Inuunera nakuusernermik ulikkaarsimagaluarpoq

IKINNGUTIGALU sapinngisarput tamaat arpappugut inunngorfimmalu eqqaani kuuk tikikkatsigu imaanut tingilluta. Nuigatta nukivut tamaasa atorlugit kuup akianut nalluserpugut.

Pinnguartugununa? Naamerluinnaq! Tassami inuuneq toquluunniit tassani pineqarput. Kingumut qiviarama takuara politiit aallaasiminnik ummiusimagaatigut. Aqerlunit eqqorneqarumananga morsoqqippunga naloqqilerlungalu. Immap iluanit igeriarpallattarnerit allaat tusaasinnaavakka.

Akianut pivugut taamalu parnaarussivimmit tillinniarsimanerput biilinillu aallarussisimanerput pillugit parnaarussaaffigisatsinnit qimaalluta aniguilluta.

Pinerlunniarneq pissutigalugu politiinit ujarneqartarnerma imaluunniit toqqaannartumik malersugaasarnerpassuama tamanna ilaannaraat. Naak taamani 17-iinnarnik ukioqaraluarlunga arlappassuariarlunga parnaarussaasareersimavunga. Naggataagut ikinngutigalugu tigusaavugut ukiunilu marlunni affarmilu parnaarussaanissamik pineqaatissinneqarluta.

Allaat parnaarussivimmi nakuusertarpunga. Parnaarussat allat saqitsaateqatigisaannarakkit parnaarussat atisaannik qaqortunik atisitinneqarpunga. Taamaaliornikkut saqitsaassigajuut allat ilagalugit paarsisunit immikkut nakkutigineqarsinnaasunngorlunga allanit immikkoortinneqarpunga.

Iperagaaneq nakuusernerulernerlu

Iperagaavunga pitsaanerulersimanangali, eqqortumik oqaatigalugu qangarnit annermik nakuusernerulersimavunga. Erniinnaq aqqusinernut arlalinnut ”kunngiusutut” akuerineqarpunga. Kialuunniit uannik unammillertup paannikkumatoorsuarmik naammattuuinini erniinnaq paasisarpaa.

Ilaanni angutit inuusuttut arlallit ataatsimoortut uannik uumitsatsitsisut saassuppakka. Naak sapaatip akunnerata siuliani paannillunga assaga talerpilleq napisimagaluartoq politiit tikiullutik paaneq suli unitsinngikkaat arlallit unatarpakka.

Ataatsimik ikinngutikkalu marluk angutit arlallit illoqarfimmit eqqatsinneersut unammillerpavut. Siuttuat saviminermik unataasisarluni tunginnukarpoq. Sakkuerpara, inuttaali sapassigakku qimaavoq. Savimineq sakkugalugu aatsaat paannissinnaammat taanna tunniuppara. Uterpoq, aappassaanillu sakkuerakku tamatumuuna unataqqaartinnagu qimaatinngilara.

Unnuit ilaanni Harlemimi New Yorkimiittumi nuannariinnarlugu aqquserngup teqeqquanippunga sanioqquttullu tamaasa unammillertarlugit. Arlallit unammillernera akuerisarpaat taamalu paanerit kisissaanngitsut pillutik. Tamatuma kingorna inuttut uloriaanatilittut nakuuserniartartutullu tusaamasaanerulerpunga. Paannittarnerni tamakkunani puiaasanik, sukaterinermut sakkunik anaattanillu anaalerneqartarpunga aammalu savinnik sakkunillu allanik sakkoqartunit saassunneqartarlunga. Tamakkuali arlaannaataluunniit nakuuserniartartuunera soraarutsinngilaat.

Nakuuserneq sakkortusivoq

Ikiaroornartunik aningaasarsiortoqarluarsinnaanera paasigasuarpara, namminerlu ikiaroortarama ikiaroornartulerineq ilisimalluarlugu. Erininarsinngitsoq ikiaroornartunik tuniniaasitsisalerpunga, tamatumali kingunerisaanik nakuuserniarneruliinnarpunga.

Ataatsimik ikiaroornartuerniartartup allap ikiaroornartuutaanik tillinniarniarluta inaanut persuaalliorluta iserpugut. Illup iluata ikiaroornartunik ujaasiffiginerani illuinnarsuummik savimmillu sakkulerluta angutit pingasut arnarlu ataaseq qunusiaralugit tigusareqqavavut.

Piffissami allami ikiaroornartorsiutissatsinnik aningaasassarsiniarluta angut pisoorsuaq saassullugu tillinniarfiginiarlugu ikinngutima ilaat ilagalugu pilersaarusiorpugut. Timmiarsiummik sakkulerluta kiinatsinnillu assiisumik nuersakkamik nasalerluta illua terlinganit misissugarigaluarparput, takkutinngimmalli qimaguteqqiinngarluta. Takkussimasuugaluarpat suliariniargarput pinngitsoorata naammassisimassagunaraluarparput.

Naak 20-iinnarnik ukioqaraluarlunga inuunera nakuusernernik, ikiaroornartunik pinerlunniapilunnernillu ulikkaarpoq. Ajunnginnerpaamik ingerlassappat siunissatut ilimagisara tassaavoq parnaarussivimmi inuuneq, tamatumali aliasutsingaarpaanga.

Suup eqqortuussusianik suullu eqqunngitsuussusianik kina aalajangiisussaatitaanersoq akuttunngitsumik eqqarsaatigisarpara, tassaassasorlu inuiaqatigiinni pissaaneqarnerpaaq inerniliuttarpara. Inuit suup eqqortuussusianik suullu eqqunngitsuussusianik aalajangiisarmata uangattaaq allatulli taama aalajangiisinnaatitaasutut tunngavilersuisarpunga — oqartussaatitaasunullumi ataqqinninngilluinnartuuvunga.

Apeqqutinnulli akissummik pitsaanerusumik nassaarnissannut piffissaq sivisooq ingerlanngilaq.

Aqqut pitsaanerungaartoq

Qatanngutima arnap parnaarussaaqatima ilaannik uinissimasup Jehovamik nalunaajaasut ilagalugit Bibeli atuaqqissaalersimavaa. Bibelimit ilikkakkani pillugit ilaquttakka tamakkerlugit oqaluttuuttarpai — uangali kisima oqaluttuutissananga. Qatanngutiga naapinnaveersaaqqullugu ilaquttannit oqarfigineqarpunga. Sooq? „Upperisaq sianiitsoq“ kisiat oqallisiginiartarmagu, oqarput.

Uangali alapernaappunga. Sunaana inuit kamaatigeqisaat oqaluttuarisinnaagaa? Paasiniarusutsappara. Kisianni uannut oqaluttuarinngisaannarpaa. Sooruna taamaaliorusunngitsoq? Bibelip oqariartuutaanik tusarnaarsinnaalernissannut inupiluuallaarsorigaminga.

Unnuilli ilaanni neriartorfigisinnaaneriga aperaara. Qatanngutiga uialu nereqatiginerini oqarpunga: „Upperisaq nutaaq taanna pillugu oqaluttuussinga.“ Taamaaliorpullu — nalunaaquttap-akunnerini arfinilinni! Ilumoorpalungaarmat aqaguani unnukkut tusagaqaqqikkumallunga taakunnaqqippunga.

Aappassaanik pulaarnerma kingorna inuunissamut patsisissaqarnera, inuunerup siunertaqarnera uppernarsivara. Tassuuguinnaq Jehovap nalunaajaasuisa ataatsimiittarfianni ataatsimmiinnernut ilaasalerpunga, ilikkakkannillu ikinngutikka oqaluttuuttalerlugit.

Suli sivisuatsiaamik qangatut inuuvunga. Atuaqqissaarnerali ingerlatiinnarpara Jehova Guutillu inunnut qanoq piumasaqarnera ilikkagaqarfiginerullugu, aamma ataatsimmiittarfimmi Bibeli oqallisigalugu ataatsimiinnernut aalajaallunga takkuttaannarpunga. Tamakku tamarmik inuuninnik allanngortitsiartuaarnissannut pisariaqartumik anersaakkut nakussatsippaannga.

Siullermik ikiaroornartunik tuniniaasarnera unitsippara. Tamanna siornatigut ilisarisimasama kamaatigaat, nakuuserniartartuuninnilli suli tusaamasaagama sunngilaannga. Tullissaanik ikiaroortarnera unitsippara kiisalu inuunerlunnera unitsillugu. Kingullersaatillugu tupatortarnera qaangerpara. Qaammatit arfineq-pingasut ingerlaneranni ima siumukarluartigaanga allaat kuisissinnaanngorlunga, 1970-imilumi kuisippunga.

Suup eqqortuussusianik suullu eqqunngitsuussusianik kia aalajangiisussaaneranut apeqqutiga kiisami akissutissarsivara. Akissut tassaavoq: Inunnik inuunermik tunisisoq Jehova taamaaliortussaavoq, taassumalu pisussaviulluni naatsorsuutigisinnaavaa tamanna naapertorlugu pinngortitami inuunissaat.

Akuttunngitsumik Jesaja 65:25-imi eqqartorneqartup isumaa uannut tulluartuutittarpara. Tassani siulittuutigineqarpoq piffissaq løvip qaasukkunnaarluni nujuitsunngorfissaa, ilami ima nujuitsigilerluni allaat ussigit ivigartoqatigisinnaanngorlugit. Tamatumunnga assingusumik allanngorsimallunga, tassa inuttut nakuuserniartartuusumit qanilaartunngorsimasutut, misigisimavunga.

Tusaamanerlugaanera pissuserissaalernikkut anigorpara, assersuutigalugu inuit matumiit matumut akuttoqatigiissumik pulaarlugit Bibelimik eqqartueqatigisarnerisigut. Ilaanni kasuttukkama ilaat angut inuusuttoq ilisaralunga ersisorujussuanngoraluarpoq, isumaqarsimagami ajortumeerniarinni. Bibelip oqariartuutaanik eqqissinartumik nassataqarlunga aggernera pillugu nassuiaatipallappara. Tupigutsattorujussuuvoq ilanngulluguli eqqissiallattorujussuulluni.

Kuisinnerma kinguninnguagut Jehovap nalunaajaasuanik nuliartaarpunga. Alianaraluaqisumik nuliara Guutip piumasaanik malinnikkumajunnaarluni 1974-imi aalajangerpoq, qinigassillungalu: Upperisara qimassagiga taamaaliunngikkumalu meeqqavut mikisut marluk ilagalugit qimassallunga. Tamanna inuuninni artornarnerpaajuvoq. Guutimilli pallorfiginninnera unitsissinnaanngilara, taassumalu piumasaa malillugu inuunera ingerlatiinnarpara.

Inooriaaseq nutaaq

Aalajaattuarnera pillugu Jehovap akilerpaanga. Qatanngut arnaq pitsaasoq 1977-imi naapippara, katippugullu. Tallimanik ukiulimmik erneqarpoq. Sivitsunngitsoq nuliaralu piffissaq tamaat kiffartulerpugut, inuunitsinnilu inuit allat Guutimik siunertaanilu ilinniartinnissaat qitiutilerlugu. Ernerput maanna inersimasunngorluni piffissaq tamaat kiffartornermik aamma aallussivoq. Najukkatsinni ilagiit iluanni suliassat assigiinngitsut ullumikkut ingerlappai.

Taamanili nuliaralu immikkut pilluaqqusaanermik tunineqarpugut nunarsuup immikkoortuinut amerlasuunut angalasinnaanngoratta nammineq kajumissutsitsinnik sanaartornermut ikiuuttaleratta. Jehovap nalunaajaasuisa nunarsuaq tamakkerlugu ilinniartitsiniarlutik suliniarnerannut atatillugu nunani assigiinngitsuni immikkoortortaqarfiit nutaat sananeqarnerinut ilaatigut ikiuuttarpugut.

Angerlarsimagaangatta inuit allat Bibelimik ilinniarnissaannik ikiorlugit ataatsimiittarfilioqataallutalu ulapittaqaagut. Nunap immikkoortuani sanaartornermik ataatsimiititaliamut USA-p kujasinnerusortaanut attuumassuteqartumut ilaasortaavungattaaq. Parnaarussivimmeeqatigisimasaralu — qatanngutinnik nuliaqalersoq — marluulluta ilagiitsinni utoqqaanertatut kiffartorpugut.

Jehovap inuuninnik aqutsilersinnaanngorlunga sammivimmullu allarluinnarmut saassinnaanngorlunga ikiormanga qujamasoqaanga. Suut eqqortuunerinik suullu eqqunngitsuunerinik tamanik ajoqersuuttuarmanga inuunera suli pitsanngoriartortuarpoq. — Nassiussaq. (gD 8/8 91)