Sulineq qiimmaallannangaartoq
1. Ullumikkut anersaakkut ajorunnaarsitsinermik sulineq suna suliarineqarpa?
1 Ukiuni hundredelinni siullerni timikkut ajorunnaarsitsinermut isiginnittut uummataanni nuannaarneq angeqaaq. (Luk 5:24-26) Ullumikkut anersaakkut ajorunnaarsitsinikkut ikiuinerput nuannaarutigaarput. (Saqq 22:1, 2, 17) Jehovap oqaasia anersaavalu illernartoq iluaqutigalugit inuit inooriaasiinik qanoq allannguisinnaasimanerannik misigisalikkersaarutit atuarlugit pissanganangaaramik! Sulinermulli tamatumunnga, siuariartortumik Biibilimik atuaqqissaaqateqarnermut peqataaneq pissarsiaqarnarnerungaarpoq.
2. Sallusuissummik ilinniartitsinitsinnik nuannaarneq qanoq ittoq misigissavarput?
2 Guuti qanoq ateqarpa? Sooq naalliuutit akuerai? Guutip Naalagaaffiata inuiaat qanoq iliuuseqarfiginiarpai? Apeqqutit taamaattut akissutissarsillugit nuannaajallaataaginnanngilaq, aammali Biibilimik atuaqqissaaqatigineqartup sallusuissummik ilisarsilluni nuannaajallannera takullugu qiimmaallannaqaaq. (Uss 15:23; Luk 24:32) Biibilimik atuaqqissaaqatigineqartartup siuariartornermini immaqa Jehovap aqqa atortalissavaa immaqalu allatut atisalersoriaaseqalerlunilu isikkorissaarnerulissaaq ileqqupalaanilu tunukkiartorlugit allanullu oqaluussisalerluni. Siuariartornermini tunniulluinnarlunilu kuisikkuni, anersaakkut qatanngutigilerlugulu suleqatigilissavarput. Alloriarnerit tamarmik nuannaarutaasarput. — 1 Th 2:19, 20.
3. Biibilimik atuaqqissaaqateqalerniarluta alloriarnerit atoriaannaasut suut iliuuserisinnaavavut?
3 Suleqataasinnaavit? Qiimmaallannangaartumik suleqataarusukkuit Jehova qinnuigisinnaavat Biibilimik atuaqqissaaqateqarnissaq pisinnaatitaaffigeqqullugu taavalu qinnutitit naapertorlugit suliniuteqarlutit. (1 Joh 5:14) Sumiluunniit qaqugukkulluunniit inoqarfiusumi oqaluussisarit. Periarfissaalluaraangat Biibilimik atuaqqissaarnissamik neqeroortarit. (Oqal 11:6) Soqutiginnittumik naammattoorsiguit sallusuissutillu naatsiiassartaanik ikkussillutit, imerteriartorlugu uteqqigit. — 1 Kor 3:6-9.
4. Sooq piffissap nukingernassusia eqqumaffigalugu Biibilimik atuaqqissaarnissaq neqeroorutigisariaqarparput?
4 Suli inuppassuaqarpoq naapertuilluarnermut kaattunik imerusuttunillu. Anersaakkut pisariaqartitaat matussuserumallugit kiap Biibilimik atuaqqissaaqatigalugit ikiorusuppai? (Matt 5:3, 6) Katersuinerup naammassinnginnerani oqaluussinermut ajoqersuganngortitsiortoqataanermullu kajumilluta suleqataasa. — Es 6:8.