Ileqqorissaarnikkut nalunaajaaneq
1 Ullutsinni allanngujaqisumik pissusilinni inuusuttut amerlasuut ikiaroornermik, ileqqorluttumik inooriaaseqarnermik, pikititsiumatunermik, nakuuserniarnermillu kingunerisai atortariaqartarpaat. Paarlattuanik qiimmannaqaaq kristumiut ilagiissaanni inuusuttut ileqqorluttunngorsimanngitsut maligassaalluartullu takullugit. Taakkua Jehovap isaani ileqqorinnerat kusanartuuvoq sakkortuumillu nalunaajaataalluni nutaanik sallusuissummut qaninnerulersitsisinnaalluni. — 1 Pît. 2:12.
2 Kristumiut inuusuttut ileqqorinnerat avataaniittunut sunniuteqarluartarsimavoq. Ilinniartitsisup ilinniartitani tamaasa oqarfigisimavai ilinniartitami ilaat Jehovamut nalunaajaasuusoq, oqarfigalugillu niviarsiaqqap Guutia, Jehova, tassaasoq Guuti ilumoortoq. Taama oqarsimavoq niviarsiaraq taanna torersumik pissuseqartuaannarmat. Ilinniartitsisoq alla Peqatigiiffimmut allassimavoq: „Nersorniarpassi upperisassi iluanni inuusuttortasi pitsaangaartut pillugit. . . Inuusuttortasi ilumut maligassiuilluarput. Utoqqaanerusunut ataqqinnittuupput, inussiarnersuullutik aammalu atisalersoriaasiat malunnaarsaartorsuunani. Biibilimillu nalunngisaqarluinnartuullutik! Tassa aatsaat upperisalinnik taasariallit!“
3 Nukappiaqqap arfineq-marlunnik ukiullip saqilluarnera ilinniartitsisuanut sakkortuumik sunniuteqarsimavoq. Nukappiaqqap nukappiaqqanit allanit allaanerulluinnarluni saamanera pissuserinneralu ilinniartitsisuata iluareqaa. Maluginiarsimavaattaaq upperisani ilumoorukkaa, allaaneruninilu kanngusuutiginagu. Nalunngeqatiginnissusia ilinniartinneqarsimasoq sunalu ’ajunngitsuusoq ajortuusorlu immikkoortissinnaagai’ takusinnaasimavaa. (Epr. 5:14) Nukappiaqqap anaanaata ilinniartitsisoq pulaarsimavaa, atuaqqissaaqatigiinnerlu aallartinneqarsimalluni. Ilinniartitsisoq kingusinnerusukkut kuisissimavoq piffissarlu annertooq oqaluussisartunngorsimalluni.
4 Angut inuusuttoq atuarfimmi oqaluussisartup nivissap ileqqorinneratigut ajunngitsumik sunnerneqarpoq. Niviarsiaraq allanit allaanerulluinnarsimavoq — ilasseraarluni, eqiasuilluni atisalersoriaasigissaarlunilu. Nivissanut allanut naleqqiullugu nukappiaqqanut qaninnianngisaannarpoq. Angutip inuusuttup takusinnaasimavaa Biibilip najoqqutassiai maleruarluarai. Upperisaa pillugu apeqqutilliiffigaa akissutigisaanullu tupigusussimalluni. Biibili atuaqqissaartalerpaa, kuisilluni, kingusinnerusukkullu pioneeritut Betelimilu kiffartulerluni.
5 Kristumiuuguit inuusuttoq allanut nalunaajaarusuttoq ileqqutit sianigisariaqarpatit. Najoqqutassatit qasukkarnaveersaakkit silarsuup matuma inuisa inooriaasiannik pissuserisaannillu akuerinnikkiartuaarnaveersaarnikkut. Oqaluttarnikkut, atisalersoriaatsikkut, ileqqorinnikkullu maligassaalluarit, oqaluussinerinnaanngitsukkut ataatsimiinneriinnaanngitsukkullu, aammali atuartillutit sunngiffinnilu. (1 Tim. 4:12) Nuannaarutigissannginnerpiuk ileqqorissaarlutit ’qaamasunnik inunnut allanut qaamatitsinerit’ pissutigalugu sallusuissummik soqutiginnittoqaleraluarpat? — Mat. 5:16