Biibili qanoq oqarpa?
Aappaqannginneq tunissutaagaanngat
’Kiserlioqaanga’, arnaq kristumiu ukiorpaaluit uillarnerusimasoq nimaarpoq. ’Aappartaarnissara neriuutigiuarpara. Ulapputeqarluni kiserliorneq milliimisarpoq. Ikinnguteqarneq aamma iluaqutaavoq. Katikkusoqaangali.’
Katinnissat assut kissaatigigukku, aappassarsiorninnili suli iluatsitsisimanak, qularnanngitsumik aappaqannginneq tunissutitut isiginngilat. Aappaqanngitsutulli immaqa misigissutsini nikallunganartuni parnaarussaasutut misigaatit qasussutigisannik isumatsassutigisannillu. Aammali imaassinnaavoq ilaqutaqareersutit aappaarussimallutilli, maannalu meeqqavit pilersornissaat kisivit akisussaaffigalugu.
Taamaattumik immaqa aappaqannginneq tunissutitut isiginngilat. Allalli aappaqannginnertik iluaraat, kisimiittutullu inuuneq qinersimallugu. Aappaqannginnerli tunissutaava? Taamaappallu, qanoq ililluni, sooq aamma pissutsini qanoq ittuni? Biibili qanoq oqarpa?
Pilluarnissamut akornutaava?
Aappariinneq nuannaarutaangaarsinnaavoq. (Ussatit 5:18, 19) Ilaat „isumaqarput oqaluffiup naqqatigut ilummukarneq pilluarnermut nalerisimaarnermullu aqqutituaasoq“, aviisimi Los Angeles Times-imi allassimavoq. Kisianni katinnermut allagartaq pilluarnermut ’isissutissatuaava’?
Sianissutsikkut peqqissuunissamik immikkut ilisimasalik Ruth Luban Los Angeles Times naapertorlugu oqarsimavoq: „Arnat [angutillu] tupaallassapput paasigaluarunikku inuunertik qanoq nalerisimaarnartigisinnaasoq angutip [arnalluunniit] aappaqannginnerminnit annaassinissaanik neriuttuarneq unittooqqassutigiunnaarunikku.“ Aap, aappaqannginneq pilluarluni imaqarluartumillu inuunissamut akornutissaanngilaq. Avissimasut amerlasuut isumaqataassapput aappaqarneq immini pilluarnermut aqqutaannginnerarneqarpat. Pilluarneq piviusoq Guutimut qanittumik attaveqarnermik aallaaveqarpoq. Taamaattumik kristumiu aappaqaraluaruni aappaqanngikkaluaruniluunniit pilluarsinnaavoq. — Tussiaat 84:13; 119:1, 2.
Nammineq pisuussutigalugu akornutigisat saniatigut Marie Edwardsip Eleanor Hooverillu atuakkiaminni The Challenge of Being Single-mi (Aappaqannginnerup unamminiarnartua) pilluarnissamut akornutaasinnaasut ilaat tikkuarpaat, tassa inoqatinit tatineqarneq. „Aappaqanngikkaanni,“ allapput, „amerlasuut isumaqassapput aappaqanngitsoq arlaatigut eqqumiitsumik isertortumilluunniit misigissutsikkut ajoquteqartoq. . . . Arlaannik ajortoqarsimassasoq.“
Allaat ikinngutit ajunngitsussamik eqqarsartut tusangiasaarinermikkut tatisisinnaapput oqarlutik: „Qaquguuna katinniartutit?“ imaluunniit: „Sooruna angutitsialaatigalutit nuliassannik suli nassaarsimanngitsutit?“ Naak oqarusiutaannaagaluartut ’panap kapisineratut’ issinnaapput ajuallaataasinnaallutik peqqusiileqissutaasinnaallutillu. — Ussatit 12:18.
Tamarmik tunissummik immikkut peqarput
Apustili Paulus ajoqersuiartortitatut angalanermini aappaqanngilaq. Aappariinnermik aaqqissuussinermut akerliugami? Naagga. ’Iivanngkiiliu pillugu’ aappaqannginneq qinersimavaa. — 1 Korintumiut 7:7; 9:23.
Paulus katinnginnissamut nukissamik pisariaqartumik pigisaqarsimavoq, miserratiginaguli kikkut tamarmik immisut issinnaanngitsut. Taamaattumik oqarpoq: ’Nungullutik immikkut saammaannermit tunissummik Guutimit pisaqartarput, ilaat allamik, aamma ilaat allamik.’ — 1 Korintumiut 7:7.
Aappaqannginneq pilluarnermut aqqutaasinnaavoq, naak aallaqqaammut aqqut tamanna aqqutigissallugu eqqarsarsimanngikkaluarluni. Aappariinnermik aaqqissuussaq Jehovamit tunissutisiarpassuatta ilagaat. Soorluli Biibilip ersersikkaa aappaqannginneq aamma tunissutaasinnaavoq — ’siunersisinnaagaanni’. (Matîuse 19:11, 12; 1 Korintumiut 7:36-39) Aappaqannginneq sunik ajunngequteqarpa?
Paulus oqarpoq aappaqartut aapparminnit ’iluaritinnissartik’ isumakuluutigisaraat, aappaqanngitsulli ’Naalakkap piinik’ isumakuluuteqartartut. Tassani tikkuarneqarpoq aappaqannginnerup ajunngequtaasa annersaasa ilaat — Jehovamut allamut saasarneqarani kiffartorsinnaaneq. — 1 Korintumiut 7:32-35.
Biibili oqanngilaq aappaqanngitsut allamut saasarneqarsinnaanngivissut. Kisimiittulli isumakuluutai nalinginnaasumik ikinnerusarput ilaquttaminik pilersuisariaqartuminngarnit, aappaqanngitsormi aalajangigassaqaraangami imminuinnaq naatsorsuutigisussaavoq. Assersuutigalugu eqqarsaatigeriaruk Guutip Abraham Karan qimallugu Kana’animut aallaqqummagu pisimasoq. Biibilimi allassimavoq: „Abramip aallaqatigai nulii Saraj qatanngummilu ernera Lot, pigisatillu katersorsimasatik tamaasa nassarpaat aamma Karanimi inussiaatitaatik ilaliullugit.“ (1 Moses 12:5) Naak Abrahamip naalannissaminut ilaquttani ajoqutiginngikkaluarlugit qularnanngilaq angalanissamut taamaattumut inoqutimi piareersaannerannut piffissaq annertooq atorsimassagaa.
Abrahamip nuunnera apustilip Paulusip misigisaanut sanilliuteriaruk. Silasilu Thessalonikami nutaarsiassamik nuannersumik oqaluussitillutik inunnit kamattunik persarineqarput. Unnuk taanna ingerlaannaq qatanngutinit Berøamut aallartinneqarput. Piffassami allami, Paulus Troasimiitilluni, takorruukkakkut ima peqquneqarpoq: ’Makedoniamut ikaarlutit ikioriartortigut.’ Takorruugaq takuniariarlugu Makedoniamut aallarpoq. Paulus nuliaqannginnami aallariataarnissamut iliuuseqariataarnissamullu kiffaanngissuseqarneruvoq — ilaqutariillu taamaaliorsinnaanerat ajornarkusoornerusoq ersarippoq. — apustilit suliait 16:8-10; 17:1-15.
Aappaqannginnerup ajunngequtaasa ilagaattaaq namminermut tunngasunik kiffaanngissuseqarneruneq. Kisimiikkaanni sumi najugaqarnissaq, sumik qaqugulu nerinissaq, qaquguluunniimmi innarnissaq, aalajangissallugit ajornannginnerusarpoq. Kiffaanngissuseq tamanna anersaakkut sammisassanut aamma atuuppoq. Aappaqanngitsut Guutip oqaasianik atuaqqissaarnissamut, tamanut oqaluussinermut allanullu ajunngitsuliornissamut piffissaqarnerusarput.
Nammineerlutit aalajangikkannik pissutsilluunniit pisuullutik aappaqanngikkuit piffissavit atorluarnissaa aalajangiusimasariaqarpat. Allat iluaqutissaannik suliaqartaruit appaqanngitsutut pilluarnerulissaatit. (apustilit suliait 20:35) Aappartaarusukkuit, misigissutsinut nikallunganartunut imminut parnaarutissanngilatit inuttulluunniit affaannartut misigissanngilatit ’aappassannik suli nassaannginnerit pissutigalugu’. Jehovamut kiffartorneq ulapputigigukku paasilissavat, Paulusip oqarneratut, aappaqannginneq tunissutaasinnaasoq. (gE 8/2 95)