Nunarsuarmi inuit pilluarnerpaat
1 „Pilluarput inuiaat [Jehovamik] Guuteqartut!“ Taamatut Tussiaat 144:15-mi allassivoq. Oqaatsit taakkua Jehovap Nalunaajaasui nunarsuarmi pilluarnerpaatut oqaatigaat. Guutimik ilumoortutuamik uumasumillu, Jehovamik, kiffartorfiginniluni pilluarnarnerusoqanngilaq. ’Guuti pilluartuummat’, pallorfiginnittaasa pilluarneq taamaattoq ersersissinnaavaat. (1 Tim 1:11) Pallorfiginninnitta qanoq pillualersippaatigut?
2 Pilluarnissamut pissutaasut: Jiisusip erseqqissarpaa pilluarnissamut tunngaviusoq tassaasoq ’anersaakkut pisariaqartitaqarnermik miserratiginninnginneq’. (NV) (Matt 5:3) Biibilimik atuaqqissaartarnikkut kristumiullu ataatsimiinnerinut tamatigut peqataasarnikkut pisariaqartitaq tamanna matussusersinnaavarput. Sallusuissutsip Guutip oqaasianeersup upperisarsiornikkut ajoqersuutinik eqqunngitsunit aniguisissimavaatigut tammartitaannginnissatsinnullu ikiorluta. (Joh 8:32) Biibilimillu ilikkarsimavarput inooriaaseq qanoq ittoq pitsaanerpaasoq. (Es 48:17) Tamatuma kingunerisimavaa qatanngutigiissuarni kristumiuni pilluartuni ataasiussuseqarneq nuannaarutigisinnaagatsigu. — 1 Thess 2:19, 20; 1 Pet 2:17.
3 Guutip najoqqutassiai qutsissut maleruarlugit nalerisimaarnartuuvoq, nalunnginnatsigu uagutsinnut tamanna illersuutaasoq Jehovalu nuannaartillutigu. (Uss 27:11) Tusagassiortoq allappoq: „Naak sukangasunik inatsiseqaraluarlutik Jehovap Nalunaajaasui atugarliorpasinngillat. Akerlianilli, Jehovap Nalunaajaasui inuusuttut utoqqaallu nuannaarpaseqalutillu ataasiussuseqarpasipput.“ Qanoq ililluta allat taamatut pilluarlutik inooriaaseqalernissaannik ikiorsinnaavavut?
4 Allat pillualernissaannik ikiukkit: Silarsuarmi pilluaatsunik inuppassuaqarpoq, inuillu naliginnaasumik siunissaq taartutut isigisarpaat. Uagulli siunissarput qaamasuuvoq nalunnginnatsigu ullut ilaanni alianartut tamarluinnarmik peerneqarumaartut. (Saqq 21:3, 4) Ilumoorlutik ujaasisut nassaariumagatsigit neriuutitsinnik upperisatsinnillu avitseqatigiumallugit, eqiasuilluta oqaluussiuarpugut. — Ez 9:4.
5 Qatanngut arnaq pioneriusoq oqarsimavoq: „inunnik Jehovamik sallusuissutaanillu ilinniartitsinermit taama nalerisimaarnartigisoqanngilaq.“ Suli amerlanerusut Biibilimik ilinniartitsinermut peqataalernissaannut kajumissaarlugit tamaviaarta. Jehovamut kiffartorneq allallu tassunga kiffartulernissaannik ikiuineq pilluarnerulersitsisarpoq. — ApS 20:35.