Inuusuttut aperipput:

„Kina ikinngutigivippara?“

„MAANI ukiut arfineq-pingasut atuarsimavunga, kisianni ataasinnguamilluunniit ikinngutitaarsimanngilanga! Ataatsimilluunniit naami.“ Ronnie sorlummippoq. „Ataatagalu isumaqatigiissinnaanngilagut, anaanama paasineq ajorpaanga, qatanngutigalu arnaq paasarpugut. Ikinnguteqanngivippunga! Uannut sianertoqanngisaannarpoq. Oqaloqatissaqanngilanga. Qanoq misigisimanersunga kialuunniit ilisimanngilaa ilisimalernissaalu soqutigineqanngilaq. Ilaannikkut saperluinnalersarpunga!“

Ronniep isumatsassimalluni ikinnguteqannginnini oqaluttuaraa. Immaqa illit ilaannikkut taassumatut misigisimasarputit. Inuusuttorpassuit taamaapput. Ilisimatusarfimmi Nebraskamiittumi (USA-mi) misissuinermit takutinneqarpoq „gymnasiani atuartut tassaasartut kiserliornermik ajornartorsiuteqarnerpaat, taavalu ilisimatusarfinni atuartut tulliullutik.“ Ataqatigiinnermik amigaateqarnerup inuit akornanni kiserliornerup „qarmai“ napparsinnaavai. Pissutsini tamakkunani ilumoortumik ikinnguteqarnissaq pingaartorujussuusarpoq.

Ikinngut ilumoortoq qanoq ittuua?

Ikinngut ilumoortoq tassaavoq ulluinnarni ilisarisimasatsinnit ilassisartakkatsinnit annerusumik uatsinnut iliuuseqartartoq. Naggueqatigiit Afrikamiut ilaasagooq inuit ilaat „aqqusernup ikinngutaatut“ allallu „uummatip ikinngutaatut“ taasarpaat. „Uummatip ikinngutaa“ sunaava? Inuusuttut arlallit tamanna oqaaseqarfigisimavaat.

„Ikinngut ilumoortoq,“ Semone 18-inik ukiulik oqarpoq, „tamatigorluinnaq aalajaatsuuvoq. Atoruminartuniinnaanngitsoq aammattaarli atoruminaatsuni ikinngutaasarpoq. Ikinngut ajornartorsiuteqaraanni tamatigut oqaloqatigisinnaasaq, qiaffigisinnaasaq tuppallersaasinnaasorlu.“ Tamatumunnga assingusumik Bibelimi allassimavoq: ’Ikinngutaasoq ullut nungullugit asannittarpoq, qatanngutaasorlu erniarititaasarpoq annikilliornartussaq pillugu.’ — ússatit 17:17.

Aap, oqaatsit Bibelimiittut malillugit ikinngut tassaavoq asanninnermik ersersitsisoq. Immaqa isumaqaqqajaasarpugut ikinngutivut tassaasut uatsinnik nersualaarisut pikkorinneraasullu. Immaqalu kammalaatitta kukkunitsinnik uparuukkaangatigut ajuallattarpugut. Kisianni ússatit 27:6-imi nutsigaq norskisooq 1978-imeersoq naapertorlugu allassimavoq: „Ikinngut patitsigaluaraangamiluunniit aalajaattarpoq, akeqqalli kunissineri salloqqittaataapput.“ Taamaattumik namminissarsiorluta ajortunik ikinnguteqalersoornissarput mianersuutigisariaqarpugut.

Tamatuminnga paasinnissimasoq tassaavoq James, 18-inik ukiulik. Oqarpoq: „Uannut ikinngut ilumoortoq tassaavoq kukkusumik ilioraangama tamatuminnga uannik oqaluttuussisartoq taamaalioqqinnginnissannillu ikiuiniartartoq.“ Marvia, 26-nik ukiulik, oqarpoq: „Ilaannikkut ikinngummik taaneqartup takusinnaasaraluarpaa ajornartorsiuteqalissasunga, oqaannartarporli: ’Ilisimagaluarpara illit nammineq pisuusutit kisianni oqarfiginissat qunugigakku.’ Kisianni ikinngutip ilumoortup kukkunera takuguniuk, kingusinaartinnani mianersoqqussavaanga — aamma allaat nalunngikkaluarlugu oqaatsini immaqa iluarinavianngikkikka.“

Kiami suna eqqortuusoq sunalu eqqunngitsuusoq aalajangersinnaavaa? Uatsinnit tamanit inuunermik paasisimasaqarnerungaartoqarpoq. Tassaavoq inummik Pinngortitsisoq, Jehova Guuti. Taassuma Bibelimi oqaluttuuppaatigut qanoq inuunerput atortariaqaripput nalerisimaarnissaq angoqqullugu, kingorna peqqissimissutigisatsinnik iliuuseqartooqqunata. ússatit 2:6-9-mi nassuiarneqarpoq Guuti tusarnaarutsigu ajoqersuutaalu unnersuussutaalu malillugit, ’aqqutaasunik ajunngitsunik tamanik’ paasisaqarumaartugut.

Guutip unnersuussutaanik tatiginnittumik ikinnguteqaruit, ersarissumik eqqarsartarlunilu peqqusersuitsuusumik, taassuma ajunngitsumik sunnersinnaavaatit taamaalillunilu silatuumik aalajangiinissannik ikiussallutit. Pissutissaqarluartumik Bibelimi allassimavoq „ikinngutip tunniusimanera siunnersuutinit pitsaasunit nuannaarnarnerusoq.“ — ússatit 27:9, nutsigaq norskisooq 1978-imeersoq naapertorlugu.

Kikkut qinernerlugit apeqqutaava?

Henry Ford-iugaluaq ilaanni aperineqarsimaneragaavoq: „Ikinngut pitsaanerpaaq qanoq ittuua?“ Eqqarsalaariarluni akivoq: „Ikinngut pitsaanerpaaq tassaavoq pissutsinnik ajunnginnerpaanik saqqummersitsisinnaasoq.“ Inuusuttorpassuit tamanna paasisimavaat, isumaqarpullu ikinngutissarsiornermi mianersornissamut pissutissaqarluartoq.

„Inuunerma takutippaa ’ikinngutit’ tamakkeratik ikinngutimik pissusiinik ajunnginnerpaamik saqqummersitsisartuusut,“ Peggy, 23-nik ukiulik, oqarpoq. Oqaluttuarpoq inuusuttuaraalluni angerlarsimaffimminit nuutsinneqarsimalluni, ukiorlu ataaseq sinnilaarlugu aappariinnit Billimik Lloy-millu atilinnit ikiorneqarsimalluni. Taakkunani najugaqartilluni Guuti Bibelilu pillugit ilikkagaqarsimaqaaq. „Qaammatit Billikkunniiffikka nuannaarnermik piviusumik, nalerisimaarnermik eqqissinermillu misigiffigeqaakka,“ Peggy oqarpoq. „Kisianni tamanna ingerlaannanngilaq, naammi uninngaqqugaluaraannga, ’ikinngutit’ allat najorumallugit aallarpunga.“

„Kingusinnerusukkut ’ikinngutitaannit’ ilikkagaqaqaanga — nipilersuutinik tillinneq, checkinik matussutissaqanngitsut tigusineq, aamma ingammik, ikiaroornartorsiniutissanik ullormut dollarinik 200-inik pissarsiniartarneq,“ Peggy nangippoq. „Taamanikkut isumaqarpunga taakkua piviusumik soqutigigaannga, kingusinnerusukkulli paasilerpara aningaasat, ikiaroornartut uannillu sunik tamanik pisinnaanissartik kisiisa soqutigigaat.“

Peggyp 18-inik ukioqarluni angut inuusuttoq, Ray, naapippaa, taassumalu ikinngutigilerpaa ikiaroornartunik atorsinnaasaanik tamanik tunisarlugu — akeqanngitsumik. „Tamanna ajornartorsiutinnik tamanik qaanngiissutaasoraara. Tilleqqittariaarullungalu salloqqittaasariaaruppunga,“ Peggy oqaluttuarpoq. „Kisianni atortittarnermik inuussutissarsiulersippaanga. Taamaattoq toqqissisimassutigaara paasigakku ulloq naagaangat tamatigut Ray angerlarsimasartoq.“

Rayili piumasaqaraluttuinnarpoq, erseqqissumillu paasinarsivoq taassumattaaq Peggymit aningaasat pisinnaasassani kisiisa soqutigigai. Atassuteqaqatigiinnermit tamatumannga aniguiniarluni Peggyp ikiaroornartumik atornerluinini unitsippaa. „Kisianni Ray takkuppoq uannullu ajunngisaaqaluni ikiaroornartunik tunillunga,“ Peggy nassuerpoq. „Kanngittooqqeriikkatappunga.“ Naggataatigut ’ikinngut’ taanna qimanniarlugu illoqarfimmit aallarpoq. Kingorna ikinngummik ilumoortumik nanisiva?

Asanninneq piviusoq aapparinni Jehovamut nalunaajaasuusuni najugaqarallarami misigisimasani eqqaamavaa; taamaattumik najukkamini nutaami Nalunaajaasut naapinniarpai. Sivitsunngitsoq Jehovap Nalunaajaasui marluk takkupput. „Nuannaarnermit qullilivunga arnat tupaallaqisut marluk pakkukkakkit,“ oqaluttuarpoq. „’Ikinngutigisimasama’ ilumoortuusaarnerat maajugileraluttuinnarpara, inuilli uku ilumoorluinnartuupput.“

Taavami ileqqupilui? „Qaangerniarnerat ajornartorsiutiginngilara, kisianni pujortartarnera. Arlaleriaqalunga nakkaannarfigisarpara Guutilu isumakkeerfigeqqullunga qinnuigisariaqartarlugu,“ nassuiaavoq. „Taavali ikinngutima ilaat oqarpoq: ’Ajortulioreeraangavit isumakkeerfigeqqullutit qinusarninnut taarsiullugu, pujortarusuleraangavit nakussatsinneqaqqullutit qinusarniarit.’ Siunnersuutip inussiarnersup atoriaannaasullu tamatuma ikiorpaanga. Ikinngutikka ikiortigalugit ajornartorsiut qaanngivippara. Ukiorpassuarni taamaassimananga aatsaat ilunni minguitsutut misigilerpunga imminullu ataqqinerup suussusia paasillugu.“

Erseqqisorujussuuvoq Peggyp ikinngutai ilumoortut kikkuusut! Assigiinngissusiat! Ikinngutipiluit ileqqupilunnut pisippaat, kisianni ikinngutaasa ilumoortut tamakkuninnga taamaatitsinissaanik kajumissaarpaat. Illit ikinngutivit qanoq sunnertarpaatsit? Ileqqussatigut najoqqutarisaat qanoq ittuuppat? Ilumoorpoq inuusuttut tamakkeratik upperisarsiorneq soqutigimmassuk, immaqali illit soqutigaat. Taamaappat, ikinngutit Guutimik eqqarsaateqartut qularnanngitsumik ujarpatit. Ikinngutit taamaannersut qanoq ilillutit paasisinnaaviuk? Guuti pillugu oqaloqatigilerukkit erniinnaq paasissavat.

Ikinngutit Peggyp pissutsiminik ajornerusuunngitsunik ajunnginnerusunilli saqqummersitsisinnaasut nanigamigit qujamasuutigeqaa! Kingumut qiviarluni, oqarpoq: „Bibelimi allassimasoq: ’Ilisimatuunik angalaqateqartoq ilisimatuunngussaaq, silaqanngitsunilli ikinnguteqartoq ajortunngussaaq,’ ilumoorluinnarpoq. Tamanna nalunngilara! Guutimik asannittut ikinngutigiuaannarsimasuugukkit, maanna eqqaamasat nuanninngitsut pinngitsoorsinnaasimassagaluarpakka. Ikinngutivikka kikkuunersut misigisimasakka nuanniitsut naapertorlugit paasivara.“ — ússatit 13:20. (gD 22/6 82)

[Qupp. 31-mi ungalusaq]

IKINNGUTIT ILUMOORTUUA?

• Ilinnut unneqqarippa, naak oqaasiinit annersinneqartaraluarlutit?

• Ajornartorsiuteqaleraangavit paasitinneq ajorpaatit?

• Taassuma ileqqorisaasa illit inuunerit pisuunngorsarpaat imaluunniit aserorsarpaat?

• Ileqqussatigut najoqqutarisai qanoq ajunngitsigippat aalajaatsigalutillu?

• Peqatigiitsillusi sallusarpa, tillittarluni salloqqittaasarluniluunniit?

• Allanit qanoq isumaqarfigineqarpa?

• Inuunermi sunik anguniagaqarpa? Illit taassumatut anguniagaqarpit,   taamaannissallu kissaatigaajuk?

• Sooq ikinngutigerusuppaatit? Pigisaqarpit pilerigisaanik?

• Angajoqqavit ikinngutinik qinersinerit qanoq isumaqarfigaat?

• Taanna Guutimut akisussaaffeqarnermik misigerpasippa?

[Qupp. 29-mi assiliartaq]

„Uannut ikinngut ilumoortoq tassaavoq kukkusumik ilioraangama tamatuminnga uannik oqaluttuussisartoq taamaalioqqinnginnissannillu ikiuiniartartoq.“ Ikinngutivit taamaaliorfigisarpaatsit?