„Jehova ikiortigaara“
1 Jesusip ajoqersukkani siulliit piginnaanileramigit, oqarfigai: ’Ata, amaqqut akornannut savatut aallartippassi.’ (Mat. 10:16) Tamatuma nangaalersippai imaluunniit tunuarsimaartilerpai? Naamik, isuma apustilip Paulusip kingusinnerusukkut uppeqatiminut nalunaarnermini pigisaatut ittoq pigaat: ’Tassa isumalluarluta oqarsinnaavugut: „Jehovap ikiormanga ersissanngilanga; inuit susinnaavaannga?“’ (Epr. 13:6) Tipaatsuutigaat Jesusip aqqa pillugu mitaatigineqaqqusaagamik, soraanngillallu ajoqersuillutik tusagassarlu nuannersoq oqaluussissutigalugu. — ap. sul. 5:41, 42.
2 Ullumikkut nunarsuaq tamakkerlugu oqaluussinerup naammassilerneraniippugut. Soorlu Jesusip siulittuutigereersimagaa, inuiaqatigiinnit uumissorneqarpugut. (Mat. 24:9) Oqaluussinerput assortorneqarsimavoq illaruaatigineqarlunilu silarsuullu ilaani allaat inerteqqutaalluni. Uppernikikkutta tamatuma qunulersissinnaagaluarpaatigut. Nalunnginnatsiguli Jehova ikiortigigipput nutaannguallaatigisarparput ingerlaannarnissatsinnullu nukissaqalissutigisarlugu.
3 Sapiitsuuneq tassaavoq nukittuneq, merserusunnginneq qunusuitsuunerlu. Akerleraalu qunutuuneq, ersineq sapiunnerlu. Jesusip ajoqersugai sapiitsuujuaannartariaqarsimapput ingerlaannassagunik. Uagutsinnut sapiitsuunissaq pingaartuuvoq isummeriaatsit iliuutsillu nalinginnaasut silarsuarmi Guutimut akerartuisumi ersersinneqartartut nikallulissutigissanngikkutsigik. Uagutsinnut kajumissaarutaavoq Jesusip maligassiaa ajunngilluinnartoq eqqarsaatigissallugu — silarsuarmut ajugaasimammat! (Juá. 16:33) Eqqaamakkit apustilit annertuumik misilinneqalerlutik nakimanatik oqaaserisaat: ’Guuti inunnit naalattariaqarneruvoq.’ — ap. sul. 5:29.
4 ’Nigortut ilaginngilaatigut’: Suliatsinnut ajunngitsumik isummertaaseqartuaannartariaqarpugut. (Epr. 10:39) Eqqaamajuaannaruk Jehovap uagutsinnik aallartitsinera inuiannut tamanut asanninneranut naakkinninneranullu ersiutaammat. Kiffani suunngitsunik piumaffiginngisaannarpai. Suliassiissutigineqartut suulluunniit naggataatigut Guutimik asannittunut iluaqutissanngorumaarput. — Rûm. 8:28.
5 Ajunngitsumik isiginnittaaseqarnitta savanik assersuutaasunik oqaluussisarfitsinni ujaasitittuassavaatigut. Inuit soqutigisaqannginnerujussuat isigisinnaavarput paatsiveerusimaarnerannut neriuuteqannginnerannullu ersiutaasutut. Asanninnitta killittariaqarpaatigut misiginneqatiginissaannik naammagittarfiginissaannillu. Atuagassianik tunisisimagaangatta imaluunniit malugigutsigu soqutiginninnermik annikikkaluamik ersersitsisut, anguniagarisariaqarparput sukkasuumik pulaaqqinnissaat soqutiginninnerulersinniarlugit. Biibilimik atuaqqissaaqateqarnissamik aallartitsisinnaanerput ingerlatsisinnaanerpullu qularutiginngilinngisaannartigu. Akerlianilli Jehovamik ikiorneqartuaannarnissarput siulersorneqarnissarpullu qinunikkut ujartorniartuartariaqarparput, tatigilluinnarlugu ikiorumaaraatigut.
6 Upperilluinnarparput suliarput Jehovap naammassiumaaraa. (Naleqqiuguk Filípimiunut agdlagkat 1:6.) Ikiortissatut taassumunnga tatiginnilluinnarnitta nakussatsippaatigut ’ajunngitsuliornissamut arajutsinnginnissatsinnut’. — Gal. 6:9.