Pisariaqavissut maleqqissaartarpavut
1 Inuunermik isiginnittaaserput qanorlu atorneripput inuunermik Pilersitsisumut ataqqinninnermik qujamasunnermillu ersiutaapput. Inuuneq tunissutaavoq erlinnartoq, inuunermillu Tunisisumut akisussaassuseqarluta misigivugut. Inuunerup illernassusianik Taassumatut isiginnittaaseqarusuppugut tamannalu aammik ingalassimanninnitsigut takutillugu. — ap. sul. 15:28, 29.
2 Nakorsat amerliarluttuinnartut nakorsiartut allattugaataat qarasaasiamut immiuttalerpaat nakorsallut ilaasa siunnersuutigaat aammut isiginnittaaserput pillugu quppernermut siullermut naqinnernit ANGISUUNIK allassimaqqullugu. Aak atorlugu nakorsartinnginnissannut illit nakorsat qanoq isumaqarpa? Arlaanni suliariteriataassagaluaruit tapersersorunnarpaatit? Suleqatigiilluarneq pingaarutilerujussuanngussaaq nakorsaq napparsimmavimmut suliaritiffissannut saffiginnissappat.
3 2000-imi januaarip aallaqqaataani Danmarkimi Peqqinnissamik ministereqarfiup napparsimmavimmi, ernisunnermi ilaallu ilanngullugit ikiorneqarnissamik pisinnaatitaaneq pillugu nalunaarusiaa atuutilerpoq. Nalunaarusiaq naapertorlugu inuup nakorsartariallip ernisuttulluunniit najugaqarfimmi imaluunniit kommunimi allami napparsimmavimmi ikiorserneqarnissani qinersinnaassavaa. Inissaaleqinerli pissutigalugu aamma nakorsiat illoqarfimmiut imaluunniit illoqarfimmit allaminngaaneersut (qaqutigoortumik paasiuminaatsumillu nappaatillit) kingullinngortinneqassappata nakorsiat illoqarfimmi allaminngaanneersut napparsimmaviup itigartissinnaavai. Ataatsimulli isigalugu nakorsiat namminneq napparsimmavimmik iluarisaminnik toqqaasinnaatitaapput.
4 Tuaviortumik, suliaritinnissannulluunniit piareersarnermi unitsitaassagaluaruit qanoq kissaateqarnerit erngerlutit paasitikkukkit allanut soqutiginninnerussaaq. Siumoortumik peqqussut annertusisaq tunniussinnaavat tassani allassimasoqarmat nakorsaatit suut atorlugit suliaritinnissat kissaatigigit, taannalu allattorsimaffiutinnut ilineqarsinnaavoq. Aalajangersimarpalunnerit kissaatinnillu ilumoorussinitit nakorsat nalunngikkunikkit kinguarsaataassanngillat, aalersortinnallu suliaritinnissat piuminarsarnerussavat. Napparsimmavimmut allamut nuutitaaguit angerlartitaaguilluunniit allattorsimaffiutinni paasissutissat suut nassiunneqassanersut nalunaarutigissavat. Allattorsimaffiutinni paasissutissat siumoortumillu peqqusut pissusissamisoortutullusooq nassiunneqarnavianngillat.
5 Siumoortumik peqqussut annertusisaq nakorsarneqarnissamullu pisussaatitaanermullu allagartaq nutaat immersorneqartariaqarput aatsaat aalajangiussimasannik atorunnaarsitsiniaruit imaluunniit allanngortitsiniaruit. Sukkulluunniit qanorluunniit pisoqartillugu aalersortinnginnissannik aalluunniit akuisa ilaannik (aap aappaluttortaanik qaqortortaanilluunniit, blodpladinik aallu imerpalasortaanik) aalajangiussisimajuarnerit ersersinniarlugu siumoortumik peqqussut nalinginnaasoq ukiut tamaasa nutarsarneqartassaaq. 1992-miilli napparsimmavinni sulisut attuumassuteqartut siumoortumik peqqussut immersorluagaq ataqqiuaannarpaat.
6 Napparsimmavimmi sulisut amerlanerit suliartik toqqarsimavaat inunnik sullissineq nuannarigamikku ikiorusoqigamikkillu. Suleqataalluarusunnerput takutissinnaavarput isumannaallisaanikkut piffissaatillugulu ikiortissarsiornikkut. Aammik annaasaqaataasussamik nappaateqaraanni nakorsiarnissaq kinguartissallugu silatusaarnerussanngilaq. Taamaaliorneq ajortumik kinguneqaratarsinnaavoq nakorsarlu nalornisuulersissinnaallugu. Nakorsiatut immikkut piumasaqaatilittut ikittunnguuvugut, taamaattumik ilimagisinnaanngilarput nakorsat tamarmik aalersortinnginnissamut nakorsaatitigut misilittagaqartuusut imaluunniit atugassat allat ilisimalluinnassagaat. Suliaritinniaruit erniniaruilluunniit utoqqaanertat aqqutigalugit paasissutissanik Napparsimmavinnut Attaveqartitanut piniarsinnaavutit. (kmD 8/9 qup. 4.) Paasissutaasinnaapput ’aalersortinnani’ suliaritinnissamut atortorissaarutit pisariaqavissut napparsimmaviup eqqaaneqartup piginerai napparsimmavimmilu immikkoortortaqarfiit soorliit aattaqanngitsumik suliarinnittarnersut.
7 Suliarinneriaatsit naapertorlugit atortorissaarut cell-saver-imik taaneqartartoq aammut imerpallersaatitut (hæmodilution-imut) aammillu salinninneqarsimasumut milluaatitut aammalu maskinamut uummatip puaallu atortorissaarutaatut atorneqartarpoq. Qanorluunniit atortorissaarut taanna immikkoortortaqarfimmi nalinginnaasumik atorneqartarsimatigigaluarpat, atornissaanut kristumiu piumasaqaateqarpoq, soorlu maskinap imminut atassutaarutinngilluinnarnissaanik aamminillu toqqorsisoqannginnissaanik aallartinnermilu atortorissaarut aammik imerpallassiisoqannginnissaanik.
8 Teknikkikkut, atortorissaarutitigut nakorsaatitigullu atoriaannaasunik allanik aalersortinnissamut taartissamik aatsaat taama siuarsaanermi misissuineqartigaaq. Soorunalimi ilagiit kristumiut misissuinissaq suliariaatsinullu taakkununnga assigiinngitsunut aalajangiinissaq pisussaaffiginngilaat. Ataasiakkaat namminneq nakorsamik oqaloqatiginninnermikkut qulakkeertariaqarpaat atortorissaarutit nakorsaatilluunniit nalunngeqatigiinnissutsiminnut ajoqusiinnginnissaat. (Takuuk „Spørgsmål fra læserne“ Vagttårnet 15. juuni aamma 15. oktobari 2000-imoortumi.)
9 ’Pisariaqartut’ maleqqisaarneratigut Ataatatsinnut qilammiusumut Jehovamut attaveqarluartuarsinnaavugut. (ap. sul. 15:28, 29; Tussiaat 36:9) Jesusip aava iluaqutissatsitut atoreerpaa. Ajortitsinnik isumakkeerfigineqareerpugut Guutimullu saammaannarsilluta. Ilerasuuteqarata silarsuarmi qatanngutivut ilagalugit kiffartuussinnaavarput inuunermillu piviusumik neriuutitta nukittutippaatigut annikilliornernilu maannakkut atuuttuni aggersunilu sapiisertilluta. — Rûm. 5:3-5; 2 Kor. 5:18, 19; Eprîarit 9:4.