Pioneeritut kiffartorneq ilinnut naleqquppa?
1 „Allamik suliaqarnissara takorloorsinnaanngilara. Takorloorsinnaanngilluinnarparalu allamik taamatut nuannaarutissarsinartigisumik nassaassaqarsinnaanersoq.“ Taamatut oqarsimavoq Jehovap nalunaajaasuisa hundredetusindilikkuutaat piffissaq tamaat oqaluussisartuunermik inuunerminni pingaarnerpaatitsisut ilaat. Pioneeritut kiffartorneq ilinnut naleqqunnersoq qinunikkut eqqarsaatigeqqissaarsimaviuk? Jehovamut tamakkiisumik tunniulluinnarsimagatta Guutip Naalagaaffia pillugu nutaarsiassap nuannersup siaruarternerani peqataanerusinnaanerluta eqqarsaatigeqqissaartariaqarparput. Pioneeritut kiffartorneq pillugu amerlasuut apeqqutigisartagaasa ilaat takoriartigik.
APEQQUT 1: „Pioneeritut kiffartorneq tamanunngitsoq naleqquttoq tusarsimavara. Qanoq ilillunga nalunngissinnaavara uannut naleqqunnersoq?“
2 Tamatumunnga akissut pissutsinit atukkannit pisussaaffinnillu Biibilimi inassutigineqartunit aalajangerneqarpoq. Amerlasuut peqqiilliornertik pissutsilluunniit maannakkut atukkatik pissutigalugit qaammatit tamaasa oqaluussinermi nalunaaquttap-akunneri 90-it angusinnaanngilaat. Assersuutigisinnaavavut qatanngutit arnat aalajaatsorpassuit kristumiutut nuliatut anaanatullu maligassaalluartut. Pissutsit atukkatik naapertorlugit oqaluussinermi peqataasarput. Periarfissat tamaasa atorlugit ikiorti-pioneeritut kiffartortarput oqaluussinermilu peqataanerunerup nuannersortai misigisarlugit. (Gal. 6:9) Pissutsit maannakkut atukkamik pioneeriusinnaatinngikkaluaraatik pioneeritut anersaaqarneq siuarsartarpaat oqaluussisartutullu aallussilluartutut nutaarsiassap nuannersup oqaluussissutigineqarnerani ilagiinni suleqataalluartuullutik.
3 Qatannguteqarporli pisussaaffippassuaqanngitsunik, inuunerminni pingaarnersiuillutik tulleriissaarinermikkut pioneeritut kiffartornissamut inissaqartitsisunik. Soorlu inuusuttut tunngaviusumik ilinniarnerminnik naammassinnissimasut, qatanngutit arnat ilaqutariit pilersussallugit naammattunik aningaasarsiortunik uillit, utoqqalinersiutillit aappariillu nukangasunik meeraqanngitsut. Pioneeriussanerluni imaluunniit naamik inuttut nammineq aalajangigassaavoq, unali apeqqutaavoq: ’Illit pioneeritut kiffartorneq inissaqartissinnaaviuk?’
4 Satanip aaqqissuussinini atorlugu inuunerput allamut saasaarisunik immerniarsaraa, soqutigisanillu namminissarsiortunik ulapitinniarsaraluta. Silarsuarmut ilaannginnissarput aalajangiusimaannarutsigu Guutip Naalagaaffiata soqutigisaanik salliutitsinissatsinni kiffartornermilu immikkut pisinnaatitaaffinnik angusinnaasatsinnik tigusinissatsinnut Jehovap ikiussavaatigut. Pissutsit atukkatit pioneeriusinnaanngorlutit aaqqissinnaagukkit soormi taamaalioruit?
APEQQUT 2: „Pioneerinngussaguma aningaasat tungaatigut iluatsissanerlunga qanoq qulakkeersinnaavara?
5 Ilumoorpoq nunani amerlasuuni inuunermi pisariaqartutut isigineqartut pissarsiariniarlugit siornatigornit nalunaaquttap-akunnerini amerlanerusuni sulisoqartariaqarmat. Taamaakkaluartoq amerlasuut ukiuni qulikkuutaani pioneeritut kiffartorsimapput, Jehovallu pilersortuarsimavai. Pioneeritut iluatsissagaanni uppissuseqartariaqarpoq imminullu tunniusimasariaqarluni. (Mat. 17:20) Tussiaat 34:11-mi ima neriorsoqqissaarneqarpugut: ’Jehovamik ujarlersut ajunngitsumik sumilluunniit ajorsaateqassangillat.’ Pioneeritut kiffartulersut taamaaliorsinnaapput Jehovap isumagissagaatik tatigilluinnarlugu. Pioneerit aalajaatsorpassuit tamanna uppernarsarsinnaavaat. (Tus. 37:25) Tásalûníkamiunut agdlagkat áipait 3:8, 10-mi aamma Timûtiusimut agdlagkat sujugdlît 5:8-mi najoqqutassianut naapertuuttumik pioneerit aningaasat tungaatigut allanit tapersersorneqarnissartik naatsorsuutiginngilaat.
6 Jesusip oqarneratut pioneeritut kiffartorusullutik eqqarsartut ’ingillutik akissaa naatsorsoqqaartariaqarpaat’. (Lúk. 14:28) Taamaaliorneq ilisimassummut atoriaannaasumut ersiutaavoq. Ukiorpassuarni pioneeriusimasut oqaloqatigikkit. Jehovap qanoq isumagisimanerai aperikkit. Nakkutilliisoq angalasartoq pioneeriuvoq misilittagaqarluartoq qanoq ilillutit iluatsissinnaanersutit siunnersuuteqarusuttoq.
7 Jesusip Matîuse 6:33-mi neriorsuutaata ilumoornera tamakkiisumik misiginngisaannassavarput tamakkiisumik Jehovamut tunniutinngikkutta. Pioneeri aalajaatsoq oqaluttuarpoq: „Pioneereqatigalu oqaluussiffigisassatsinnut nutaamut tikeqqaaratta naatitaalunnguit makkariinalu kisiisa pigaavut, aningaasaateqaratalu. Unnukkut tamaasa nerivavut oqarluta: ’Aqagussamut sussaqanngilagut.’ Tamanna Guutimut saqqummiupparput. Aqaguani nalunaajaasut ilaat tamaani najugaqartoq aggerpoq ima oqarluni: ’Jehova qinnuigisimavara pioneerinik maanga aallartitseqqullugu. Maanna taamaalioreermat ulloq naangajallugu angalaaqatigisinnaalerpassi, nunaannarmili najugaqarama ilissinnut neriartortariaqarpunga, tamatsinnullu nerisassanik nassarpunga.’ Nassatai tassaapput nersussuup neqerujussua naatitarpassuillu.“ Tupinnanngilaq Jesusip neriorsoqqissaarmatigut ’inuunerput isumakuluutigisariaqanngikkipput’. Taava ima nangippoq: ’Kina arlarsi tallisut takitigisumik imminut [inuunini] tallisissinnaavaa isumakuluutigigaluarlugu.’ — Mat. 6:25, 27.
8 Silarsuaq avatangiiserput nunap piinik pingaartitsiartuinnarpoq, malinnaaqqullutalu tatineqartuaannarpugut. Maniguullutali piffissaq tamaat kiffartorneq pingaartikkutsigu pigisakinneruneq naammagissavarput. (1 Tim. 6:8) Pioneerit pilimanianngitsumik naammagittartumillu inuusut kiffartornissamut piffissaqarnerupput allallu sallusuissummik ilinniartinneratigut nuannaarneq annerusoq anersaakkullu nukiit annerusut pisarlugit. Imminut naaggaarfigisutut inuuniarsarinngillat, aningaasalli tungaatigut atukkamik oqimaaqatigiissumik isigineratigut pioneeritut kiffartornerup pilluaqqussutai nuannaarutigisinnaalersimavaat.
9 Ulluni kingullerni inuunerput silarsuullu ajortup matuma piffissaata naalernera malugilluarsimagukku, periarfissani tamani nutaarsiassap nuannersup oqaluussissutiginissaanut pilliutigisariaqakkavit pilliutiginissaannut anersaakkut kajumissuseqassaatit. Aningaasat tungaatigut atukkavit eqqarsaatigeqqinneratigut Jehovallu assaanut tunniunneratigut imaassinnaavoq piffissaq tamaat oqaluussisartunngornissamut periarfissaqarlutit paasigit. Naak pioneeriuniarlutit nunap piisa ilaat piginngitsoortariaqaraluarlugit Jehovap akillutit pilluaqqungaarumaarpaatit. — Tus. 145:16.
APEQQUT 3: „Inuusuttuaraavunga. Sooq pioneeritut kiffartorneq suliassatut pingaarnertut eqqarsaatigissavara?“
10 Ukiuni atuarfigisanni kingullerni inuutissarsiut suna qinissanerlugu eqqarsaatigigakku paasinarpoq. Soorunami siunissaq toqqissisimanartoq, pilluarnartoq nalerisimaarnartorlu piumassavat. Atuarfimmi siunnersuisartut immaqa atorfik aatsaat ukiorpassuarni ilinniareerluni anguneqarsinnaasoq ilinnut qinertinniarsaraat. Kristumiutulli nalunngeqatiginnissutsivit ajoqersorneqarluarsimasup oqaluttuuppaatit sapinngisamik annertunerpaamik Jehovap kiffartorfiginissaanut piareersartariaqartutit. (Nal. oq. 12:1) Immaqalu siunissami katikkusupputit meerartaarusullutillu. Qanoq iliussavit?
11 Maannakkut aalajangikkatit siunissami inuunerpit ingerlanissaanut aalaajangiisuusinnaapput. Jehovap nalunaajaasuatut tunniulluinnareersimaguit kuisissimallutillu, uummammik tamakkiisumik Jehovap kiffartorfiginissaa angerfigereersimavat. (Epr. 10:7) Periarfissami siullermi qaammat ataaseq marlulluunniit ikiorti-pioneeriuneq misilissinnaavat. Tamanna nuannersunut akisussaaffeqarnermullu pioneeritut kiffartornermut atasunut qilanaartuutigissavat, inuunerillu qanoq atortariaqarnerit paasinerulersinnaavat. Atuartuujunnaarnerup kingorna tunngaviusumilluunniit ilinniagaqareernerup kingorna ulloq naallugu suliffittaarnak, soormi pioneeriuneq misilikkukku? Inuunerminni kingusinnerusukkut aatsaat pioneeritut kiffartulersut siusinnerusukkut aallartissimannginnertik peqqissimissutigisimavaat.
12 Aappaqanngitsutut piffissaq tamaat kiffartornerup nuannaarutigisinnaanera atorluaruk. Siunissami aappartaarusukkuit, pioneeritut kiffartoqqaarnermit allamik pitsaanerusumik aappariinneq tunngavissaqanngilaq. Inersimalluarnerulernerit anersaallu piinik aallussilluarnerulernerit ilutigalugit, immaqa aappat taamatut isumalik pioneeritut kiffartoqatigerusussavat. Aappariit pioneeritut kiffartoqatigiittut, kingusinnerusukkut nakkutilliisutut angalasartutut kiffartulersimapput ajoqersuiartortitanngorlutilluunniit. Tamanna tassaavoq inuuneq nalerisimaarnangaartoq.
13 Qanorluunniit sivisutigisumik pioneeriusinnaagaluaruit, taamatut kiffartorsimanerpit ilinniartitaanerit naammattunngortissavaa ilinniartitaanermillu suliamit allamit pisinnaanngisannik tunillutit. Pioneerit imminut naalakkersinnaaneq piffissamillu aaqqissuussineq ilinniartarpaat. Allanut saaffiginninneq oqaloqateqarnerlu, Jehovap tatiginissaa qanilaarnerlu inussiarnernerlu — piginnaassutsit akisussaaffimmik annerusumik tigusinissamut iluaqutaasinnaasut — ilinniartarpaat.
14 Inuuneq aatsaat taama nalorninartoqartigaaq. Jehovap neriorsuutigisai eqqaassanngikkaanni inuunermi ikittuinnaat allanngorsimassanngillat. Maanna siunissat ilinnut ammammat, pitsaanerusumik piffissaqassanerpa ukiuni tulliuttuni inuunerit qanoq atussanerlugu eqqarsaatigissallugu? Pioneerinngornissamut periarfissaq eqqarsaatigilluaruk. Pioneeritut kiffartorneq inuuninni suliassatut qinerukku peqqissimissutiginngisaannassavat.
APEQQUT 4: „Pioneeritut nalunaaquttap-akunneri angusassat anguniarnerat artornanngila? Nalunaaquttap-akunnerinimmi kinguaattooruma?“
15 Pioneeriuniarluni qinnuteqaatip immersornerani apeqqut imaattoq akeqquneqartarpoq: „Pissutsit atukkatit imatut aaqqissorsimavigit kiffartornermi minnerpaamik piumasaqaatit ukiumut nalunaaquttap-akunneri 1000-it angusinnaasorilerlugit.“ Anguniakkat tamakkua anguniarlugit ullormut nalunaaquttap-akunneri pingasut missaanniittut kiffartornermut atorneqartariaqarput. Paasinarpoq pilersaarusiorluartoqartariaqartoq imminullu naalakkersinnaasariaqarluni. Piffissaq tamaat kiffartortut amerlanersaat qaammatialuit ingerlaneranni sungiussilluartarput.
16 Soorluli Nalunaajaasup oqaasii 9:11-mi allassimasoq tamatta ’piffissat nalaatsornerillu’ ataanniippugut. Nappaat sualuttoq ajornartorsiulluunniit siumut naatsorsuutiginngisaq pissutigalugu nalunaaquttap-akunnerinik kinguaattoorsinnaavugut. Sivikitsumik ajornartorsiut pineqarpat ukiullu kiffartorfiusup aallartinnerani pippat, immaqa pioneerip ullormut nalunaaquttap-akunneri amerlanerusut atorneratigut kinguaattoorutit angusinnaavai. Ukiulli kiffartorfiusup naalernerani ajornartorsiut annertooq takkuppat pioneerillu nalunaaquttap-akunneri angusinnaanngippagit?
17 Pioneeriullutit qaammatit arlallit napparsimassagaluaruit allamilluunniit pisariaqavissumik illit sunniuteqarfigisinnaanngisannik pissuteqarlutit nalunaaquttap-akunneri piumasaqaataasut angusinnaanngikkukkit, ilagiit kiffartornermut ataatsimiititaliaanni utoqqaanertamut saaffiginnissinnaavutit ajornartorsiullu nassuiarlugu. Nalunaaquttap-akunneri kinguaattoorutitit kingusinnerusukkut angunianngikkaluarlugit pioneeritut ingerlaannarnissat utoqqaanertat inassutiginartippassuk, allatsip oqaluussisartutut oqaluussisimanerpit nalunaarsuiffiani allassavaa. Tamatumani pioneerujunnaarallarneq pineqanngilaq, pissutsilli atukkatit immikkut eqqarsaatigineqarput. — Takuuk Rigets Tjeneste-mut aggusti 1986-imoortumut ilanngussami qupperneq 3, immikkoortoq 18.
18 Pioneerit misilittagartuut ukiup kiffartorfiusup aallartinnerani nalunaaquttap-akunnerinik siuarniarsarisarput. Pioneeritut kiffartorneq pingaarnerpaatikkamikku sammisassat allat ilaannikkut annikillisartariaqartarpaat. Pilersaarusiornerlunneq imminulluunniit naalakkersinnaannginneq pissutigalugu pioneeri nalunaaquttap-akunnerinik kinguaattooruni, piffissap amigaataasup anguniarnissaa akisussaaffigalugu misigisariaqarpoq, immikkullu pineqarnissani naatsorsuutigisariaqanngilaa.
19 Ilaannikkut pioneeri allanngortissinnaanngisaminik nalaataqartarpoq. Katsorsarneqarsinnaanngitsumik nappaateqarneq, ilaqutariinni akisussaaffik annerusoq ajornartorsiutilluunniit allat pissutigalugit isummersinnaavoq piffissami sivisuumi nalunaaquttap-akunneri piumasaqaataasut angusinnaanagit. Taamaassappat silatusaarnerussaaq ilagiinni oqaluussisartutut ajornanngikkaangallu ikiorti-pioneeritut kiffartulerpat. Pissutsit atugaasa nalunaaquttap-akunneri piumasaqaataasut angusitissinnaanngippagit pioneeriuinnarnissaanut nalinginnaasumik immikkut aaqqissuussaqanngilaq.
20 Neriuutigaarput pissutissaqaraangat immikkut iliuuseqartoqarsinnaaneranik aaqqissuussineq suli amerlanerusunik pioneerinngortitsiumaartoq. Aammattaaq tamatuma piffissaq tamaat oqaluussisartooreersut pioneeriuinnarnissaannut kaammattussavai. Pioneerit nuannaarlutik kiffartornissaat kissaatigaarput.
APEQQUT 5: „Suliara nuannaarutigerusuppara, naammassisaqartutullu misigerusullunga. Pioneeritut kiffartornerup taamatut misigitissinnaavaanga?“
21 Jehovamut qanittumik attaveqarneq aalajaallunilu kiffartuullugu qulanngilluinnarneq pilluarnermut ilumoortumut annertuumik aalajangiisuuvoq. Jesusip ’tipaatsuutissaq imminut saqqangiussaq pillugu’ nappagaq naalliutsitaaffik naammagalugu atorsimavaa. (Epr. 12:2) Taassuma nuannaarnera Guutip piumasaatut iliorneranit pivoq. (Tus. 40:9) Pissutsit aaqqissuussaaneranni maannakkut atuuttumi pilluarneq ilumoortoq angusinnaavarput sammisartakkatta amerlanersaat Jehovamut pallorfiginninnermut atassuteqarpata. Anersaakkut suliassat siunertaqarnermik misigitittarpaatigut eqqortutut qamuuna nalunngisarput suliarisaratsigu. Tunisineq pilluarnartuuvoq, immitsinnillu tunniussinnaasarput pitsaanerpaaq tassaavoq Guutip silarsuaani nutaassami inuunermik naassaanngitsumik qanoq angusaqartoqarsinnaanersoq pillugu allanik oqaluttuussineq. — ap. sul. 20:35.
22 Pioneeri immikkoortumi siullermi eqqaaneqartoq oqarpoq: „Atuaqqissaaqatigisartagaq iliuuseqalerluni Jehovamik unnersiutiginnittunngoraangat nuannaarneq allamit nallernissaqarnerpa? Tupinnarlunilu uppernikkut nakussatsinnartaqaaq takullugu qanoq sakkortutigisumik Guutip oqaasiata inuit Jehovamut iluarisaasinnaaqqullutik inuunerminni allannguinissaannut kajumissisissinnaagai.“ (Takuuk Napasuliaq Alapernaarsuiffik 1. novembari 1997-imoortoq, quppernerit 19-24) Suup nuannaalersittarpaatit pillualersillutillu? Ataavartut siunertaqartullu pingaartikkukkit, nuannaarnartut qaangiutiasut silarsuup neqeroorutai pinnagit, pioneeritut kiffartornerup pilluarnermik angusaqarluartutut misiginermit pisumik tunisinnaavaatit.
APEQQUT 6: „Inuunermik naassaanngitsumik pisinnaanermut pioneeritut kiffartorneq piumasaqaataanngimmat, pioneeriussanerlunga uanga nammineq aalajangigassarinngilara?“
23 Soorunami ataasiakkaat pioneeriussanerlutik namminneq aalajangigassaraat. Jehovap kisimi pissutsit atukkatit allat susassarinngisaat eqqartuussinnaavai. (Rûm. 14:4) Eqqortumik naatsorsuutigaa uummatikkut isumakkullu iluunngarluta, aammattaaq tarnikkut iluunngarluta nukivullu tamakkerlugit, kiffartorfigissagitsinni. (Mák. 12:30; Gal. 6:4, 5) Nuannaarluni tunisisoq, piumaalliornani pinngitsaalisaananiluunniit kiffartortini, asavaa. (2 Kor. 9:7; Kul. 3:23) Piffissaq tamaat oqaluussisartoorusunneq Jehovamut oqaluussisarfinnilu inunnut asanninnermik aallaaveqassaaq. (Mat. 9:36-38; Mák. 12:30, 31) Taamatut misigiguit, pioneeritut sulineq eqqarsaatigilluartariaqarpat.
24 Neriuppugut paasissutissat tamakkua pioneeritut kiffartorsinnaanerlutit periarfissannik eqqarsaatiginninninni iluaqutigissagitit. Pissutsit atukkatit pioneerinngorsinnaanngorlutit aaqqissinnaavigit? Matuma ataaniippoq pioneerinut nalunaaquttap-akunneranut pilersaarusiorfissaq. Sapaatit-akunneri tamaasa agguaqatigiissillugu nalunaaquttap-akunneri 23-t oqaluussinermi atorsinnaanerlugit misissoruk. Jehova tamakkiisumik tatigiuk. Ikiuineratigut iluatsissaaq. ’Pilluaatissiissutinik killiligaanngitsunik kueraaffigiumalluta’ neriorsuisimavoq. — Mal. 3:10.
25 Pioneeritut kiffartorneq ilinnut naleqquppa? Ima oqaruit: ’Aap, naleqquppoq!’, taava qaqugu pioneeritut aallartinniarlutit ulluleruk, qularutiginngilluinnassavallu inuunermik pilluarnartumik Jehovap pilluaqqujumaaraatit!
[Qupp. 6-mi nalunaarsugaq]
(Allassimasut qanoq inissisimanersut naqitami takuneqarsinnaavoq)
Pioneeritut kiffartornermi sapaatip-akunneranut skemara
ATAASIN. Ullaap-tungaa
MARLUN. Ullaap-tungaa
PINGASUN. Ullaap-tungaa
SISAMAN. Ullaap-tungaa
TALLIMAN. Ullaap-tungaa
ARFININ. Ullaap-tungaa
SAPAAT Ullaap-tungaa
ATAASIN. Ualikkut
MARLUN. Ualikkut
PINGASUN. Ualikkut
SISAMAN. Ualikkut
TALLIMAN. Ualikkut
ARFININ. Ualikkut
SAPAAT Ualikkut
ATAASIN. Unnukkut
MARLUN. Unnukkut
PINGASUN. Unnukkut
SISAMAN. Unnukkut
TALLIMAN. Unnukkut
ARFININ. Unnukkut
SAPAAT Unnukkut
Ullunut tamanut nalunaaquttap-akunneri aqerluusamik allakkit.
Sapaatip-akunneranut agguaqatigiissillugu nalunaaquttap-akunneri 23-t oqaluussinermi atornissaat pilersaarutigiuk.
Nalunaaquutap-akunneri katillugit ____________________