Pioneriunikuuit?
1. Amerlasuut suna pisinnaatitaaffigalugu nuannaarutigisimavaat, sunali ilaannut pisariaqalersimava?
1 Ukiut ingerlaneranni piffissaq tamaat atorlugu kiffartortut tusindillit nuannaarutigalugu ’ajoqersuillutik iivangkiiliu oqaluutigalugu’ pisinnaatitaaffigisimavaat. (ApS 5:42, 1936) Ilaalli assigiinngitsunik pissuteqarlutik pioneritut unittariaqarsimapput. Siornatigut pioneriusimaguit maannakkut pissutsit atukkatit misissorsimavigit pioneritut aallarteqqissinnaanerlutit?
2. Sooq siornatigut pioneriusimasut maannakkut pissutsit atukkatik eqqarsaatigeqqissavaat?
2 Pissutsit allanngorsinnaapput: Imaassinnaavoq pioneritut uninninnut pissutaasoq peerussimasoq. Assersuutigalugu, qaammammut nalunaaqquttap akunneri 90-t pioneritut piumasaqaataasut naammassisinnaanagit pioneritut unissimaguit, maannakkut piumasaqaataasut nalunaaqquttap akunnerinut 70-inut appartinneqarsimammata pioneritut aallarteqqissinnaavit? Sulisariaqarnerit imaluunniit ilaqutariinni akisussaaffitit pioneritut uninninnut pissutaasut annikillisimappat? Qatanngut arnaq peqqiilliornini pissutigalugu pioneritut unittariaqarsimasoq, 89-inik ukioqarluni aallarteqqissinnaasimavoq. Ukioq ataaseq sinnerlugu napparsimmavimmut unissimannginnami misigisimavoq pioneritut aallarteqqinnissaminut peqqilluarluni!
3. Ilaqutariinni ataatsip pioneriusinnaaneranut ilaqutariit qanoq ikioqatigiissinnaappat?
3 Immaqa illit pioneriusimanngilatit, ilaquttavilli ilaata isumaginissaa, soorlu angajoqqaaq utoqqalisimasoq, pissutigalugu pioneriusimasoq unissimavoq. (1 Tim 5:4, 8) Taamaattoqarsimappat, illit ilaqutariinniittulluunniit allat ikiuiniarlusi iliuuseqarnerusinnaavisi? Soormi tamanna oqaluuserigussiuk? (Uss 15:22) Ilaqutariinni ataatsip pioneriusinnaaneranut ilaqutariit suleqatigiippata pissutissaqarluartumik tamarmik misigissapput suleqataallutik.
4. Maannakkorpiaq pionerinngoqqissinnaanngikkuit qanoq iliussavit?
4 Maannakkut pissutsit atukkatit pissutigalugit pioneritut aallarteqqissinnaanngikkuit nikalloqinak. Kajumissuseqarnerit Jehovamut nuannaarutaavoq. (2 Kor 8:12) Pioneriugallaravit ilikkakkatit maannakkut kiffartorninni atortakkit. Kissaatigisat qinunikkut eqqaajuk pissutsillu atukkatit tulluarsarniarlugit periarfissatit eqqumaffigikkit. (1 Joh 5:14) Immaqa piffissanngorpat Jehovap ’sulinissamut matu angisooq ammassavaa’ taamaallutit pioneritut kiffartornermi nuannaarutaasut misigeqqilissallugit! — 1 Kor 16:9, NV.