Silarsuarmi nutaami inuuneq qineruk
GUUTI nunarsuaq manna asseqanngitsoq pinngortikkamiuk soorunami siunertaqarsimavoq. Aalajangersimavorlu siunertamini tamatumani inuit pingaarnerpaamik inissisimassasut. (Jesaja 45:18) Pissutsit ajorluinnartut nunarsuatta ullumikkut atugai Guutimut ataqqinaataanngillat. Takorloorneqarsinnaavali taamaannera Guutip ilaginnaannassagaa? Soorunami naamik.
Silarsuarmik nutaamik kissaateqarnerput tassarpiaavoq qanga pigisimasaraluatsinnut — nunarsuarmut piviusumik paratiisiusumut — kipisaneq. Inuit aappariit siulliit angerlarsimaffimmut taama ittumut inissinneqarsimapput, Pinngortitsisullu siunertarpiarisimavaa inuit naassaanngitsumik nunami paratiisiusumiittuaannarnissaat. — 1 Moses 1:28.
Maannakkut Jehova Guutip inuit tamaasa — aamma illit — silarsuassamini nutaami, inuulernissamut periarfissamik neqeroorfigai, inuit aalajaatsut tamaasa uummataasa kissaataannik tuniumallugit. (Tussiaat 10:17; 27:4) Illit silarsuassami nutaami inoorusussinnaavit?
Nammineq qinersisussaavutit
Israelikkut siulersortaata, Mosesip, naggataamik oqalugiarnerani inuiaat taakku tamatumunnga assingusumik qinigassalerneqarsimapput. Guutip aqutsinera imaluunniit inuiaat allat aqutsinerat qinigassarisimavaat. Malugeriaruk Mosesip qanoq siunnersorsimagai: „Ilissinnut saqqummiuppakka inuussut toqulu. . . . Inuussut qinerniarsiuk ilissi kinguaassasilu inuuginnaqqullusi! [Jehova] Guutersi asassavarsi naalassallugulu attavigittuinnarlugulu!“ (5 Moses 30:19, 20) Aamma massakkut qinersinissat taamaappoq. Inuuneq toquluunniit qinigassaraat.
Taamaattumik ilanngutassiat makku ilannguppavut, inuit silarsuarmik nutaamik pilersitsiniarlutik neriorsuutaat imaqanngitsut neriulluarfiginagit Guutip silarsuassaa nutaaq qinerniassagakku. Sulili Guutip silarsuassaa nutaaq pillugu nuannersorpassuarnik ilinniagassaqarputit.
Assersuutigalugu silarsuassap nutaap atuutilingajalerneranut suut takussutissaappat? Qanoq ililluni nunarsuarmi naalakkersuisut tamaasa kingoraassavai? Tamanna sioqqutitsiarlugu sunik pisoqassava? Qanoq ililluta qulakkeersinnaavarput Biibilimi neriorsuutit eqquukkumaartut?
Apeqqutit tamakku allarpassuillu akissutissaqarput. Jehovap nalunaajaasuisa nuannaarlutik akissutit illit nammineq biibilinni takutikkusuppaat. Guutip silarsuassaani nutaami sunik pilluaqqussutissaqassanersoq paasiinnassanngilat, aammali paasissavat qaqugu qanorlu ilillutik Guutip naalakkersuisuutitai, naggataatigut nunarsuaq tamakkerlugu atuutilersussat, aqutsilissasut.
Itsaq Berøamiut apustili Paulus tusarnaareeramikku iliorsimanerattut iliornissannik qamannga pisumik kajumissaarumavatsigit. Taakku ’oqaaseq ilassisimavaat kajumigingaarlugu, ullullu tamaasa allakkat misissortarpaat tamakku taamaannersut misilikkumallugit’. (apustilit suliait 17:11) Qularissanngilat Jehovap nalunaajaasuinik Biibilimut tunngasunik oqaloqateqarneq anersaakkut pissarsiffigilluassagakku. Tassami siunissaq nuanningaartoq Guutip uagutsinnut neriorsuutigisaa ilinniassavat.
Nammineq qinersisussaavutit: Jehovap taassumalu naalagaaffiata soqutigisaasa kiffartuunnissaat qinersinnaavat, imaluunniit inuit imminnut aqunniarlutik ilungersorneri tunaartarisinnaavatit. Kajumissaarumavatsigit Guutip neriorsuutai sapinngisamik annertuumik ilinniaqqullugit, aalajangernissannut tunngavissaqarluarniassagavit. Biibilimik ilisimasaqalerneq siunissamut neriuleqqissutaaginnarani aamma inuiaat aqutsinerata ulluini kingullerni anersaakkut uumajuaannarnissamut iluaqutaasarpoq. — 2 Timûtiuse 1:13.
Inuiaat silarsuarmut nutaamut pitsaanerusumullu ukiorpassuarni kipisasimanerat naangajalerpoq. Guutip silarsuassaa nutaaq erniinnaq piviusunngussaaq. Jehovap nalunaajaasuisa kissaatigaat silarsuassami nutaami tamatumani innuttaalissasutit naassaanngitsumillu inuuneq nuannaarutigisinnaassagit. Aamma Guutip tamanna kissaatigaa. Taassuma silarsuassaa nutaaq qinerukku — qamanngalu neriuppugut taamaaliussasutit — misigissavat inuiaat silarsuarmik nutaamik kipisanerat asuliinnaasimanngisaannartoq. (gD 22/10 92)