Apeqquteqarfik

◼ Nakkutilliisut ataatsimiinnermi meeqqat naleqquttumik pissuserissaartinniarlugit angajoqqaat qanoq ikiorsinnaavaat?

Meeqqat pissusissamisoortumik aalassarissuupput sivisuumillu eqqissillutik issiasinnaanatik. Ataatsimiinnerup kingorna meeqqat issiakatassimallutik nukissanissimasarput meeraqatitillu naalagaaffilersaarfimmi, inini allani, biilinik inissiisarfimmi imaluunniit aqqusinermi arpaqattaarlutik pinnguaqatigiikkumasarput. Ilumoorpoq ussatini allassimammat ’meeqqap isumamineersitap anaanani kanngusuutissiortaraa.’ — Uss. 29:15.

Ajoraluartumik qatanngutit utoqqaat ilaat ajutoorujussuarput meeqqanik arpattunik sakanneqarlutik uppitinneqaramik. Pisariaqanngitsumik erloqinartorsiortinneqarput immaqalu angajoqqaat ilagiillu pisariaqanngikkaluartumik akissaajartariaqarsimallutik. Namminneq allallu isumannaassusiat eqqarsaatigalugu meeqqat naalagaaffilersaarfiup iluani silataanilu arpattaqattaartussaanngillat pinnguaqqusaanatillu.

Biibili naapertorlugu angajoqqaat pallorfiginnittarfipput naleqquttumik ataqqisariaqarneranik meeqqamik ilinniartinnissaat akisussaaffigaat. (Nal. oq. 5:1a) Kristumiutut ataatsimiinnitsinni ataatsimeersuarnitsinnilu ’tamatigut ippinnanngitsumik nalinginnanngitsumillu’ pisugut takuneqarsinnaasariaqarpoq. (1 Kor. 14:40; Kul. 2:5) Angajoqqaat ataatsimiinnerup siornagut, nalaani kingornagullu meeqqatik nakkutigisariaqarpaat, naalagaaffilersaarfiup iluani silataanilu. Meeraq arpaqattaarpat naalanngippalluunniit ataatsimiinnermi nakkutilliisup meeraq saamasumik unitsissinnaavaa nassuiaallugulu sooq taamaalioqqusaanngitsoq. Meeqqap angajoqqaavi aamma ajornartorsiummik tamatuminnga meeqqallu nakkutiginissaata pisariaqassusianik inussiarnersumik eqqaasinneqartariaqarput. Angajoqqaat tamanna ajuallaatigisariaqanngilaat.

Tupinnanngilaq naalungiarsuit meeraaqqallu ilaatigut ataatsimiinerup nalaani qiasarmata imaluunniit eqqissiveeruttarmata. Nakkutilliisut, ataatsimiinnissaq sioqqullu minutsit 20-it takkuttartut, ataatsimiittarfimmi issiaviit tunorliit angajoqqaanut meeqqaminnik issiaqateqarumasunut inniminniisinnaapput. Allat suleqataasariaqarput issiaviit taakkua atunnginnissaannut.

Meeraq akornusersuippat angajoqqaat iliuuseqartariaqarput. Iliuuseqanngippatali akornusersuineralu ajoqutaalluni ataatsimiinnermi nakkutilliisut ilaasa angajoqqaat inussiarnersumik qinnuigisariaqarpaat meeraq tigullugu silarlermukkaateqqullugu. Soqutiginnittut meerallit qaaqqusavut issiaqatigisariaqarpavut meeraallu qiappata imaluunniit akornusersuippata ikiorumallugit neqeroorfigineqarsinnaapput.

Naalagaaffilersaarfimmi meeqqat mikisut angisuullu takullugit Guutillu illuani ileqqorissaarnerat malugalugit nuannaarutigaarput. (1 Tim. 3:15) Jehovap pallorfiginninnermut aaqqissuussaanut ataqqinnikkaangatta Jehovamut ataqqinaataasarpoq ilagiinnilu pingaartinneqarluni.