Jehovamik pallorfiginnittarfik ataqqiuk
1 Inuit allat angerlarsimaffiinut pulaaraangatta taakkua pigisaat sianigisarpavut sumik aseruinaveersaarluta angerlarsimaffimmilu torissuseq akornusernagu. Jehovamut pulaartuugaangatta annerusumik taamaaliussannginnerpugut? Guutip illuani qanoq pissusilersortariaqarnerput ilisimasariaqarparput. (Tus. 15:1; 1 Tim. 3:15) Jehovap ’naalannassusia nunarsuarmut qilammullu anngusimavoq’, amerlanersattalu kristumiutut ataatsimiittarfigisavut ataqqisarpaat, naalagaaffilersaartarfimmi, angerlarsimaffimmi allamiluunniit ataatsimiittaraluaruttaluunniit. Aap, Jehovap illuatut isigaarput. — Tus. 148:13.
2 Ajoraluartumillu qatanngutit ilaat ataatsimiinnerni ataqqinnittumik periaaseqanngillat, nipiliorlutik saqqummiussallu pingaaruteqanngitsutut isigalugillusooq. Inersimasut ikittut ataatsimiinnerit ingerlaneranni torsuusami, anartarfinni imaluunniit naalagaaffilersaartarfiup silataani pisariaqanngitsumik oqaloqatigiittarput. Meeqqat annerusut minnerusunik paarsitinneqaraangamik ilaannikkut pinngualertarput taamaalillutillu saqqummiussat malinnaaffiginagit. Aamma ataatsimiinnerit kingorna takuneqarsimapput inuusuttut naalagaaffilersaartarfiup silataani pinnguartut, nipiliorlutik allaallu paasuusaarlutik karatertuusaarlutillu. Ilaannikkut meeqqat inuusuttullu sanilinut saneqquttunulluunniit akornutaasarsimapput.
3 Qanoq ililluni ataqqinninngitsuliornissaq pinngitsoortinneqarsinnaasoq: Pallorfiginninnerput qanoq ataqqinartigisoq qanorlu illernartigisoq paasigutsigu allat allamut saasarnianngilavut isussuullugit, nerilluta imaluunniit tamorasaarluta atorlugu, pappiaqqanik nipiliortitsilluta, pisariaqanngitsumik anartarfiliartarluta imaluunniit ileqquliuutiinnarlugu inortuisarluta. Angajoqqaat ataqqinninnermik paasisaqartut akuerissanngilaat naalagaaffilersaartarfimmi angerlarsimaffimmiluunniit atuaqqissaartarfiusumi meeqqamik natermik, pequtinik iikkamilluunniit simertiterinissaat. Tamattalu nalunngilarput ’kanngunartunik iliorneq, oqaatsillu sianiitsorpallattut quiasaarnipalaallu’ ataatsimiinnitsinni naleqqulluanngivissut. — Evf. 5:4.
4 Eqqaamajuarutsigu kristumiutut ataatsimiinnivut sumik siunertaqartut qulakkiissavarput nammineq meeqqavullu Jehovamik pallorfiginnittarfinnitsinnik ataqqinnittuunnissarput, tassani ’ineqarluta iluarnerutikkatsigu’. — Tus. 84:11.