 Nakkutilliisut angalasartut ilaat oqaluttuarpoq nulianilu pisiniarfilerileraangamik sukkulluunniit nalunaajaasarlutik. Pisiniarfilerisarput inoqarpiannginnerani pisiniat ulapaaruttorfiginngisaanni. Amerlasuunik ajunngitsumik oqaloqateqartarsimapput.
31 Oqaluussisartorpassuit aamma nalunaarutigisarpaat errorsisarfinni ajunngitsumik kingunilimmik oqaluussisarsimanitik. Inoqanngikkaangat atuagassianik ilisiinnarnissartik naammaginngilaat. Anguniagaraat inuit nutaarsiassamik nuannersumik angunissaat, taamaattumik inuit errorsisarfinnik atuisartut oqaloqatiginiartarpaat.
32 Ilaanni oqaluussisartut toqqarneqarsimasut akuersissummik pisimasut timmisartoqarfinni oqaluussisarput. Ilaatigut angalasut nunani Jehovamik nalunaajaasukitsuni najugaqartut oqaluussiffigissallugit nuannaarutigisarsimavaat. Soqutiginninnermik ersersitsisut naqitaaqqamik atuagassianilluunniit neqeroorfigineqartarput.
33 Angalaartarfinni inissianik isumannaarsukkanik peqarpat najugaqartunullu oqaluussisinnaanngikkutta taava, ilaat pisarnerattut, periaaserissumik isaaffimmik paarsisumut imaluunniit inissiami allaffimmi sulisunut oqaluussisinnaavugut. Periaaseq tamanna aamma namminersortuni, kikkunnilluunniit iserfeqqusaanngitsuni atorneqarsinnaavoq. Nakkutilliisup angalasartup oqaluussisartullu arlaqanngitsut allat ilagalugit periaaseq tamanna atorlugu inissiat arfineq-marluk pulaarsimavaat. Tamatigut pisortaasut oqarfigisarpaat naak inissiat ornissinnaanngikkaluarlugit isumaqarlutik taakkua atuagassiat pinngitsoortittariaqanngikkaat. Inissiani taakkunani pisortaasut arfineq-marluk nuannaarlutik atuagassianik pisimapput normullu tulliuttut piumallugit. Najugaqarfinni taama ittuni najugaqartut telefonikkut attaveqarfigineqarsinnaapput. Ilanngutassiami Naalagaaffimmik kiffartorneq-mi 1993-imi aggusti-moortumi ilanngussami „Telefonikkut oqaluussineq — amerlasuut angunissaannut“-mi telefonikkut oqaluussinissamut paasissutissaqarpoq atoriaannaasunik.
34 Sumiluunniit oqaluussiumallutit ilungersorit: Naalagaaffimmik tusarliussaq pillugu suliassarput nukinginnartuuneranik misigisariaqarpugut — taamaaliorneq tunniulluinnarnitsinnut ilaavoq. Inuit piffissaalluartukkut anguniarlugit imminut tunniulluinnartariaqarpugut ’ilaat annaakkumagaluarlugit’. Jehovap kiffai tunniulluinnarsimasut tamarmik apustili Paulusitut oqarusupput: ’Tamanut tamalaasutut ippunga ilaat annaakkumagaluarlugit. Iivangkiiliuli pillugu tamaasa suliaraakka tamatumunnga peqataasinnaanngoqqullunga.’ — 1 Kor. 9:22, 23.
35 Paulus nangilluni allappoq: ’Sanngiissusera usorsitsaatigiumaneroqaara Kristusip pissaaneranut inigeqqullunga . . . sanngiitsaraangamami pissatittaraanga.’ (2 Kor. 12:9, 10) Allatut oqaatigalugu arlaannattaluunniit suliaq tamanna nammineerluni suliarisinnaanngilaa. Jehova qinnuigisariaqarparput anersaavanik illernartumik pissaaneqangaartumik. Pissatseqqulluta Guuti qinnuigigutsigu tatigisinnaavarput qinnutivut akissagai. Inoqatitsinnut asanninnitta periarfissarsiortuartissavaatigut sumiluunniit nutaarsiassamik nuannersumik taakkununnga oqaluutiginninnissatsinnik. Sapaatip-akunnerani aggersumi siunnersuutit eqqartorneqartut ilaat misissorniakkit! (kmD 9/96 Forkynd den gode nyhed overalt)