Maqaasivatsigit!
1 Ilaatigooriarluta ataatsimiinnernut peqataangitsoortarpugut, immaqalu eqqarsarluta: ’Maqaasineqarunnanngilanga; malugiunnanngilaat takkutinnginnera.’ Kisianni ilumuunngilaq! Avatitut timimiittutut tamatta ilagiinni pingaaruteqarpugut. (1 Kor. 12:12) Ilatta anersaakkut ilorrisimaarnerat ajortumik sunnersinnaavarput takkutinngitsoornitsigut. Takkutinngitsooruit qularutigissanngilat maqaasineqarlutit!
2 Peqataasarnerit pingaartoq pisariaqarpoq: Paulusip qatanngutimi ilaginissaat qilanaarisarsimavaa. Rûmamiunut agdlagkat 1:11, 12-mi tamanna nassuiarpaa: ’Saammaannermit tunissummik anersaap pianik ilissinni kajumissaaqatigeeqqulluta uppeqatigiissutsitsigut, ilissilu uvangalu pigisatsigut.’ Akisarnitsigut, ataatsimiinnerni saqqummiusseqataanerput aammalu najuutiinnarnerput nukittorsaaqataasinnaavoq ineriartuutaasinnaallunilu kiffartornermi aalajaalluta ingerlajuarnissatsinnut. — 1 Tass. 5:11.
3 Qilanaarutigisanngiliuk nalagaaffilersaartarfitsinni angerlarsimaffimmiluunniit ataatsimiinnialeraangatta ilatta takunissaat? Akissutigisaannut tusarnaartarputit qujamasuutigalugillu uppernertik ersersikkaangassuk. Anersaakkut tunissutigisaat ineriartuutigisarpatit. Najuutinngikkaluarpata misigissagaluarputit arlaannik pingaaruteqartumik amigaateqarlutit. Aammattaaq qatanngutitit taama misigisarput illit takkutinngikkaanngavit.
4 Ataatsimiinnerit pingaaruteqassusiat: Napasuliaq Alapernaarsuiffik-mit issuagaq tulliuttoq ataatsimiinnerit anersaakkut inuuginnarnissatsinnut pingaaruteqarnerannik takutitsivoq: „Silarsuarmi saqitsaassigajuttumi ileqqorluttumilu kristumiut ilagiivi anersaakkut qimarnuffiupput eqqissisimaffiupput. . . asannittumillu pissuseqartuullutik. Tamaattumik ataatsimeeqataagajuttunngorit.“ (wGL 1/9 93 qup.14) Ullut tamaasa anersaakkut ineriartornanngitsunik nalaataqartarpugut. Sissuinngikkutta isumakuluutitsinnit qulangersimaneqarpallaalissaagut immaqalu anersakkut pisariaqartuugaluit arajutsisinnaallugit. Tamatta pisariaqartipparput qiimmassarneqarnissarput Guutimut kiffartornitsinni ataasiussuseqarsinnaajumalluta ilungersuussisinnaajumallutalu. — Epr. 10:24, 25.
5 Ataatsimiigiartarnissarput pingaaruteqarpoq. Napparsimanerit pilersaarutaanngitsunillu pisoqariataartanera ataatsimiigianngitsoornitsinnut pissutaasinnaapput. Kisianni qanortoq aalajangiusimatigu ilagiinni katisimasuni Jehovamik unnersiutiginnittunut ilaanissarput. — Tus. 26:12