Aliikkusersuinerup silarsuaa alutornartoq
HOLLYWOOD! Nunarsuarmi sumiikkaluaruilluunniit taaguut tamanna tusarukku qularnanngitsumik filmit aliikkutassiornerlu eqqaassavatit. Illoqarfiup Los Angelesip Californiamiittup avalliusortaa tamanna aliikkutassiornerup silarsuaata illoqarfiisa pingaarnersaattut taaneqarsimavoq, aliikkutassiornermillu inuussutissarsiornerup aallaaviatut ipajaarluni. Silarsuarmi qillaalasut alutornartullu qiteraat. Soorlu atuakkiortoq oqarsimasoq: „Hollywoodip filminik angakkuagarpasissunik sanaartorfittut takorloorneqarnera silarsuarmut tamarmut siaruarsimavoq.“
Aliikkutassiorneq — nioqqutissiorneq annertooq
Hollywoodiinnaanngitsorli nunarsuaq tamakkerlugu tusaamaneqalersimavoq. Aamma „Hollywood“ nioqqutissanik aallakaatitsivissuuvoq annertoorujussuaq. Atuagassiaq Time naapertussagaanni aliikkutassiorneq silaannarsualiartaatinik avammut nioqquteqarnermut USA-mi tullersortaavoq. Amerikami aliikkutassiorfiit ukiut tamaasa dollarsinik hundrede milliardilippassuarnik kaaviiaartitaqartarput, taakkualu ilarpassui — 20 procentit missingi — avataanit niueqateqarnikkut isertinneqartarput.
Nunarsuaq tamakkerlugu atuakkanik tuniniaanermi USA 35 procentimik isertitsisarpoq, nipilersukkanik tuniniaanermi 50 procentimik, filmilianik videolianillu 55 procentimik kiisalu tv-mik nioqquteqarnermi 75-85 procentimik.
Aningaasarpassuit tamakku atorlugit Hollywood silarsuarmut aliikkutassaqartitsivoq. Ima paasinagu tamatigut nuannarineqartoq — nunat ilarpassuisa Amerikamiut kulturimik kisermaassiniarnerat naammagittaalliutigisarpaat, inuusuttut najukkaminni kulturi puiorlugu Amerikamit tikisitanit qalipaatigissaartunik piumanerusarmata. Amerikaannaanngitsorli aliikkutassaqartitsisuuvoq. Aamma nunat amerlanerit namminneq aliikkutassiorfeqarput, ilaatigut filminik, tv-nik, nipilersukkanik, atuakkanik timersuutinillu.
Aliikkutassaaleqinanngeqaaq
Silarsuarmik aliikkusersuisoq kinaagaluarpalluunniit malugisariaqartuuvoq ullumikkut aliikkutassaqarniarneq ajornanngeqimmat, aliikkutassat ima amerlatigalutik mumisitsinertut oqaatigineqarsinnaapajaarluni. Ukiut hundredet matuma siorna inuusimasuuguit aliikkusersuisartunit sungiussisimalluartunit qanoq akulikitsigisumik aliikkusersorneqartassagaluarpimmitaava? Allaat silarsuarmi nunat pisuunerpaat ilaanni najugaqaraluarlutit kinguaariinnit uagutsinnit isigalugu aliikkutassaaleqissagaluarputit. Tusarnaartitsinermukassaguit aatsaat angalaqqaarlutit angussagaluarpat. Ullumikkut nipilersukkat nuannerinerpaasatit walkmanimik tusarnaarsinnaavatit, imaluunniit nalaasaarfimmut innaannarlutit sumilluunniit aliikkusersortissinnaavutit — attataasannguaq tuuginnarlugu.
Nunani suliffissuaqarfiusuni angerlarsimaffiit tamangajammik tv-qarput, videomik immiussissuteqarlutik, cd-nik kassettenillu nipilersuuteqarlutik, saniatigullu allanik eletroniskiusunik atortorissaaruteqarlutik. Meeqqat ilaannut tv-p saqqai tarrarsuutitulli nalinginnaatigipput. Nunani kinguarsimanerusuni inuit unnukkut aliikkusiarfigisinnaasaannik tv-mik isiginnaariartarfeqarpoq. Inuk tv-mit tiguarneqarsimavoq. Sulinngiffik annertunerujartuinnartumik aliikkutassanut atorneqartalersimavoq.
Tamanna ajorami? Nalitsinni aliikkutassat ulorianaatitaqarpat? Imaluunniit nalitsinni aliikkutassaqarnikkut qinigassarparujussuaqarnera qinersinissaq ajornakusoortiinnalersimavaa? Atagu aliikkusersuinerup silarsuaa alutornartoq misissoriartigu. (wD 8/11 92)