Allat pisariaqartippaatsit
1 „Isi assammut oqarsinnaanngilaq: ’Atorfissaqartinngilakkit.’“ Isip assak timimit peeruniuk ulorianartumut qanoq taava illersorniassava? Taamatut apustili Paulusip inuup timaata pisatai assigiinngitsut atorlugit ilagiinniittut tamarmik imminnut pisariaqartinnerannik assersuusiorpoq. Aammattaaq allappoq ’avatit sanngiinnerpaasutut ittut tassarpiaasut pisariaqartut’. Aap, allat pisariaqartippavut, allallu pisariaqartippaatigut. Taamaattumik pingaaruteqarpoq immitsinnut ’isumassoqatigiinnissarput’, avateqatigiikkatta. (1 Kor. 12:21-27; Ef. 4:25) Kiffartuusseriaatsivit ilaat maligassiuinivillu allanut sunniuteqartarnera isumaliutigeriaruk.
2 Ilaqutanni: Aappariit nakussatseqatigiissinnaapput upperisaminnik, aalajangiusimasaminnik ilungersuussaminnillu imminnut ersersitsivigisarunik, anersaakkut anguniagaqaannarnissaminnut iluaqutigisinnaasaminnik. Angajoqqaat isiginnittaasiat maligassiuinerallu meeqqat kiffartornermut ataatsimiinnernullu isiginnittaassiannut sunniuteqangaartarputtaaq. — Jos. 24:15.
3 Oqaluussinermi: Guutip naalagaaffia pillugu nutaarsiassamik nuannersumik oqaluussinermik ilungersuussinerpit oqaluusseqatigisartakkatit oqaluusserusunnerulersissavai. Maligassiuinerit allanillu ikiuillutit oqaluusseqateqartarnerit pingaaruteqartorujussuuvoq. (2 Thes. 3:9) Pioneerittaaq angalaaqatiserineqarnertik pingaartigaassavaat. Soqutiginnittut oqaluussinermi naapitavit soorunami aamma takkuteqqinnissat inuunerullu aqqutaatiguulernissaminut ikiuinissat ilimagaat. Pakatsisittariaqanngilatit.
4 Ilagiinni: Qatanngutinnut arnanut angutinullu ataatsimeeqataanerit peqataanerillu qiimmassaataavoq. Najuutinngikkuit ilinnuinnaq ajoqusinngilatit. Ataatsimeeqataanerit allanut iluaqutaasussaagaluaq iluaqutaanngitsoortarpoq. Utoqqaanertattaaq atorfissaqartippaatit, soorlu illit taakkua atorfissaqartikkitit. Isumalluartuunerit piumassuseqarlutillu tapersersuinerit savanik paarsisutut sulinerannut kajumissaataavoq.
5 Oqaatsikkut iliuutsikullu ’immitsinnut isumageqatigiinniarta asaqatigiinermut ajunngitsuliornermullu kajumissaaqatigiittarluta’. (Heb 10:24) Unneqqarillutalu ilumoorfiginnikkaangatta Jehovap pilluaqqusarpaatigut.