Apeqquteqartarfik
◼ Ilagiit ilisinermut peqataanissaannik qinnuigineqaraangata apeqqutit makku pilersinnaasarput:
Ilisinermi kina oqalugiartuusariaqarpa? Ilaquttat qimagaasut aalajangissavaat. Ilagiit iluanni qatanngut angut kinaluunniit oqaatigineqarluartoq toqqarsinnaavaat. Utoqqaanertaqatigiit qinnuigineqarpata oqalugiartussarsioqqullugit pisarneq malillugu utoqqaanertaq piginnaanilik Peqatigiiffiup aaqqissuussaanik oqalugiassaaq. Annertunerusumik pinissarput toqusimasumullu unnersiutiginnilluni oqalugiarnissaq kissaatiginngilarput, naleqqussinnaavorli taassuma pissusii pitsaasut ilaat eqqaaneqarpata.
Ilisineq naalagaaffilersaartarfimmi pisinnaava? Aap, utoqqaanertaqatigiit pisinnaatippassuk pisarnitsitullu ataatsimiittarnivut akornusinngippatigik. Toqusimasoq oqaatigineqarluarpat ilagiinnullu ilaappat imaluunniit meeraappat Naalagaaffilersaartarfik atorneqarsinnaavoq. Pineqartorli ilagiit avataanni ilisimaneqarpat kristumiorpalunngitsumik pissuseqartutut imaluunniit allanik ilagiit isiginerlunneqalissutigisinnaasaanik eqqaaneqarpat immaqa utoqqaanertat naalagaaffilersaartarfiup atorneqannginnissaa qinissavaat. — Takuuk Organiseret til at fuldføre vor tjeneste, qupperneq 60.
Amernertigut naalagaaffilersaartarfik uppinngitsumik ilisinermut atorneqarneq ajorpoq. Qaqutigoortumik taama pisoqarsinnaavoq ilaqutariit qimagaasut ilagiinnut ilaappata kuisimasuullutillu, toqusimasorlu ilagiinni sallusuissummut iluarinartumik isiginnittuuppat ilaanngitsullu akornanni pitsaasumik oqaatigineqarpat, aammalu silamiutut ileqqulersuutinik aaqqissuisoqanngippat.
Utoqqaanertaqatigiit naalagaaffilersaartarfiup atorneqarnissaanik akuersissuteqarpata immaqa aamma illerfik naalagaaffilersaartarfimmut eqqunneqarsinnaavoq tassani ileqquuppat.
Silamiumimmi ilisisarneq? Toqusimasoq illoqarfimmi pitsaasumik ilisimaneqarpat immaqa qatanngut angut Biibilimiit tuppallersaammik oqalugiarsinnaavoq toqusut inaanni imaluunniit ilerrip eqqaani. Ilagiit ilisineq pilersaarusiorsinnaanngilaat inuunerluttutut imaluunniit inatsisinik unioqqutitsisutut ilisimaneqarpat, imaluunniit Biibilip najoqqutassiaanut ersarissumik akerliusumik inuuneqarpat. Aammattaaq qatanngut angut palasit ilagalugit ilisinermut oqalugiarsinnaanngilaq Babylonip Angisuup oqaluffiini allaniluunniit.
Anisitaasimasormi toqusimappat? Amerlanertigut ilagiit akuusinnaanngillat. Naalagaaffilersaartarfik atorneqarsinnaanngilaq. Allamik isumataarnerminik takussutissaqarpat ilaaleqqinnissaminillu kissaateqarluni ersersitsisimappat, qatanngutip angutip nalunngeqatiginnissutini tunngavigalugu immaqa Biibilimiit oqalugiarsinnaavoq toqusut inaanni imaluunniit ilerrip eqqaani uppinngitsunut nalunaajaalluni aammalu qimagaasut tuppallersarumallugit. Taamatut suli aalajangertinnani silatusaarnerussaaq utoqqaanertaqatigiit siunnersiorfigissallugit siunnersuutaallu isumaliuutigilluarlugit. Qatanngutip oqalugiarnissaa naleqqulluanngippat naleqqulluarsinnaavoq qatanngut angut toqusimasumut qaningisaasoq oqalugiassappat qimagaasut tuppallersarniarlugit.
Siunnersuutissat amerlanerusut nassaarineqarsinnaapput Vagttårnet-imi 15. oktobari 1990-imoortumi, qupperneq 30-31; 15. novembari 1981-imoortumi, qupperneq 22-23; 15. juuni 1980-imoortumi, qupperneq 5-7; 1. septembari 1978-imoortumi, qupperneq 5-7 aamma 23; 1. septembari 1977-imoortumi qupperneq 403-405; 15. juuni 1970-imoortumi, qupperneq 287-288; aamma Vågn op! 8. septembari 1990-imoortumi, qupperneq 22-23, aamma 22. juuli 1977-imoortumi, qupperneq 12-15.