Ataatsimiinnerit inuusuttunut iluaqutaasarput
1 Niviarsiaraq 15-nik ukiulik ima oqarsimavoq: „Ilaatigut isumaqartarpunga inuusuttut inuunermi artorsarnerpaajusartut. Inunnik inuunerluttunik, ikiaroortunik imertunillu avatangerneqarsimavugut.“ Illit aamma taama misigisimavit? Taama isumaqaruit, isumaqarpit sunniiniarneq tamanna sakkortooq nammineerluni akiorniarneqarsinnaasoq? Ilimananngilaq. Jehovap aqqutaata naapertuilluartuunera upperilluinnartariaqarpoq uppersuseqarnanimi „Guutimit iluarisaaneq ajornaqaaq.“ (Hebr 11:6) Ataatsimiinnerit kristumiutut upperisannik aalajangiussisimaninnik ajortunillu ingalassimaniniarninnut ikiussavaatit.
2 Ataatsimiinnerit qanoq pissarsiffigisinnaagitit: Ataatsimiinnerni sammineqartartut ineriartornartuupput ulluinnarni ajornartorsiutit kiisalu siulittuutit Biibilimeersut pissanganartut ilanngullugit eqqartorneqartarlutik. Inooriaaseq pitsaanerpaaq pillugu atoriaannaasunik, inuunermilu unamminiarnartunik naapitassanut iluaqutissanik, siunnersuuteqartarpoq. Pisuunnguutaasumik anersaakkullu toqqisisimanartumiilluni ataatsimiittarnerit ikinngutissarsiffigissallugit pitsaanerpaajupput. — Tuss 133:1
3 Teokratiimik Atuarfimmut ilanngukkuit paasissutissanik Biibilimeersunik katersuinissaq, oqalugiaatiliornissaq naalagaaffilersaarfimmilu najuuttunut saqqummiussineq ilikkassavat. Eqqarsaatigeriaruk Guutip oqaasianik ilinniartitsinermut pikkorinnerulernissamut ilinniartitaaneq qanoq iluaqutaatigisoq. Sumi allami taama pingaaruteqartigisunik inuusuttut ilinniartinneqarsinnaappat?
4 Ataatsimiinnerit qanoq pissarsiffiulluarnerusinnaasut: Ataatsimiinerit pitsaanerpaamik iluaqutissarsiffigissagaanni pingasut aalajangiisuupput. Piareersarneq, peqataaneq ilinniakkallu ulluinnarni atornissaat pisariaqarput.
5 Ataatsimiinnissanut piareersartarit: Ataatsimiinnernut piareersarnissannut piffissamik immikkoortitsigit. Piffissaq ataatsimiinnermi pisassanut piareersarfissat ilinniagassanut, suliffinnut sukisaarsaarnissamulluunniit atoqinagu. Aalajangersimasumik malittarisassaqarluni pitsaanerpaavoq. Pingaarnerusumik Teokratiimik Atuarfimmi sapaatip-akunneranut Biibilimi atuagassat malinnaaffigisariaqarpatit. Ullut tamaasa taamaallaat minutsialuinnaat atorlugit kapitalit pineqartut atuarneqarsinnaapput eqqarsaatigineqarlutillu. Piffissamik atuakkamik atuaqqissaaqatigiinnissamut Napasuliaq Alapernaarsuiffik-milu pisassanut piareersarnissamut immikkoortitsigit. Aamma taamaapoq sapaatip-akunneranut oqaluussinermut tunngasumik ataatsimiinnermi sammisassanut.
6 Ataatsimiinnerni peqataagit: Biibilimi allassimavoq Jiisusi 12-nik ukioqarluni naalaffimmi tusarnaarluni, apeqquteqartarluni akissuteqartarlunilu peqataasoq nanineqartoq. (Luk 2:46, 47) Allatut oqaatigalugu tamakkiisumik peqataavoq. Ataatsimiinnerit pissarsiffiginerussavatit sapinngisamik iliuuseqarlutit peqataaniaruit.
7 Pingaarnerusumik ataatsimiinnerit malinnaaffiginiaqqissaartariaqarpatit. Ilaatigut oqalugiaatinut tusarnaarniarneq oqalugiarnermit ajornakusoornerusarpoq. Sooq? Eqqarsaatit allamut sangoqqajaasarmata. Tamanna qanoq qaangerniarsinnaavarput? Allattuinikkut. Kristumiut siulliit ataatsimiigiaraangamik allamik allaatissaqanngikkaangamik qularnanngitsumik marriukkap aseqqukuanik allaatissaminnik nassartarput. Allakkat atuarneqaraangata tusakkatik pilikkimik marriukkap aseqqukuanut allattorsinnaavaat. Allattuilluni malinnaalluarnarnerusarpoq.
8 Ataatsimiinnerit tamaasa akisarnissat anguniagariuk. Nammineq oqaatsinnik akisaruit, Ussatit 15:23-mi allassimasup ilumoornera paasissavat. „Inuk nuannaartarpoq akisinnaagaangami.“
9 Ilikkakkatit atukkit: Alloriarneq kingulleq tassaavoq ilikkagarisimasat ’sunniuteqarsimanersut’ paasiniassallugu. (1 Thess 2:13) Ataatsimiinerni ilikkakkat ajunngitsut malikkaanni Jehova Guutimut qaninnerulernartarpoq. Piviusuunerulertarpoq, ’sallusuissummilu inuuginnaraanni’ nuannaangaarneq nalerisimaangaarnerlu misigineqarsinnaapput. — 3 Joh 4.
10 Inuusuttut ilissi, ataatsimiinnerit iluaqutissarsiffigalugillu nuannaarutissarsiffigisigit aalajangersimasumik piareersartarnikkut, peqataaffiginerisigut ilikkakkassilu atornerisigut. Taava pissarsiaqarfiginerussavasi. Uppernersi nakussatsinneqassaaq, taamatuttaaq Ataatassinnut qilammiusumut Jehovamut aalajaattuarumallusi aalajangernersi nakussatsinneqassaaq. — Tuss 145:18.