Naalagaaffimmik tusarliussap isumaa paasiuk
Siaruarterisumik assersuusiamini Jiisusi oqarpoq ‘issorissumut siaruarterneqartut’ tassaasut ‘oqaatsimik tusartut paasillugulu’. (Matt 13:23) Maanna Naalagaaffik pillugu tusagaqareeratta isumaa ‘paasivarput’? Inuunitsinnut qanoq sunniuteqartigaa? Naalagaaffiup soqutigisai salliutippavut taamaalillutalu ersersillugu tusarliussap isumaa paasisimallutigu?
Naalagaaffimmik tusarliussamik eqqortumik paasisaqarniaraanni atuaqqissaartarnissaq pisariaqarpoq. Anersaakkut inuussutissat uagutsinnut sassaalliutigineqartut isumaliutigeqqissaarnissaat piffissaqarfigisariaqarpavut. Napasuliaq Alapernaarsuiffik-mik atuapallaannarnerup assigaa nerisassanik mamartunik inuussutissartaqarluartunillu tamuaqqaanngivilluni iisiinnarneq. Anersaakkut inuussutissanik isumaliutiginneqqisaarnissannut piffissaqarluartarpit? Iluaqutigilluassagukkit kajumissuseqartariaqarlutillu anersaakkut nererusussuseqarluartariaqarputit. Taakku marluk piginngikkukkit iliuusissat allat pissarsiaqarnissaraluannut atuaqqissaarnissamulluunniit akornutigisinnaavatit. Aalajangersimasumik atuaqqissaarniartarneq ajornakusoorsinnaavoq. Piffissamik pingaarnersiuinissaq pisariaqarpoq, anersaakkulli pisuussutinik nalissaqanngitsunik pissarsissutaassaaq. — Uss 3:13-18; Kol 1:27.
Naalagaaffik pillugu isumalluartumik ineriartornartunillu eqqarsaatersornissatsinnut Ullormut allassimaffiit misissortakkit iluaqutigisarparput. “Anersaakkut pisariaqartitaqarnerminnik miserratiginninngitsut” ullormut allassimaffik nassuiaataalu atuarniarlugit ullut tamaasa minutsialunnguit atortarpaat. (Matt 5:3, NW) Nunarsuarmi immikkoortortaqarfinni tamani ullaat tamaasa minutsit 15-it atorlugit ullormut allassimaffimmik sammisaqartarnerannit erserpoq tamatuminnga eqqartueqatigiittarneq qanoq iluaqutaatigalunilu pingaaruteqartigisoq. Illit ilaquttatillu assingusumik ileqqoqarpisi?
Naalagaaffik pillugu paasisaqarnerujartortillutit Naalagaaffimmik tusarliussamik allanut oqaluussissutiginninnissannut kajummissuseqarnerulissaatit. Oqartoqarsinnaavoq Napasuliaq Alapernaarsuiffik aamma Vågn op! tassaasut eqqarsartaatsimut orsussat paasissutissanik nutaanik nalitsinnullu naleqquttunik isummatsinnik immiisartut. Silarsuup Guutip naalagaaffianik qanoq pisariaqartitsilluinnartigineranik paasinnilluarnissatsinnut taakku iluaqutaapput. Anersaakkut pingaartsitsinerulernissatsinnut ‘Kristusillu isumaanik’ pigisaqalernissatsinnut iluaqutigisarpavut. (1 Kor 2:15, 16, 1936) Tamakku tamaasa neriuutsitsinnik nakussatsissutigisarpavut Naalagaaffimmillu neriuummik oqaluussissutiginninnermut ilungersuussinerulertarluta. — 1 Petr 3:15.
Naalagaaffik pillugu tusarliussap isumaanik tamatta paasinninnissarput pingaaruteqartorujussuuvoq. Naalagaaffik aqqutigalugu Guutip kisimi oqartussaanini akitsisissavaa, ajortut piiarlugit silarsuassarlu nutaaq, paratiisi, pilersissallugu. Jiisusip peqquaatigut Naalagaaffik inuunitsinni salliuteqqullugu. (Matt 6:10, 33) Naalagaaffimmik pilluaqqussutissat misigiumallugit periarfissatit tamaasa atorluakkit.