‘Misiginneqataagitsi’
1. Inuit ullumikkut suna pisariaqartingaarpaat?
1 Oqaluttuarisaanermi inuit misiginneqatigineqarnissaminnik aatsaat taamak pisariaqartitsigipput. Silarsuarmi atukkat ajorsigaluttuinnartut pissutaallutik inuit pilluaannermik, nikallunganermik neriuuteqannginnermillu atugaqarput. Millionillit ikiorneqarnissaminnik pisariaqartitsipput, uagullu kristumiutut tullitsinnut misiginneqatiginninnermik qamannga pisumik ersersitsinissatsinnut periarfissaqarpugut. (Matt 22:39; Gal 6:10) Misiginneqatiginninneq taamaattoq qanoq takutinneqarsinnaava?
2. Qanoq iliorluta misiginneqatiginninnerput pitsaanerusumik takutissinnaavarput?
2 Misiginneqatiginninneq suliakkut takutinneqartoq: Tuppallersarneqarneq ilumoortoq ataavartorlu Guutimit kisimi pineqarsinnaavoq. (2 Kor 1:3, 4) Jehova ilaarlugu ‘misiginneqataanissatsinnik’ kajumissaarpaatigut piginnaatillutalu naalagaaffik pillugu nutaarsiassaq nuannersoq inoqatitsinnut oqaluussissutigeqqullugu. (1 Petr 3:8) Sapinngisatsinnik oqaluussinermut peqataanitsigut inuit ‘aserorsimasumik uummatillit’ tuppallersarnerusinnaavavut, Guutimmi Naalagaaffiata kisimi inuiaat naalliuttut neriuuteqalersissinnaammagit. (Es 61:1) Innuttaminut misiginneqatiginninnini pissutigalugu Jehovap erniinnaq ajortut piiassavai silarsuassarlu nutaaq naapertuilluassuseqarfiusoq pilersillugu. — 2 Petr 3:13.
3. Inuit qanoq Jiisusitut isigisinnaavavut?
3 Jiisusip isiginnittaasiatut inuit isigikkit: Jiisusi allaat katersuussimasunut amerlasuunut oqaluussigaangami, eqimattatut isigiinnarnagit, inuit ataasiakkaat anersaakkut pisariaqartitsisut maluginiartarpai. Savatut siulersortissaminnik paarsisoqanngitsutut ipput. Jiisusi takusaminit killinneqarpoq, kajumissisinneqarporlu nikallujuilluni ilinniartissallugit. (Mark 6:34) Jiisusitut isiginnittaaseqarutta inunnut ataasiakkaanut qamannga pisumik misiginneqatiginninnissatsinnut kajumissisissavaatigut. Tamanna oqalunnitsigut tusaaneqarsinnaassaaq kiinnatsigullu takuneqarsinnaalluni. — 1 Kor 9:19-23.
4. Sooq misiginneqatiginninnermik ersersitsissaagut?
4 Inuppassuit inuiannit tamanit pisut naalagaaffik pillugu nutaarsiassaq ajunngitsumik qisuariarfigisimavaat. Misiginneqatiginninnermik ersersitsiuarutta Jehova Guuterput misiginneqataasoq ataqqinartillugulu nuannaartissavarput. — Kol 3:12.