Oqaluussisartutut siuariartortuarit
1. Kristumiut siulliit nalaanni oqaluttuat suut ersersippaat oqaluussisartutut siuariartortuartariaqartugut?
1 Kristumiut oqaluussisartutut siuariartortuarnissaat pingaaruteqarpoq. Taamaattuminguna Jiisusip ajoqersukkani oqaluussinermi pikkorinnerulerniassammata ilinniartikkai. (Luk 9:1-5; 10:1-11) Taamatuttaaq Akvilap Priskillallu Apollosi “ilaliuppaat Guutillu aqqutigeqqusaanik sukumiinerusumik nassuiaallugu”. (ApS 18:24-26) Aamma Timotheusi oqaluussisartoq misilittagartooq Paulusimit kajumissaarneqarpoq ilinniartitseriaatsini eqqumaffigiuaqqullugu taamaaliornermigut ‘ineriartornera tamanit takuneqarsinnaassammat’. (1 Tim 4:13-15) Qanorluunniit sivisutigisumik nutaarsiassamik nuannersumik oqaluussisartutut Naalagaq kiffartorfigisimagaluarutsigu oqaluussinissamut pikkorissartuartariaqarpugut.
2. Allat qanoq ilinniarfigisinnaavavut?
2 Allat ilinniarfigikkit. Allat ilinniarfiginerisigut pikkorissartuartarsinnaavugut. (Uss 27:17) Taamaattumik oqaluusseqatit pulaakkamut saqqummiigaangat malinnaaffigisaruk. Oqaluussillaqqissut aalajangersimasumut siunnersuutissaqarnersut aperikkit oqaasiinullu naalaaqqissaarlutit. (Uss 1:5) Qanoq pulaaqqiinissannut, Biibilimik atuaqqissaaqateqalernissannut oqaluusseriaatsinulluunniit allanut peqataanissannut nalornivit? Siulliullutit ornigullutit oqaluussisartoqatigiinnik nakkutilliisoq imaluunniit oqaluussisartoq misilittagartooq aperiuk ilinniartikkusunneraatit. Aamma eqqaamajuk Jehova pikkorinnerulersitsisarmat, taamaattumik taassuma anersaavanik illernartumik tuneqqullutit qinukulasarit. — Luk 11:13.
3. Siunnersorneqarutta, immaqa allaat ilimaginngisatsinnik, qanoq qisuariassaagut?
3 Siunnersorneqaruit, immaqa allaat ilimaginngisannik, narrujuummissutigeqinagu. (Oqal 7:9) Apollosi ilaarlugu maniguullutit qujamasullutillu ikiorneqarnissannik akuersaarit. Taamaalioruit ilisimasuussaatit. — Uss 12:15.
4. Oqaluussisartutut siuariartortuartariaqarnissatsinnut pissutaasoq pingaarutilik suna Jiisusip eqqaavaa?
4 Siuariartorneq Guutimut ataqqinaataavoq. Jiisusip assersuusiorluni ajoqersukkami oqaluussisartutut siuariartornissaannik kajumissaarpai. Viinneqummut imminut assersuuppoq ajoqersukkanilu avalequtinut assersuullugit. Oqarpoq ataatami avalequtit inerititallit tamaasa salittarai “suli inerititaqarneruleqqullugit”. (Joh 15:2) Soorlu viinnequteqarfimmik piginnittup avalequtit suli amerlanerusunik inerititaqartikkusuttarai, taamatuttaaq Jehovap ‘qarlutsinnik inerititaqarnissatsinnut’ pikkorinneruleriartortuarnissarput kissaatigaa. (Hebr 13:15) Oqaluussisartutut siuariartortuaannarutta qanoq kinguneqassava? Jiisusip tamanna ima akivaa: “Inerititaqarluarnissigut ... Ataataga naalannarsissaaq.” — Joh 15:8.