Kiffartornermi nalunaarut

Maanna 2010-mi ukiumi kiffartorfiusumi nalunaarusiaq naammassisimalerparput, nuannaarutaavorlu paasillugu Jehovap ‘uppernermut iserfik’ suli inunnut angalaarfigisartakkatsinniittunut ammatimmagu. (ApS 14:27) Biibilimik atuaqqissaaqatigineqartartut agguaqatigiissillugu 126-nik amerleriarsimapput, tamannalu siornamut naleqqiullugu 3 procentimik siuariarneruvoq. Kisitsik qiimmaallaataasoq alla tassaavoq atuakkanik tunioraaneq. Angalaarfigisartakkatsinniittut atuagaq Biibilimi sorpiaat ajoqersuutigineqarpat? tigulluarsimavaat, siornalu ukiumi kiffartorfiusumi atuakkat katillugit 3865-it tunniunneqarsimapput. Tamanna 115 procentimik qaffariarneruvoq. Aamma oqaluussinermi nalunaaquttap akunneri amerlanerusut atorneqarsimapput pulaaqqiinerillu amerlisimallutik. Ataatsimut oqaatigalugu ukiumi kiffartorfiusumi nalunaarusiaq qiimmaallaataasoq.