Biibili qanoq oqarpa?

Allasiortoq isumakkeerfigineqartariaqarpa?

’Patsiseqaraluarussi isumakkeerfigisiuk, ataatassinnuttaaq qilammiusumut tammartarnissinnik isumakkeerfigeqqullusi.’ (Mákorse 11:25) Jesusip oqaasii taakkua allasiornerup tungaatigut apeqqutinik ajornakusoortunik pilersitsipput: kristumiup pisuussuteqanngitsup aappani isumakkeerfigissavaa aappariinnarlugulu? Avinniarluni aalajangeruni Guutimut attaveqarnini ulorianartorsiortissavaa? Apeqqutit tamakku akissutissarsiorneranni Biibilip qanoq ikiorsinnaaneraatigut takoriartigu.

Tamatigut isumakkeerfiginnittoqartariaqarpa?

Jesusip oqaasii ’patsiseqaraluarussi isumakkeerfigisiuk’ isumaqarpat kristumiu pinngitsoorani tamatigut isumakkeerfiginnittariaqartoq — aamma aappaq allasiorsimappat? Isumakkeerfiginninneq pillugu Jesusip oqaasii taakku allatigut oqaaserisimasai tunuliaqutaralugit paasisassaapput.

Assersuutigalugu isumakkeerfiginninneq pillugu najoqqutassiaq pingaartoq Jesusip oqaasiini Lúkarse 17:3, 4 naapertorlugu ilinniarparput: ’Qatanngutit ajortuliorpat inerteruk, allamillu isumataarpat isumakkeerfiguuk. Ajortuliorfigippatillu ulluinnaq arfineq-marloriarluni, arfineq-marloriarlunilu kingumut ornippatit oqarluni: allamik isumataarpunga; taava isumakkeerfigisassavat.’ Aap, sualuttumilluunniit ajortuliortoqarsimagaluarpat, ajortuliorfigineqartoq kajumissaarneqarpoq isumakkeerfiginneqqullugu ajortuliortoq ilumoorluni allamik isumataarpat. Jehova aamma taama isumaqarpoq; taassuma isumakkeerfigissappatigut ilumoorluta allamik isumataartariaqarpugut. — Lúkarse 3:3; apustilit suliait 2:38; 8:22.

Allasiorsimasorli allamik isumataarumanngippat, tassa ajortuliani akisussaaffigiumanngippagu, Jesusip oqaasiisa takutippaattaaq pisuussuteqanngitsoq isumakkeerfiginninngippat paasinartoq. — Naleqqiuguk 1 Juánase 1:8, 9.

Isumakkeerfiginninneq — kingunerisaami?

Allasiortormi allamik isumataarpat? Allamik isumataartoqarpat, isumakkeerfiginninnissamut tunngavissaqarpoq. Isumakkeerfiginninnerli isumaqarpa ajortuliortoq ajortuliami kingunerisaanik atuinngitsoortitaassasoq? Jehova Guutip isumakkeerfiginnittarsimanerisa ilaat takoriartigik.

Israelikkut alapernaarsuisut qulit Kana’anip nunaa pillugu nalunaarutaat ajortut tusarlugit pikitsitsilermata Moses Jehovamut qinuvoq: „Ajortuliaannik isumakkeerfigikkit.“ Jehova akivoq: „Illit oqaatsitit pillugit isumakkeerfigaakka.“ Tamanna isumaqarpa ajortuliamik kingunerisinnaasaannik tamanik atuinngitsoortitaasut? Jehova nangippoq: ’Kisianni inuit uannut naalanngissimasut taakkua ilaata ataatsilluunniit nuna siuaasaannut neriorsuutigisara takussanngilaa.’ (4 Moses 14:19-23) Jehovap oqaatsini eqqortippai; inersimasuni taakkunani ataatsilluunniit — Josva Kalebilu kisimik pinnatik — nuna neriorsuutigisaq takunngilaat. — 4 Moses 26:64, 65.

Taamatut aamma pisoqarpoq Natanip kunngi Davidip Batseballu ajortuliaat pillugu David naveermagu, Davidilu nassuerpoq: „[Jehovamut] ajortuliorsimavunga!“ Taava Natan Davidimut oqarpoq: „[Jehovap] ajortuliannik isumakkeerfigaatit.“ (2 Samuel 12:13) Naalli David Jehovamit isumakkeerfigineqaraluarluni, ajortuliami kinguneri inuunermi sinnerani atortariaqarsimavai. — 2 Samuel 12:9-14; aamma takuuk Samuelimik allakkat aappaat kapitali 24.

Assersuutit taakkua pingaarutilinnik ilinniartippaatigut: Ajortuliorutta pillanngitsoorneqarsinnaanngilagut. (Galâsiamiut 6:7, 8) Ajortuliortoq allamik isumataartoq isumakkeerfigineqaruni imaanngilaq ajortuliami kingunerisaanik atuinngitsoortitaassasoq. Isumaqarpa pisuussuteqanngitsup aappani allasiorsimasoq isumakkeerfigisinnaagaa — kamangaarnerminilluunniit iperaaginnarnermigut — avinniarlunili aalajangerluni?

Isumakkeerfiginninneq avinnerlu

Nunarsuarmi kiffartornermini Jesusip pingasoriarluni avinneq eqqartorpaa. (Matîuse 5:32; 19:3-9; Lúkarse 16:18) Soqutiginarporli tamakkununnga tunngatillugu ataasiarluniluunniit isumakkeerfiginninneq eqqaanngimmagu. Soorlu oqarpoq: ’Nuliaminik uversanngitsumik avittoq allamik nuliaruni arnaaneqarpoq, avitamillu nuliartoq arnaaneqarpoq.’ (Matîuse 19:9) Oqarnermigut ’uversanngitsumik’, tassa kanngunartuliunngitsumik, Jesusip akueraa kinguaassiuutitigut kanngunartuliorneq pisuussuteqanngitsumut avissutaasinnaasoq Biibilimik tunngavilik. Jesus oqanngilaq pisuussuteqanngitsoq avissasoq. Paasitippaali taamaaliorsinnaasoq.

Aappariinneq nimiuvoq inuit marluk katinngatigisaat. (Rûmamiut 7:2) Aapparli allasiorpat, nimeq taanna kipineqarsinnaavoq. Taamaattoqartillugulu pisuussuteqanngitsoq marlunnik aalajangigassaqarpoq. Siullermik aalajangertariaqarpaa isumakkeerfiginnissanerluni. Soorlu takoreeripput allasiorsimasup allamik isumataarsimanera isumataarsimannginneraluunniit aalajangiisuulluinnarpoq. Allamik isumataarpat, pisuussuteqanngitsup isumakkeerfigiartuaarsinnaassavaa — tassa kamannini iperarlugu.

Aappassaanik aalajangertariaqarpoq avikkusunnerluni. Uini isumakkeerfigeersimappagu sumik nalorninartoqassagami?a Immaqa meeqqanilu isumannaassusertik aarleqqutigissallugu pissutissaqarpoq, ingammik siornagut aappaq nakuuserniartarsimappat. Immaqaluunniit kinguaassiuutitigut atoqatigiinnikkut tunillaattartunik nappaatinik tunillatsinnissani annilaangassutigaa. Imaassinnaavortaaq aapparmi allasiornera pissutigalugu qamuuna misigisoq tatigisinnaajunnaarlugu taamaattumillu inooqatigeqqinnissaa kissaatiginagu. Taamaattoqartillugu paasinarpoq pisuussuteqanngitsoq avinniarluni aalajangerpat, naak isumakkeerfiginnikkaluarluni (imatut paasillugu kamannini iperarsimagaluarlugu). Kamannini iperaruniuk ingerlaqqinnissaminut iluaqutigissavaa. Imaluunniit siunissami suliassanik uinilu isumaqatigiillutik suliarilluarnerulissutigisinnaassavaat.

Pisuussuteqanngitsup nammineerluni aalajangissavaa aapparminit allasiorsimasumit avissanerluni, qinoreerlunili eqqarsaatigeqqissaagassaqarpoq, pingaarutillit tamaasa naatsorsuutigiitigalugit. (Tussiaat 55:23) Allat qanoq aalajangerniarneranut akuliunnissamut pisussaanngillat. (Naleqqiuguk Galâsiamiut 6:5.) Eqqaamasariaqarparput pisuussuteqanngitsup qanoq iliornissaanik Jesus oqaaseqanngimmat. Taamaalilluni ersarippoq Biibilimik eqqortumik tunngavilimmik avinniartut Jehovap ajorinngikkai. (gD 8/8 95)

[Quppernerup ataani ilanngussaq]

[Qupp. 17-mi suminngaanneernera]

Life