Ukiup ’qipia’

NITTAALLAT nakkaasut isiginnaarlugit tupigusunnikuuit? Taamaappat qularnanngitsumik aamma isigisat toqqissinaralugulu kusagisimassavat — ingammik kialaartumi toqqissisimanartumilu angerlarsimaguit, anisariaqarnak. ’Qipik’ nittaallat nakkaasut pilersitaat issunerujartuinnartillugu sila nipaalligaluttuinnartarpoq. Nittaallat millionilippassuit allaat illoqarfiup nipiliorneranik annikinnerulersitsisarput.

Taamaakkaluartorli tupaallannanngila aput taama maavaartigisoq ajoqutaasinnaammat? Illoqarfissuit soorlu New York, ’illoqarfimmik sininneq ajortumik’ taaneqartartoq, apingaatsiaraangat unittoorluinnarsinnaasarput.

Taamaattumik tupinnanngitsumik Guutip Job aalajaatsoq ima aperisimavaa: „Illit nittaallat pilersarfianniissimavit nataqqornallu peqqumaatit takusimallugit? Tamakku piareersimatittarpakka ullussanut perlussiulerfissanut sorsulerfissanullu.“ (Job 38:22, 23) Aput Pinngortitsisup, Jehova Guutip, assaani sakkuusinnaavoq siooranartoq.

Amerlanertigulli aput ajoqutaanani inuunermik atatitseqataasarpoq. Assersuutigalugu, Biibilimi allassimavoq Guutip ’qaniit nakkaatikkai savat meqquisut qaqortigisut’. (Tussiaat 147:16) Qanoq ilillutik ’qaniit’, imaluunniit aput, savat meqquisut ippat? Aput savallu meqqui qaqortumut minguitsumullu assersuutitut Biibilimi atorneqartarput. (Jesaja 1:18) Aammali allamik pingaartumik assigiissuteqarput. Aput savallu meqqui tamarmik oqorsaataasinnaapput. The World Book Encyclopedia-mi ima allassimasoqarpoq: „Savat meqqui issimut kiammullu illersuutaasarput.“ Atuakkiarsuarmi tassani oqaatigineqarportaaq aput aamma ’oqorsaatissaqqissuusoq. Aput uumasunik toquusarlutik sinittunik naasunillu ukiup silaannaanut nillertumut illersuisarpoq’.

Tulliani nittaallanik nakkaasunik isiginnaaleruit Guutip pissaanersua tupinnangaartoq eqqarsaatigisinnaavat. Imaluunniit takorloorsinnaavat aput tassaasoq ’qipik’ qaqortoq illersuutaasoq Guutip angajoqqaat asannittut meeqqaminnik innartitsigaangamik pisarnerattut pinngortitaminik isumassuilluni taakkununnga qipigititaa. (gE 8/2 96)