Inuusuttut aperipput . . .

Asannilersoornermik aliasuuteqarneq qanoq ilillunga pinngitsoorsinnaavara?

TARNIP pissusiinik ilorlernik paasiniaasartoq Erich Fromm ima oqarsimaneragaalluni issuarneqarsimavoq: „Pilersaarusiat neriulluarluni aallarnikkat ilaat iluatsinngitsoortaraluarput, kisianni asanninneq neriulluaateqangaarluni aallarnigaq tamanit iluatsinngitsuukulanerunnguatsiarpoq!“

Asannilersoorneq kinguneqanngitsoortoq aliasungaarnermik nassataqarajuttarpoq. Inuunerullu piviusortaasa peqqarniitsut ilaat tassaavoq asannilersoornermik aliasuuteqarneq pinngitsoorniaraanni asannilersoornaveersaartariaqarmat. Angutip arnallu ilagisartagariilernerat kristumiunit ilumoorussaanngitsutut isigineqarneq ajorpoq, tassami taamaalilluni aappassamik naleqquttumik aalajangiineq pisarmat. Ilagisartagariilernerli pakatsinermik kinguneqarsinnaavoq. Qaqutigoortuunngilaq angutip arnallu ajunnginnerpaamik siunertaqarlutik ilagisartagariilertarnerat — kingornagullu paasilerlugu imminnut naleqqutinngilluinnarlutik.

Inuusuttuaraalluni asannilernerup navianaatai

Suli inuusuttuaraatilluni ilagisartagariilerneq tamanit navianarnerpaavoq. Sulimi siusippallaarpoq misigissutsillu suli attortiavallaarlutik. (1 Korintumiut 7:36) Dr. Ari Kiev ima oqarsimavoq: „Inuusuttuaqqat amerlanerit ajuutiginnilertarnerat . . . kinguaassiuutitigut paatsiveerusimaarnermik amerlanertigut pissuteqartarput.“ Taamaattumik tupinnarpallaanngilaq inuusuttuaqqat asannilersuujasuararsuummata. „Naapinnitta kingorna,“ arnaq inuusuttoq Barbaramik atilik oqaluttuarpoq, „ukiup ataatsip missaani allaffigeqatigiittarpugut. Taava allakkami ilaanni allappoq asanerarlunga. Ima eqqarsarpunga: ’Ataasiaannavillunga naapissimavara. Qanorlu ililluni nalunngissinnaavaa asanerlunga?’“

Kisiannili inuusuttuaqqat ilagisartagariittut qanorluunniit imminnut qanillivallaarnaveersaartigigaluarunik naleqqussugitigigaluarunilluunniit ilimanaateqartorujussuuvoq imminnut naleqquttuaannarnaviannginnissaat! Sooq? Inuusuttuaraalluni allanngorarnartorujussuummat. Taamaasineranimi aatsaat paasiartuaalernartarpoq kinaanerluni, sorpiaat nuannarinerlugit aammalu inuuneq sumut atorniarnerlugu. Ullumi pingaartitarisat immaqa aqagu pingaaruteqarunnaarsimassapput. Inuusuttuaraalluni asannilersoornerit aallaqqaataaniilli iluatsinngitsoortussatut igajuttarput aappariilernermillu kinguneqarneq ajorajullutik.

Taamaattumik Bibelimi silatuumik siunnersuuteqarpoq aatsaat inuusuttuaraaneq qaangiuppat katinnissamik. (1 Korintumiut 7:36) Suli inuusuttuaraatilluni ilagisartagariilerneq tamatumani unnersuussutigineqanngilaq. Siunnersuutip tamatuma malinnissaa immaqa oqitsuinnaanngilaq. Kisianni inuusuttut ilagisartagaqalernissartik naammattumik utoqqaassuseqalernissaminnut utaqqisikkunikku ’narrutsannartut uummatiminnit nigortinnissaannut, perlunnartullu timiminnit alisinnissaannut’ iluaqutigisinnaavaat. — akugdlîssup oĸausê 11:10.

Immissinnut ilinniaqqaaritsi

Kisianni soorunami imaanngilaq utoqqaaneruliinnaraanni asannilersoornermik aliasuuteqarneq akiorluarneqarsinnaalersartoq. Atuakkiamini Love Lives-imi (Asasaqarluni inuuneq) Carol Botwinip ersersippaa allaat inuit inersimasut qanoq iluatsitsinngitsoorsinnaasartut: „Inooqatigiiliaarpallaartarput. . . . Imminnut qilersorsimanissartik kissaatigiaarpallaalersarpaat.“ Ilisarisimarpianngisaq asannilersoorfigigaanni ilimanaateqartorujussuusarpoq asanninnerup pakatsisinneqarnissaa.

’Ersitsut isiginiarpasi,’ apustili Paulus kristumiunut Korinthimiittunut taama allappoq. (2 Korintumiut 10:7) Illittaaq taamatut kukkoqinak, tassa arnap imaluunniit angutip kusanarnera piinnarlugu asannilerfigeqinagu. Siullermik paasiniaqqaarallaak inuttut qanoq ittuunera. Inuup taassuma qanimut ilisariniarnissaanut periarfissaqanngikkuit taava mianersortumik allanik apersuisinnaavutit soqutigisat taanna qanoq tusaamaneqartuunersoq.

Bibelimi oqaatigineqarpoq nuliaq pikkorissoq ’suliaasa nersorumaaraat isaaffinni’. (ússatit 31:31) Taamatuttaaq angutip kristumiuulluartup imaluunniit arnap kristumiuulluartup ajunngitsumik tusaamaneqarnissaa ilimagisariaqarpoq. Paasinarsissagaluarpat angut imaluunniit arnaq soqutigisat tusaamaneqarnerluttuusoq — immaqalu ikinngutitaarlunilu ilumoorussorilerniarlugu taamaatitsisartutut ilisimaneqartuusoq — taava mianersorit! Imaassinnaavoq taassumannga misigissutsikkut nanertorneqarnissamut illit tullinnguuttutit.

Immissinnut unneqqariffigeqatigiigitsi

Angut imaluunniit arnaq soqutigisat tusaamaneqarluartuusorinaraluarpalluunniit, aammalu ilinnik soqutiginnittuugaluarpalluunniit, aappariilernissap eqqarsaatiginissaa suli siusippallaarpoq. Imaassinnaavoq ilisarisimallualerukku paasilerit annertuumik inuttut sanngiissuteqartuusoq imaluunniit anersaakkut sanngiitsuusoq. Taava angutip imaluunniit arnap soqutigisap qanoq ittuiunera qanoq paasiniarneqarsinnaava? Taamaaliussagaanni sukisaarsaatinik arlaannik sammisaqaqatigiinneq kukkunerunngilaq, kisianni piffissaq ilumoorsaarluni tatigeqatigiillunilu oqaloqatigiinnermut aammattaaq atoraanni pitsaanerpaajussaaq. — Naleqqiuguk ússatit 15:22.

Sunik anguniagaqarpisi? Sunik soqutigisaqarpisi? Meerartaarnissamut tunngasut qanoq isigaasigik? Imaluunniit aningaasanut atortitassanut isertitassanullu tunngasut qanoq isigaasigik? Unneqqariffigeqatigiinnissarsi aammalu immissinnut annaajumanngiinnarlusi salluliulaartannginnissarsi pingaaruteqartorujussuuvoq. (Evfisumiut 4:25) Siusinnerusukkut kingusinnerusukkulluunniit kinaassusivik saqqummissaaq. Taamaattumik inuttut qanoq ittuiunerit aammalu inuunermi sumik ilimagisaqarnerit ingerlaannaq paasitikkukku, ikinngutigiinnermik pakatsinartumik naaneqartumik — imaluunniit aappariinnermik pilluaaffiusumik kinguneqartumik — aallarniinermit pitsaanerussaaq.

Kisianni ilagisartagariit arlaat ilisarisimaqatigiinnertik atatinniaannarlugu pissuserinngisaminik pissuseqartuusaarpat, taava? Bibelimi ima mianersoqqussuteqarpoq: ’Ilisimangaanngitsup suut tamaasa upperisarpai, silaligatsiaalli tummisarnini sianigai.’ (ússatit 14:15) Tamannali ima paasisariaqanngilaq pasinnikujuttuaannartumik misissussasutit, kisianni silatusaarnerussaaq paasiniarluassallugu angutip imaluunniit arnap soqutigisavit oqaasii suliaanut naapertuuttuunersut.

Aallaqqaataaniilli — kingusiinnakkut, misigissutsitit sakkortusereerpata aatsaat, pinnak — arlaannut pingaaruteqartunut qanoq isumaqarfiginninnera paasisariaqarpat. Assersuutigalugu taaneqarsinnaavoq Steve. Taanna kristumiutut kiffartornermut immisut nuannarisaqartigisumik aappassarsiorpoq. Sivitsunngitsoq niviarsissamut nuannarilikkaminut soqutiginnilerpoq. Steve ima oqaluttuarpoq: „Kisianni paasiartulerpara anguniagaqanngitsuusoq, aammalu kristumiutut kiffartornermi aallussivallaanngitsuusoq.“ Taamaattumik silatusaartumik taassumunnga attaveqarnini Stevep kipivaa.

Qanillivallaaqinasi

Tamanna eqqarsaammut allamut, asannilersoornermik aliasuuteqarneq pinngitsoorniaraanni pingaaruteqartumut, sangutitsivoq. Judyp tamanna imatut oqaatigaa: „Misilittakkat naapertorlugit nalunngilara misigissutsikkut attortianartorujussuusoq. Ilaannikkut qanillivallaartoornarpoq, naallu paasereeraluarlugu asaqatigiinnani misigissutsit ima sakkortusereersimatigisarput ikinngutip ajuallatsinnissaa siooranarsisarluni.“

Bibelip allanneqarnerata nalaani Sjulemimiup nalunngilluarpaa misigissutsit qanoq sakkortutigisut pineqartut. Taamaattumik kunngi Salomonip nuliarsarfigigaluarmani ikinngutiminut arnanut ima oqarpoq: „Ilungersorlunga oqaappassi, . . . asanninneq uanni itersaqqunagu pilerisaaqqunaguluunniit, aatsaat piumallerpat.“ (eríniugagssiat angnerssât 2:7, NV) Aap, angutip imaluunniit arnap soqutigisap ilisarisimallualernissaata tungaanut misigissutsit sakkortuumik naalakkersorsinnaanissaat silatusaarneruvoq.

Taamaattumik siusippallaakkut naleqqutinngitsumik asanninnermik ersersitsinissaq aammattaaq pinngitsoorniartariaqarpoq. Tamatumani najoqqutassiaq manna atuuppoq: ’Inneq inuup saamiugisinnaanerpaa atisani ikitinnagit?’ (ússatit 6:27) Ilisarisimalitsiaannarluni tasiortalernissaq kunittalernissarlu naleqqutinngillat. Tamanna kinguaassiuutitigut kanngunartuliornissamik pileritsatsitsiinnarani aammattaaq eqqortumik tunngavilimmillu naliliisinnaasutsimik ajoqusiisinnaavoq. Pilerissutsit aallartereersimagaangata silatusaartumik isummerfigeqatigiinnissaq ajornarsilluinnartarpoq. Aammattaaq asanninneq sakkortuumik ersersinneqareersimappat ataqatigiinneq sukkulluunniit kipineqariataassagaluarpat aliasunneq annerusinnaavoq.

Naggataagut Judy angummik ilagisartagaqalerami isumagivaa attaveqatigiinnermik arriitsumik ineriartornissaa. Angut soqutigisani qanillivallaarnaveersaartarpaa angut taanna katikkusunnerlugu qularutigiunnaarnissaata tungaanut. „Katikkusullugu qularutigiunnaarakku taassumunnga misigissutsikka alliartortissinnaalerlugit paasivara,“ taama Judy oqaluttuarpoq.

Imminut ilisariniaqatigeeqqaalerneq nuannaarnermik imaluunniit aliasunnermik kinguneqarsinnaavoq. Periaaseq aallaqqaataani atorneqartoq kingorna qanoq ingerlanissamut aalajangiisuusarpoq. Ilumoorpoq qulakkeerlugu oqaatigineqarsinnaanngimmat iluatsittumik kinguneqassanersoq. Qanorsuarluunniit imminut malittarisassiuukkaluaruit asannilersoorneq pakatsiffiusoq misigisinnaavat. Kisianni ilagisartagaqalernissat katinnissamut naammattumik ukioqalernissavit tungaanut utaqqisikkukku, aammalu misigissutsitit naalakkersorsinnaagukkit naleqquttumillu mianersoruit asannilersoornermik aliasuuteqarnissaq akiorsinnaassavat. Taamaalillutillu asannilernivit pilluarluni aappariinnermik kinguneqarnissaa ilimanaateqarnerulersissavat. (gD 8/2 88)

[Qupp. 22-mi assiliartaq]

Inuusuttuaraalluni asannilernerit qaqutigut aappariilernermik kinguneqartarput, aliasuuteqarnermillu kinguneqarajunnerullutik

[Qupp. 24-mi assiliartaq]

Asannilerfiginnginnerani ilisariniaqqaarallaak