Atuarpiarsinnaanngitsut qanoq ikiorsinnaagivut
1. Sooq atuarpiarsinnaanngitsunut Biibilimik ilinniartitsineq unamminiarnartuua?
1 Inuit atuarpiarsinnaanngitsut ilaat anersaakkut soqutiginnissinnaapput, imaassinnaavorli Biibili atuakkallu allat atuarnissaat mersernartissinnaagaat. Atuagaq ‘Biibilimi ajoqersuutigineqartut’ siulliullugu neqeroorutigineqaraluarpat qularnanngitsumik tigujumassanngilaat. Inuit taamatut ajornartorsiutillit anersaakkut pisariaqartitaannik qanoq ikiorneqarsinnaappat? Oqaluussisartut misilittagaqarluartut qanoq iliortarsimanerannik nunanit 20-nit amerlanerusuneersut aperisimavavut. Siunnersuutaasa ilaat tulliuttuni atuarneqarsinnaapput.
2. Atuarpiarsinnaanngitsunut Biibililersaarutit sorliit atussallugit tulluassappat?
2 Soqutiginnittoq atuarpiarsinnaanngippat atuarsinnaanngivippalluunniit quppersagaq Listen to God (kalaallisuunngortitaanngitsoq) imaluunniit Guuti tusarnaaruk naassaanngitsumik inuusinnaaqqullutit sammineqarsinnaavoq. Qatanngutip pioneriusup USA-meersup pulaakkaminut quppersakkat marluutillugit takutittarpai aperalugulu arlaat iluarinartinnerussaneraa. Kenyami immikkoortortaqarfimmiit nalunaarutigineqarpoq atuagassiat taakku inuiaqatigiinnut Afrikamiittunut atoruminartuusut, inuit tassaniittut apeqqutit akissutillu atorneraninngarnit oqaluttuarfigineqarnermikkut ilikkagaqarnerusarmata. Inuit ukiuni arlalinni atuarsimasut apeqqutit akissutillu ajornartorsiutigineq ajorpaat, killilimmilli atuarsimasunut peqqusiileqisitsisinnaallutik. Atualaarsinnaasunut quppersagaq Tusagassat nuannersut Guutimeersut!, Guutimut ikinngutaalersinnaavutit! imaluunniit Biibilimik oqaluttuaatikka oqaluussisartorpassuit aallartissutigissallugit iluarisarpaat.
3. Atuarsinnaanngitsut sunniuteqarluartumik ilinniartissagutsigit suna pingaaruteqarpa?
3 Nersualaarinnittarit. Atuarnermik ilikkarsimanngitsut peqqusiileqillutillu imminut tatiginerat annikitsuararsuusinnaavoq. Ittoorunnaarpata aatsaat sallusuissummik ilinniartitsinerup aallartinnissaa pitsaanerussaaq. Ataqqinissaat naleqartutullu misigitinnissaat pingaaruteqarpoq. (1 Petr 3:15) Anersaakkut siuariartornertik ilutigalugu ilungersornertik kinguneqarluartoq malugilerunikku atuaqqissaaginnarnissaminnut kajumississutigissavaat. Taamaattumik nersualaarinnittuartarit.
Atuarnermik ilikkarsimanngitsut peqqusiileqillutillu imminut tatiginerat annikitsuararsuusinnaavoq. Ittoorunnaarpata aatsaat sallusuissummik ilinniartitsineq aallartikkuni pitsaanerussaaq
4. Atuarpiarsinnaanngitsut atuaqqissaarnissamut piareersartarnissaannut qanoq kajumissaarsinnaavavut?
4 Atuaqqissaaqatigisartakkat atuarpiarsinnaanngikkaluarpalluunniit piareersartarnissaanut kajumissaarsinnaavat. Sydafrikami oqaluussisartut ilinniartitatik ilaquttaminnut ikinngutiminnulluunniit atuarsinnaasunut ikiorteqqullutik kajumissaarsimavaat. Tuluit Nunaanni oqaluussisartup atuaqqissaarnermi piffissap ilaani atuagaatimi atukkiunneratigut atuaqqissaaqatigisartakkami piareersartarnissaannik kajumissisittarsimavai, taamaalillutik takusinnaaniassammatigit piareersarnermi titartuisimalluni akissutaa naniuminarnerusartoq. Indiami qatanngutip angutip atuaqqissaaqatigisartakkani piumaffigisarpai tullissaanut pisassami assiliartaasa isiginnaarneratigut eqqarsaatigineratigullu piareersartaqqullugit.
5. Atuaqqissaaqatigiinnermi qanoq erinitsajuitsuusinnaavugut?
5 Erinitsajuitsuugit. Sammisami pingaarnerit pingaarnerutillugit sammineqartariaqarput atuagassiarlu atorneqartoq suugaluarpalluunniit atuaqqissaaqatigisavit paasilluarnissaannik ikiortaruk. Atuartaleqqammerussi minutsit 10-t 15-illuunniit naammapput. Sammisassat amerlanaarnaveersaarlugit tamatigut immikkoortut arlaqanngitsut sammineqarsinnaapput. Atuaqqissaaqatigisat atuffarippallaanngippat erinitsannaveersaarit. Qularnanngitsumik atuaqqissaartartup Jehovamik ilisarinninnerulernini ilutigalugu atuartarnini pitsanngortikkusunnerulissavaa, taamaattumik aallaqqaataaniilli ataatsimiinnernut najuuttarnissaannik kajumissaartaruk.
6. Atuarpiarsinnaanngitsut atuarluartalernissaannik qanoq ikiorsinnaavavut?
6 Atuaqqissaaqativut atuffarikkunik anersaakkut siuariartupallassapput. (Tuss 1:1-3) Biibililersaarutitsinnik, atuaanermik immiussanut, tusarnaartarnissaannik kajumissaarsinnaavatit. Immiussamik atuaasoqartillugu atuakkaminnik malinnaasarpata nipikitsumillu issuaasarlutik atuffarissilertussapput. Nikallorpat ilikkareersimasai taakkartorlugit imminut tatiginerulersissinnaavat. Qularunnaarsikkit ilungersornerat Jehovap pilluaqqujumaarmagu kajumissaarlugillu ikioqqullutik qinnuigisaqqullugu. (Uss 16:3; 1 Joh 5:14, 15) Tuluit Nunaanni oqaluussisartut ilaasa atuaqqissaaqatigisartakkatik piviusorsiortumik anguniagaqaqqullugit kajumissaartarpaat. Atuarpiarsinnaanngitsoq atuarluartalernissaanik ilinniartinniaraanni qanoq atuartoqartarneranik ilinniartiinnarnagu aamma atuarnermik ilinniarusussuseqalernissaanik ikiorneqartariaqarpoq.
7. Sooq atuarpiarsinnaanngitsut oqaluussiffiginngitsuussanngilagut?
7 Jehova ‘allanit iluarinarnerutitaqannginnami’ ukiuni ikittuinnarni atuartuusimasut nikaginngilai. (Job 34:19) Jehovammi inuit uummataat isiginiarnerusarpai. (1 Nal 28:9) Taamaattumik atuarpiarsinnaanngitsut oqaluussiffiginngitsooqinagit. Biibililersaarutinik ajukkunnanngivissunik aallaqqaasiutissarpassuaqarputit. Kingusinnerusukkut atuagaq ‘Biibilimi ajoqersuutigineqartut’ atuarsinnaavarsi, taamaalillutit atuaqatit Biibilimik paasinnilluarnerulernissaanik ikiussavat.