Ilinniartitsillaqqissumut pissuseq pingaarnerpaaq
1. Ilinniartitsillaqqissumut pissuseq suna pingaarnerpaava?
1 Suna Biibilimik ilinniartitsillaqqissunngortitsisarpa? Ilinniagaqarsimaneq? Misilittakkat? Inunnguuseralugu piginnaasat? Pissuseq taanna Inatsisinik naammassisitsisuuvoq, Jiisusip ajoqersugaani ilisarnaataavoq Jehovallu pissusiini pingaarnerpaatut ersertarpoq nuannernerpaajullunilu. (Joh 13:35; Gal 5:14; 1 Joh 4:8) Tassaavoq asanninneq. Ilinniartitsillaqqissoq asanninnermik ersersitsisarpoq.
2. Sooq inunnut asannittuunissarput pingaaruteqangaarpa?
2 Inunnut asanninneq: Ajoqersuisorsuup, Jiisusip, inuit asanninnermik ersersitsivigisarpai, tamatumalu tusarnaarnissaannik killittarpai. (Luk 5:12, 13; Joh 13:1; 15:13) Inuit soqutigigutsigit periarfissat tamaasa oqaluussiniartassaagut. Aporfissat, soorlu malersuinerit aamma soqutiginninnginnerit unitsissanngilaatigut. Inuit oqaluussiffigisavut soqutiginninnermik ilumoortumik ersersitsivigissavavut taakkulu soqutigisaannut saqqummiussassarput tulluarsarlugu. Atuaqqissaaqatigisartakkavut piffissaqarfigiinnarnagit aamma atuaqqissaaqatiginissaannut piareersarnermut piffissaqartassaagut.
3. Biibilimi sallusuissutsinut nuannarinninnitta oqaluussinitsinni qanoq ikiorsinnaavaatigut?
3 Biibilimi sallusuissutsinut nuannarinninneq: Sallusuissutsit Biibilimiittut Jiisusip aamma nuannarai quimilu erlinnartuutitut isigalugit. (Matt 13:52) Sallusuissut nuannarigutsigu angorniorluta oqaluuserissavarput, taamaaliorutta tusarnaartitsinnut kajungilersitsisinnaassaaq. Inuttut killeqarnerput isiginiarpallaarnagu nuannarinninnerup taama ittup paasissutissat allanut tunniuttakkavut naleqangaartut isiginiarnerulersissavai oqaluussinitsinnilu annilaangavallaarunnaarsilluta.
4. Asanninneq qanoq ineriartortissinnaavarput?
4 Asanninneq ineriartortiguk: Inunnut asanninneq qanoq ineriartortissinnaavarput? Asanninneq Jehovap erneratalu takutissimasaat, inuillu oqaluussiffigisartakkatsinniittut anersaakkut atugarliornerisa eqqarsaatiginerisigut. (Mark 6:34; 1 Joh 4:10, 11) Atuaqqissaartarnikkut eqqarsaatiginneqqissaartarnikkullu Biibilimi sallusuissutsinut nuannarinninnerput alliartuinnassaaq. Anersaap inerititaata asanninneq ilagaa. (Gal 5:22) Jehova anersaamik illernartumik qinnuigisinnaavarput asanninnermik ineriartortitsiuarnissatsinnik ikioqqulluta. (Luk 11:13; 1 Joh 5:14) Ilinniagaqarsimagaluarluta, sallusuissummilu misilittagaqaraluarluta inunnguuseralugulu piginnaaneqaraluarluta asanninnermik ersersitsinitsigut Biibilimik ilinniartitsillaqqissunngorsinnaavugut.